ލައިސަންސްގެ ހުރިހާ ހިދުމަތެއް ސިމްސް އޮންލައިން ޕޯޓަލް މެދުވެރިކޮށް
ރާއްޖޭގެ ހުރިހާ ރަށަކުން ޑިޖިޓަލް ލައިސަންސްގެ ހިދުމަތް ހޯދޭނެ އިންތިޒާމު ޓްރާންސްޕޯޓް މިނިސްޓްރީން ހަމަޖައްސައިފި އެވެ. އެ މިނިސްޓްރީން ތައާރަފް ކޮށްފައިވާ ސިމްސް އޮންލައިން ޕޯޓަލް މެދުވެރިކޮށް އަތޮޅުތަކުގައި "އޭ" ޒޯން ލައިސަންސް ދިނުމަށް ކަނޑައަޅާފައިވާ ހުރިހާ ކައުންސިލްތަކުން ވެސް މި ހިދުމަތް ދޭން ފަށާފައިވާކަމަށެވެ.
Your Vehicle Driving License is digital! 📲 All driving related services can be applied through the SIMS portal from all the cities and islands in the Maldives. https://t.co/zPulQM6KZN 🚘 🪪 pic.twitter.com/XocQnmtqzu
— Ministry of Transport and Civil Aviation (@MoTCAmv) April 25, 2023
އެ މިނިސްޓަރީން ބުނީ ސިމްސް އޮންލައިން ޕޯޓަލް މެދުވެރިކޮށް މިދިޔަ ފެބްރުއަރީމަހުން ފެށިގެން މިހާތަނަށް 25000 އެޕްލިކޭޝަނަށް ހިދުމަތް ދީފައިވާ ކަމަށެއެވެ.
ޓްރާންސްޕޯޓް މިނިސްޓްރީން ބުނީ މި ޕޯޓަލްއަކީ އަލަށް ތައާރުފުކުރި ޕޯޓަލްއެއްކަމުން ބައެއް ހާލަތްތަކުގައި އެކިއެކި ދަތިތަކާ ކުރިމަތިވުމަކީ އެކަށީގެންވާ ކަމެއްކަމަށެއެވެ. އަދި މިގޮތަށް ދިމާވާ މައްސަލަތައް ހައްލުކުރުމަށް މަސައްކަތް ކުރާ ކަމަށާއި މި ފަދަ އެއްވެސް މައްސަލައެއް ދިމާވެއްޖެނަމަ އެ މިނިސްޓްރީއަށް ގުޅައި އެކަމެއް ހިއްސާކުރުމަށް އެދޭ ކަމަށެވެ.
އެއްގަމުގައި ދުއްވާ އިންޖީނުލީ އުޅަނދުފަހަރު ދުއްވުމުގެ ލައިސަންސް ރައްކާތެރިކަމާއި ފަސޭހަކަމާއެކު ރައްޔިތުންނަށް ފޯރުކޮށްދިނުމަށް މަގު ފަހިކުރެއްވުމަށްޓަކައި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނިން އަލަށް ތައާރުފްކުރި "ސިމްސް" ޕޯޓަލަކީ ކޮންމެ މީހަކަށްވެސް އެ މީހެއްގެ އީ ފާސް އެކައުންޓް ބޭނުންކޮށްގެން ފަސޭހަކަމާއެކު ހިދުމަތް ހޯދޭގޮތަށް ފަރުމާކޮށްފައިވާ ހިދުމަތެކެވެ.
މި ހިދުމަތަކީ މިހާރު ރައްޔިތުން ބަލައިގެންފައިވާ، ފަސޭހަ އަދި ރައްކާތެރި ހިދުމަތަކަށް ވުމާއެކު މި ހިދުމަތުގެ ތެރެއިން ކޮންމެ މީހަކަށްވެސް ޑިޖިޓަލް ލައިސަންސް ލިބޭނެގޮތަށް ކަންކަން ހަމަޖެހިފައިވާ ކަމަށެވެ.
ޑިޖިޓަލް ލައިސަންސާއެކު އުޅަނދު ދުއްވާ މީހުންނަށް ވަނީ ބޮޑު ލުޔެއް ލިބިފައެވެ. އެގޮތުން ލައިސަންސް ކާޑު ގެއްލުމާއި އަދި އަބަދުވެސް އަތުގައި ލައިސަންސް ގެންގުޅެންޖެހުމުގެ ބުރައަށް ޑިޖިޓަލް ލައިސަންސް ހިދުމަތާއެކު ވަނީ ލުއިލިބިފައެވެ.
