ހދ އަތޮޅުގެ އިސް މެޖިސްޓްރޭޓް އަލީ އާދަމަށް މަރުގެ އިންޒާރުދީފި

ހދ އަތޮޅުގެ އިސް މެޖިސްޓްރޭޓް އަލީ އާދަމަށް މަރުގެ އިންޒާރުދިން މައްސަލައެއް ފުލުހުން ބަލަން ފަށައިފި އެވެ. މައުލޫމާތު ލިބިފައިވާގޮތުގައި ފަނޑިޔާރު އަލީ އާދަމަށް މީހަކު މަރުގެ އިންޒާރުދީފައިވަނީ ކޯޓުން ބޭރުގައި އުޅުއްވަނިކޮށެވެ.

ކޭއޯއަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލު ވިދާޅުވީ، ހދ އަތޮޅުގެ އިސް މެޖިސްޓްރޭޓަށް މަރުގެ އިންޒާރު ދިން މައްސަލައެއް މިއަދު ހެނދުނުގެ ވަގުތެއްގައި ފުލުހުންނަށް ހުށަހެޅިފައިވާ ކަމަށެވެ.

އެ މައްސަލަ ފުލުހުން ބަލަމުންދާއިރު އަދި އެއްވެސް މީހަކު ހައްޔަރުކޮށްފައިނުވާކަމަށް ފުލުހުން ވިދާޅުވެ އެވެ.

އަލީ އާދަމުގެ އިތުރުން ކުޅުދުއްފުށީ ކޯޓުގައި އިތުރު ދެ ފަނޑިޔާރަކުވެސް ތިއްބަވަ އެވެ.