ރައީސް ސޯލިހަކީ ފިނޑި ވެރިއެއް: އީވާ

ރައީސް އިބްރާހީމް މުހައްމަދު ސޯލިހަކީ ފިނޑި ވެރިއެއްކަމަށް ރައްޔިތުންގެ މަޖިލީހުގެ ނައިބުރައީސް އީވާ އަބުދުﷲ ވިދާޅުވެއްޖެއެވެ.

އީވާ މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އިސްވެ ހުންނަވައިގެން އުފައްދަވާ "ދަ ޑިމޮކްރެޓްސް" ޕާޓީއަށް ސަރުކާރުގެ މަގާމުތަކުގައި ތިއްބަވާ ބައެއް ބޭފުޅުން ސޮއި ކުރުމާއި ގުޅިގެން އެ ބޭފުޅުން މަގާމުން ވަކި ކުރުމާއި ގުޅިގެންނެވެ.

މި ބޭފުޅުން މަގާމުތަކުން ވަކިކުރުން ކުށްވެރިކޮށް "ދަ ޑިމޮކްރެޓްސް" އިން ނެރެފައިވާ ބަޔާނުގައި ބުނެފައިވަނީ ސަރުކާރުގެ މަގާމުތަކުން ވަކިކޮށްފައިވަނީ މިސަރުކާރު ވެރިކަމަށް ގެނައުމަށާއި، ކުރީ ސަރުކާރުގެ އަނިޔާވެރިކަމާ ދެކޮޅަށް އަދަދު ނުކުރެވޭހައި ބުރަ މަސައްކަތް ކޮށްފައިވާ ޒުވާން ސިޔާސީ ލީޑަރުންތަކެއް ކަމަށެވެ. ދަ ޑިމޮކްރެޓްސްއަށް ސޮއިކުރި ބޭފުޅުންތަކެއް ސަރުކާރުގެ ސިޔާސީ މަގާމުތަކުން ވަކިކުރީ ދަ ޑިމޮކްރެޓްސްގެ ތާއީދާއި، މެންބަރުން އިތުރުވާ މިންވަރު ފެނި، އިންޒާރު ދިނުމަށާއި، ބިރުދެއްކުމަށާއި އެ ޕާޓީއަށް ތާއީދުކުރުން ހުއްޓުވުމުގެ ނިޔަތުގައި ކަމަށްވެސް ބުނެފައިވެ އެވެ.

ވަޒީފާއިން ކަނޑާލި ޒުވާނުން މި ސަރުކާރު ގެންނަން ކުރި މަސައްކަތް މިނާ ނުކިރޭ.
ޚިޔާލު ތަފާތުވާ ކޮންމެ މީހަކު ނިކަމެތި ކުރާނަމޭ ހީކޮށް އުޅޭއުޅުމުން އިތުރުވާނީ ނަފްރަތު.
ރައީސް @ibusolihއަކީ ފިނޑި ވެރިއެއް!
ޔަގީނުންވެސް މިއިން އެކަކުގެވެސް ހިތްވަރެއް ނޭލޭނެ.ވާނީ އިތުރަށް ވަރުގަދަ💙 pic.twitter.com/VAtEmL54DK

— Eva Abdulla 🎈❓ (@evattey) May 28, 2023

"ރައީސް ސޯލިހަކީ ފިނޑި ވެރިއެއް. ޔަގީނުން ވެސް މިއިން އެކަކުގެ ވެސް ހިތްވަރެއް ނޭލޭނެ. ވާނީ އިތުރަށް ވަރުގަދަ" އީވާ ކުރެއްވި ޓުވިޓުގައި ވިދާޅުވިއެވެ.