ޝަރުއީ ދާއިރާގެ މުވައްޒަފުންނަށް ސިޔާސީ ކަންކަމުގައި އުޅެވޭގޮތް ހަދައިފި

ޝަރުއީ ދާއިރާގެ މުވައްޒަފުން ސިޔާސީ ކަންކަމުގައި އުޅުމުގެ ހުއްދަ ލިބޭ ގޮތަށް އުސޫލު ބަދަލުކޮށް، އެ ދާއިރާގެ މުވައްޒަފުންގެ "ކޯޑް އޮފް ކޮންޑަކްޓް" އާންމު ކޮށްފި އެވެ.

ޝަރުއީ ދާއިރާގެ މުވައްޒަފުންގެ ކޯޑް އޮފް ކޮންޑަކްޓް ކުރިން އޮންނަ ގޮތުން އެ މުވައްޒަފުން އެއްވެސަ ސިޔާސީ ހަރަކާތެއްގައި ބައިވެރިވުމަކީ މަނާ ކަމެކެވެ. އެއްވެސް ޕާޓީއެއްގެ މަގާމެއް ވެސް އެ މުވައްޒަފުންނަށް އަދާއެއް ނުކުރެވޭނެއެވެ.

ކޯޑް އޮފް ކޮންޑަކްޓް އިސްލާހުކޮށް އާންމުކޮށްފައިވާއިރު ސިޔާސީ ހަރަކާތްތަކުގައި ބައިވެރިވުން މަނާކުރާ ބާބުތައް ވަނީ އުވާލަފައެވެ. އަދި ސިޔާސީ ހަރަކާތްތަކުގައި ބައިވެވުމުގެ ހުއްދަ ލިބިދޭ ގޮތަށް ބާބުތަކަށް އިސްލާހު ގެނެސްފައި ވެއެވެ.

އަލަށް ގެނައި އިސްލާހުގައި ޝައުރީ ދާއިރާގެ މުވައްޒަފުން ސިޔާސީ ހަރަކާތުގައި ބައިވެރިވުމާ ގުޅޭ އުސޫލު ހިމަނާފައި ވަނީ ޝަރުއީ ދާއިރާގެ މިނިވަންކަން ހިފެހެއްޓުމާއި އިތުބާރު ދެމެހެއްޓުމުގެ މާއްދާގައެވެ.

މި މާއްދާގައި ޝަރުއީ ދައިރާގެ އިތުބާރަށް އުނިކަން އަތުވެދާނެ ފަދަ ކަންކަމުން ދުރުވާން ޖެހޭނެ ކަމަށާއި، އޭގެ ތެރޭގައި ސިޔާސީ ހަރަކާތްތައް ވެސް ހިމެނޭ ކަމަށް ބަޔާން ކުރައްވާފައިވެއެވެ.

ނަމަވެސް ސިޔާސީ ޕާޓީއެއް ނުވަތަ ސިޔާސީ ހަރަކާތެއް ހިންގާ ޖަމްއިއްޔާއެއް ނުވަތަ ޖަމާއަތެއްގެ މެމްބަރަކަށް ވުމާއި، ޕާޓީއެއްގެ އެތެރޭގެ އިންތިހާބެއްގައި ވޯޓުލުން ޝަރުއީ ދާއިރާގެ މުވައްޒަފުންނަށް މަނާނޫންކަމަށް އައު ކޯޑް އޮފް ކޮންޑަކްޓްގައި ވަނީ ކަނޑައަޅާފައެވެ.