ކަރަންޓާއި ފެނުގެ ޓެރިފް މާލެއާ އެއްހަމަކޮށް، ރޯހައުސްތަކުގެ ކުލި 1500 ރުފިޔާއަށް ކުޑަކުރާނަން: ނާޒިމް

ކުޅުދުއްފުށީގައި ހުރި ރޯހައުސްތަކުގެ ކުލި 1500 ރުފިޔާއަށް ކުޑަކޮށް މާލެއާ އެއްއަގަކަށް ކަރަންޓާއި ފެނުގެ ޓެރިފް ކުޑަކުރާނެކަމަށް އެމްއެންޕީގެ ރިޔާސީ ކެންޑިޑޭޓް، ދަނގެތީ ދާއިރާގެ މެމްބަރު މުހައްމަދު ނާޒިމް ވިދާޅުވެއްޖެ އެވެ.

ނާޒިމް މިހެން ވިދާޅުވީ، އަންނަ ސެޕްޓެމްބަރުމަހު އޮންނަ ރިޔާސީ އިންތިހާބުގެ ކެމްޕެއިނަން ބޮޑު ތިލަދުންމައްޗަށް މިހާރު ކުރައްވަމުންގެންދަވާ ދަތުރުފުޅުގައި ރޭ ކުޅުދުއްފުށީގަ ވާހަކަދައްކަވަމުންނެވެ.

ނާޒިމު ވިދާޅުވީ، މާލެއެކޭ އެއް އަގަށް ކަރަންޓާއި ފެނުގެ ޓެރިފް ކުޑަކޮށް އަތޮޅުތެރެ އާއި މާލެއާ ދެމެދު ގެންގުޅޭ ތަފާތުކުރުން ނައްތާލާނެ ކަމަށެވެ. އަދި ކުޅުދުއްފުއްޓަށް ހާއްސަކޮށް ނަގާ ނަރުދަމާގެ ލައިން ފީ، އެމަނިކުފާނު ވެރިކަމެއްގެ ފުރަތަމަ ދުވަހު ކަނޑާލާނެކަމަށެވެ.

ކުޅުދުއްފުށީގެ ރޯހައުސްތަކުގެ ކުލި މަހަކު 1500 ރުފިޔާއަށް ކުޑަކުރާނެކަމަށްވެސް ނާޒިމު ވިދާޅުވި އެވެ. މިހާރު އެ ރޯހައުސްތަކަށް ދައްކަމުން އަންނަނީ މަހަކު 3000 ރުފިޔާގެ ކުއްޔެކެވެ. ވިޔަފާރިތަކަށާއި އާންމުންނަށް ބިން ދިނުމުގައި ސަރުކާރުތަކުން ތަފާތުކުރުން އިންތިހާއަށް ގެންގުޅޭކަން ފާހަގަކުރައްވަމުން ނާޒިމް ވިދާޅުވީ، އެމަނިކުފާނުގެ ވެރިކަމެއްގައި ބިމުގެ ކުލީގެ އަގު ހަމަހަމަ ކުރާނެ ކަމަށެވެ.