އަދީބުގެ ބޭސްފަރުވާއަށް އިތުރަށް މުއްދަތު ދީފި

އެމްއެމްޕީއާރުސީގެ ވައްކަމުގެ މައްސަލައިގައި ހުކުމް އިއްވާފައިވާ ކުރީގެ ނައިބު ރައީސް އަހުމަދު އަދީބު އަބްދުލްގަފޫރު ބޭސްފަރުވާއަށް ބޭރަށް ވަޑައިގަތުމަށް ދިން ހުއްދައިގެ މުއްދަތު މޯލްޑިވްސް ކަރެކްޝަނަލް ސާވިސް އިން އިތުރުކޮށްދީފި އެވެ.

ކަރެކްޝަނުން ކުރި ޓްވީޓެއްގައި ބުނީ މުއްދަތު އިތުރުކޮށްދޭން އަދީބު އެދިފައިވާތީ، ރާއްޖޭން ބޭރުގައި ހުރުމަށް އޭނާއަށް ދީފައިވާ ހުއްދަ، އަންނަ އޮގަސްޓު މަހުގެ 28 ވަނަ ދުވަހުގެ ނިޔަލަށް އިތުރުކޮށްދީފައިވާ ކަމަށެވެ. އެގޮތަށް ނިންމީ ހުށަހެޅި މެޑިކަލް ޑޮކިއުމެންޓުތަކަށް ބަލާފައި ކަމަށްވެސް ބުނެފައިވެ އެވެ.

އެމްއެމްޕީއާރުސީގެ ވައްކަމުގެ މައްސަލައިގައި އަދީބު، 20 އަހަރަށް ޖަލަށް ލާން ކްރިމިނަލް ކޯޓުން ހުކުމްކުރީ 5 އޮކްޓޯބަރު 2020ގަ އެވެ. އެ ހުކުމުގެ އެއްބައި ޖަލުގައި ތަންފީޒުކުރި ނަމަވެސް ދައުލަތާ އެކު ހަދާފައިވާ އިއުތިރާފުގެ އެއްބަސްވުމެއްގެ ދަށުން އޭނާ ފަހުން ހުންނެވީ ގޭ ބަންދުގަ އެވެ.

ގޭ ބަންދުގައި ހުންނަވަނިކޮށް، މި މަހުގެ ފަސްވަނަ ދުވަހު ހާލު ދެރަވެގެން އަދީބު އައިޖީއެމްއެޗްގައި އެޑްމިޓް ކުރި އިރު، އަދީބުގެ އާއިލާއިން ބުނާ ގޮތުން، އޭނާ ގެންދަވަނީ ނާރުގެ ނިޒާމާ ގުޅޭ ފުރާނައަށް ނުރައްކާވާ ބައްޔަކަށް ފަރުވާ ހޯއްދަވަމުންނެވެ.

އެހެންވެ ކަރެކްޝަންސް އިން ވަނީ މި މަހުގެ 12 ވަނަ ދުވަހު އަދީބު ސިންގަޕޫރަށް ފުރުމުގެ ހުއްދަ ދީފަ އެވެ. ދިހަ ދުވަހުގެ މުއްދަތަށް އަދީބު ރާއްޖޭން ބޭރަށް ފޮނުވީ ރާއްޖޭގައި ހެދެން ނެތް ޓެސްޓްތަކެއް ހެދުމަށް ބޭނުންވާ ކަމަށް ޑޮކްޓަރުން ލިޔުމުން ދިނުމުން، ކަރެކްޝަންގެ މެޑިކަލް ބޯޑުން އެ ގޮތަށް ލަފާ ދިނުމުންނެވެ.