ސިމް ކާޑު ގަނެވޭ އަދަދު ލިމިޓްކޮށްފި

ސިމް ކާޑު ނެގޭ މިންވަރު ލިމިޓުކޮށް ކޮންމެ ދިވެހި ރައްޔިތަކަށް 10 ސިމް ކާޑު އަދި ބިދޭސީއެއް ނުވަތަ ފަތުރުވެރިއެއް ނަމަ ތިން ސިމް ކާޑު ނެގޭ ގޮތަށް ގާނޫނު އެކުލަވާލާ ތަންފީޒުކުރަން ފަށައިފިއެވެ.

މޯބައިލް ފޯނު ނަމްބަރު ދޫކުރުމާއި ނަމްބަރު ބޭނުންކުރުމުގެ އުސޫލުތައް ކަނޑައަޅައ،ި އެ ކަންކަން ބަޔާންކުރުމަށް ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) އިން އިއްޔެ ވަނީ “މޯބައިލް ފޯނުގެ ހިދުމަތް ހޯދުމަށް ބޭނުންކުރާ ފޯނު ނަންބަރު ދޫކުރުމާއި ނަމްބަރު ބޭނުންކުރުމާ ބެހޭ ގަވާއިދު” އާންމުކޮށްފަ އެވެ.

ގަވައިދުގައިވާ ގޮތުން، ކޮންމެ ދިވެއްސަކަށް ނެގޭނީ ގިނަ ވެގެން 10 ސިމެވެ. ބިދޭސީންނާއި ޓޫރިސްޓުންނަށް ނެގޭނީ 3 ސިމެވެ. އަދި އަމިއްލަ ފަރުދުން ހިންގާ ވިޔަފާރިތަކަށްވެސް ގިނަވެގެން ދޫކުރެވޭނީ 10 ސިމް ކާޑެވެ.

އެ އަދަދުތަކަށް ވުރެ އިތުރަށް އެއްވެސް ފަރާތަކުން ފޯނު ނަމްބަރު ބޭނުންވާ ނަމަ މަގުބޫލު ސަބަބެއް ބަޔާންކޮށް އެ ފަރާތަކުން ހުށަހެޅުމުން، އެކަމަށް ހުއްދަ ދިނުމުގެ އިހުތިޔާރު، ކޭމްއަށް ލިބިގެންވާ ކަމަށް ގަވާއިދުގައި ވަނީ ބަޔާންކޮށްފަ އެވެ. ނަމަވެސް ގާނޫނީ އެހެން ޝަހުސުތަކާއި ދައުލަތުގެ އިދާރާތައް ބޭނުން އަދަދަކަށް އަދިވެސް ސިމް ނެގޭނެ އެވެ.

ގަވާއިދުގައި އިތުރަށް ބުނެފައިވަނީ، މިހާރު ގިނަ ސިމްތަކެއް ގެންގުޅޭ ފަރާތްތަކުން، އެ ގަވައިދަށް އަމަލުކުރަން ފަށާތާ ތިން މަސް ތެރޭގައި ގަވައިދާ އެއްގޮތަށް ސިމްގެ އަދަދު އިހްތިޔާރު ކުރުމަށް ފަހު ބާކީ ހުރި ސިމްތައް ކަނޑާލުމަށް ސާވިސް ޕްރޮވައިޑަރުންނަށް ހުށަހަޅަން ޖެހޭނެ ކަމަށެވެ.

އަދި އެ މުއްދަތުގެ ތެރޭގައި ގަވައިދުގައި ބުނާ ގޮތަށް ސިމްގެ އަދަދު މަދު ނުކުރާ މީހުންގެ ސިމްތައް ސާވިސް ޕްރޮވައިޑަރުންނަށް ފެންނަ ގޮތަކަށް ސިމް މަދުކޮށް، ނަމްބަރުތަކުން ހިދުމަތް ކަނޑާލަން ޖެހޭނެ ކަމަށްވެސް ބަޔާންކޮށްފައިވެ އެވެ. އެ ގަވާއިދާ އެއްވެސް ފަރާތަކުން ހިލާފުވެއްޖެ ނަމަ ފިޔަވަޅު އެޅުމުގެ އިހުތިޔާރު ކޭމްއަށް ލިބިގެންވެ އެވެ.

އެގޮތުން ފުރަތަމަ ފަހަރަށް ގަވާއިދާ ހިލާފު ވެއްޖެ ނަމަ އެކަމެއް ރަނގަޅުކުރަން އެކަށީގެންވާ މުއްދަތު ދޭނެ އެވެ. ދެވަނަ ފަހަރަށް ހިލާފުވެއްޖެ ނަމަ 10،000ރ. އިން ޖޫރިމާނާ ކުރެވޭއިރު، ތިންވަނަ ފަހަރަށް ހިލާފުވެއްޖެ ނަމަ 20،000ރ. އިން ޖޫރިމާނާ ކުރާނެ އެވެ.

އަދި ހަތަރުވަނަ ފަހަރު ނުވަތަ އެއަށްވުރެ އިތުރަށް ގަވާއިދާ ހިލާފުވާ ކަމަށް ކަނޑައަޅާ ކޮންމެ ފަހަރަކު 50،000ރ. އިން ޖޫރިމަނާ ކުރުމާއެކު “ދިވެހިރާއްޖޭގެ ޓެލެކޮމިއުނިކޭޝަންގެ ގާނޫނު”ގެ ދަށުން އެ ފަރާތަކަށް ފިޔަވަޅު އަޅާނެ އެވެ.