ކުޅުދުއްފުށީގެ ހުރިހާ މަގެއް ޒަމާނީ ފެންވަރަށް ތަރައްގީކުރާނަން: މުއިއްޒު

ކުޅުދުއްފުށީގެ ހުރިހާ މަގެއް ޒަމާނީ ފެންވަރަށް ތަރައްގީކުރާނެކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރިޔާސީ ކެމްޕެއިންނަށް ކުޅުދުއްފުއްޓަށް ވަޑައިގެން މިރޭ ބޭއްވި ޖަލްސާގައި ވާހަކަދައްކަވަމުން ޑރ މުއިއްޒު ވިދާޅުވީ، ރަށްރަށުގެ މަގުތަކަކީވެސް މާލޭގެ މަގުތަކާ އެއް ފެންވަރަކަށް ހެދެން ޖެހޭނެ މަގުތަކެއްކަމަށެވެ.

"މާލެއެކޭ އެއްފެންވަރަށް ރަށްރަށުގެ މަގުތައްވެސް ހެދެން ޖެހޭ. ހުރިހާ ރަށެއްގެ ހުރިހާ ރައްޔިތުންނަކީވެސް ހަމަހަމަކާއެކީގައި ތަރައްގީ ލިބެން ޖެހޭ ފަރާތްތައް. ހަމަހަމަކަން އެއީ އަޅުގަނޑުމެން ސިޔާސަތު." ކުޅުދުއްފުށީގައި ވާހަކަ ދައްކަވަމުން މުއިއްޒު ވިދާޅުވި އެވެ.

އެ ބޭފުޅުންގެ ސަރުކާރެއްގައި ކުޅުދުއްފުށީގެ ހުރިހާ ބޮޑެރި މަގުތަކެއްގައި ތާރު އަޅައި އަދި ހަނި ގޯޅިތަކުގައި ގާ އަތުލައި މުޅި ސިޓީގެ ހުރިހާ މަގެއް ރަނގަޅު ފެންވަރަށް ތަރައްގީކުރާނެ ކަމަށެވެ.

ކުޅުދުއްފުއްޓަކީ ސަރަހައްދީ ރަށެއްގެ ގޮތުގައި ފާހަގަކުރައްވަމުން މުއިއްޒު ވިދާޅުވީ، ރަށުގެ މަގުތައް ހެދުމުން އެކަމުގެ ފަސޭހަ އެތައް ހާސް ރައްޔިތުންނަށް ލިބޭނެ ކަމަށެވެ. ކުޅުދުއްފުއްޓަށް އަންނަ ތަރައްގީއަކީ އެތައް ހާސް ރައްޔިތުންނަކަށް ލިބޭނެ ތަރައްގީއެއްކަމަށް މުއިއްޒު ވިދާޅުވި އެވެ.