މިހާރު ހުރި ހުރިހާ ޕާކިން ޖޫރިމަނާތައް ރައީސް މާފްކޮށްދީފި

ގަވައިދާ ހިލާފަށް ޕާކުކޮށްގެން މިހާތަނަށް ނުލިބިހުރި ހުރިހާ ޕާކިން ޖޫރިމަނާތައް ރައިސުލްޖުމަހޫރިއްޔާ އިބްރާހިމް މުހައްމަދު ސޯލިހު މާފުކޮށްދެއްވައިފި އެވެ.

ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ޕާކިން ޖޫރިމަނާ މަފްކޮށްދިނުމަށް ރައީސް ނިންމެވީ ވަރަށް ގިނަ ކަންކަމަށް ރިއާޔަތްކުރުމަށް ފަހުގައި ކަމަށެވެ.

ޕާކިން ޖޫރިމަނާ މައާފްކޮށްދިނުމަށް ރައީސް ސޯލިހް ނިންމަވާފައި މިވަނީ ވެރިކަން ލިބިވަޑައިގެންފިނަމަ ޕާކިން ޖޫރިމަނާ މައާފްކޮށްދެއްވާނެ ކަމަށް ޕީޕީއެމް / ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވައުދުވެވަޑައިގެންފައި ވަނިކޮށެވެ.

މިއުވާން ވިދާޅުވީ މާލޭގައި އެކަށީގެންވާ ވަރަށް ޕާކު ކުރާނެ ޖާގަނެތި، ސްޓިކާ ޖަހަމުން ދިޔުމުގެ ސަބަބުން ޖޫރިމަނާ އިތުރުވާ ކަމުގެ ޝަކުވާ ރައްޔިތުންގެ ފަރާތުން ލިބެމުންދާކަމަށެވެ. އަދި އެކަން އެގޮތަށް ހިނގަމުންދާކަށް ރައީސަށާއި، ސަރުކާރަށް ވެސް ގަބޫލުކުރެއްވޭ ކަމަށް އޭނާ ވިދާޅުވިއެވެ.

"އަދި ކޮވިޑް 19 އާއި ގުޅިގެން މާލީގޮތުން އާންމުންގެ ދިރިއުޅުމަށް އައި ބޮޑެތި ބަދަލުތަކާ އެކު މިފަދަ ޖޫރިމަނާ ފައިސާ ނުދެއްކި އިތުރުވަމުން ދިޔުންވެސް ހިމެނެ އެވެ. މިކަން މިގޮތަށް ހިންގަމުންދާކަން އެމަނިކުފާނަށާއި ސަރުކާރަށް ވެސް ގަބޫލުފުޅުކުރެވޭތީ ރައްޔިތުންނަށް ލުއި ގޮތެއް ހޯއްދަވައިދިނުމަށް އެމަނިކުފާނު ނިންމެވީ އެވެ،" ރައީސް އޮފީހުގެ ބަޔާނުގައިވެ އެވެ.

ލޯކަލް ކައުންސިލް އިންތިހާބުގެ ކެންޕޭނު ތެރޭގައި ލައިސަންސް ނެތި ވެހިކަލް ދުއްވައިގެން ކުރާ ޖޫރިމަނާތައް ނުދެއްކިފައި ޒުވާނުން ތިބިކަމަށް ރައީސް ވިދާޅުވިކަން ވެސް ފާހަގަކުރައްވާފައެވެ.

އެގޮތުން، ޕާކިން ޖޫރިމަނާ ފިޔަވާ، އެހެނިހެން ޓްރެފިކް ޖޫރިމަނާތައް ދެއްކުން ލުއިކުރުމުގެ ގޮތުން، ބައެއް ހާލަތްތަކުގައި ތަމްރީނެއް ފުރިހަމަކޮށްގެން ޖޫރިމަނާ މާފުވާނެ ގޮތް ސަރުކާރުން ކަނޑައަޅުއްވާފައިވާކަމަށެވެ

ރާއްޖޭގައި މިފަހުން ރިޔާސީ ވައުދެއްގެ ގޮތުގައި ހިމަނައިގެން ޕާކިން ޖޫރިމަނާ މައާފްކުރުން ކޮންމެ ރިޔާސީ އިންތިހާބަކާ ދިމާކޮށް ކުރިއަށްދެ އެވެ.