ދެވަނަ ބުރު ބޭއްވުމަށް 44 މިލިއަން ރުފިޔާ ބޭނުންވޭ: އީސީ

މި މަހު 30ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގެ 2 ވަނަ ބުރުގައި ވޯޓުލުމުގެ ކަންކަން ކުރިޔަށްގެންދިޔުމަށް 44 މިލިއަން ހަރަދުވާނެކަމަށް ލަފާކުރެވޭކަމަށް އިލެކްޝަންސް ކޮމިޝަން (އީސީ)ން ބުނެފިއެވެ.

އިއްޔެ އެކޮމިޝަނުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޝަންގެ ނައިބު ރައީސް އިސްމާއީލު ހަބީބު ވިދާޅުވީ ދެވަނަ ބުރަށް ބޭނުންވާ ބަޖެޓް މިހާރު ކޮމިޝަނުން ތައްޔާރުކޮށްފައިވާކަމަށެވެ. އަދި 44 މިލިއަން ރުފިޔާ ހަރަދުވާނެކަމަށް ބެލެވޭއިރު ބަޖެޓް ދިނުމަށް އެދި މިއަދު ފިނޭންސް މިނިސްޓްރީއަށް ހުށަހަޅާނެކަމަށް ހަބީބު ވިދާޅުވިއެވެ.

"މިމަސައްކަތް ކުރެވޭނީ ބަޖެޓް ލިބިގެން. އޮފިޝަލުންނަށް އުޖޫރަ ދިނުމާއި ދަތުރުފަތުރާއި ވޯޓް ކަރުދާސް ޕްރިންޓް ކުރުމަށް ބަޖެޓް ބޭނުންވޭ. ގަބޫލުކުރަން އެބަޖެޓް ފިނޭންސް މިނިސްޓްރީން ހަމަޖައްސަވައި ދެއްވާނެކަމަށް." ހަބީބް ވިދާޅުވި އެވެ.

ރިޔާސީ އިންތިހާބު ބޭއްވުމަށް އިލެކްޝަންސް ކޮމިޝަނުން މަޖިލީހަށް ހުށައެޅީ 120 މިލިއަން ރުފިޔާގެ ބަޖެޓެކެވެ.

އެއީ އިންތިހާބުގެ ފުރަތަމަ ބުރަށް 95 މިލިޔަން ރުފިޔާ އަދި ދެވަނަ ބުރު ބާއްވަން ޖެހިއްޖެނަމަ 25 މިލިޔަން ރުފިޔާގެ ބަޖެޓެއް ކަނޑައެޅުއްވިއެވެ. އެހެންނަމަވެސް ރައްޔިތުންގެ މަޖިލީހުން މިއަހަރުގެ ބަޖެޓުގައި ހިމެނުމަށް ފާސްކުރީ 90 މިލިއަން ރުފިޔާގެ ބަޖެޓެކެވެ.