އިންތިހާބީ ނައިބުރައީސް ޕީއެންސީއާ ގުޅިވަޑައިގެންފި

އިންތިހާބީ ނާއިބްރައީސް އަދި ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް ޕީޕީއެމުން ވަކިވެވަޑައިގެން ޕީއެންސީއާއި ގުޅިވަޑައިގެންފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ، އިންތިހާބީ ނާއިބްރައީސް ރިޔާސީ އިންތިހާބުގައި ޕީއެންސީގެ ކެންޑިޑޭޓުގެ ރަނިންމޭޓުގެ ގޮތުގައި ވާދަކުރެއްވީ ޕާޓީ ބަދަލުކުރެއްވުމަށްފަހު ކަމަށެވެ.

"މިހާރު އިންތިހާބުވެފައިވާ ނައިބު ރައިސް ޕާޓީ ބަދަލުކުރައްވާ އެ ރިޔާސީ އިންތިހާބުގައި ބައިވެރިވެ ވަޑައިގަތީ. ބަދަލުުކުރައްވަމުން މަޖިލީހަށް އޮތީ ކަރުދާސް ޑޮކިއުމެންޓްސް ހުށަހަޅުއްވާފައި އަދި އިލެކްޝަން ކޮމިޝަނުންވެސް މަޖިލީހަށް ވަނީ ޑޮކިއުމެންޓްސް ހުށަހަޅުއްވާފައި." ނަޝީދު ވިދާޅުވިއެވެ.

ޕީއެންސީން ރިޔާސީ އިންތިހާބަށް ކެނޑިޑޭޓަކު ނެރުނީ ރައީސް އަބްދުﷲ ޔާމީން 11 އަހަރަށް ޖަލަށް ލާފައިވާތީ، ވެރިކަމަށް ކުރިމަތިލެއްވުމަށް ގާނޫނީ ހުރަސްތަކެއް މެދުވެރިވެފައިވާތީއެވެ. އިދިކޮޅު ކޯލިޝަނުގެ ފަރާތުން ރިޔާސީ ޓިކެޓް އެންމެ ފުރަތަމަ އެރުވީ ކުރީގެ ރައީސް ޔާމީނަށެވެ.

އެހެންކަމުން މިހާރުގެ އިންތިހާބީ ރައީސް ޑރ. މުހައްމަދު މުއިއްޒު ޕީޕީއެމްގެ ނައިބު ރައީސްގެ މަގާމުން ވަކިވެ ވަޑައިގެން ޕީއެންސީ އާއި ގުޅިވަޑައިގަތީއެވެ. އަދި ޕީއެންސީގެ ރިޔާސީ ކެނޑިޑޭޓްގެ ގޮތުގައި އިންހާބުގެ ދެވަނަ ބުރުން މިވަނީ ކާމިޔާބު ހޯދާފައެވެ.

މުއިއްޒާއި އެމަނިކުފާނުގެ ރަނިންމޭޓް ހުސައިން މުހައްމަދު ލަތީފް އިންތިހާބު ކާމިޔާބު ކުރެއްވީ 129،159 ވޯޓުންނެވެ. އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް ލިބިވަޑައިގެންނެވީ 109،868 ވޯޓެވެ.

ހުސައިން މުހައްމަދު ލަތީފް ޕީއެންސީ އަށް ބަދަލުވެވަޑައިގަތުމުން މަޖިލީހުގެ ދަފްތަރު މިހާރު އެކުލެވިގެންވަނީ އެމްޑީޕީގެ 56 މެންބަރުންނާއި ޑިމޮކްރެޓްސްގެ 13 މެންބަރުންނާއި ޕީޕީއެމްގެ 4 މެންބަރުންނާއި ޕީއެންސީގެ 4 މެންބަރުންނާއި އެމްއެންޕީގެ 3 މެންބަރުންނާއި އެމްޑީއޭގެ 2 މެންބަރުންނާއި ޖޭޕީ 2 މެންބަރުންގެ އިތުރުން ވަކި ޕާޓީއަކަށް ނިސްބަތް ނުވާ 3 މެންބަރުންގެ މައްޗަށެވެ.