އެއާޕޯޓް ތަކުގައި ޕްރެޝާ ފެޑް ސިސްޓަމް ބޭނުންކުރުން ހުއްޓާލައިފި

ކުޅުދުއްފުށި އެއާޕޯޓުގައި ޕްރެޝާ ޕެޑެއް ގޮވައި ހަތަރު މީހަކަށް އަނިޔާވި ހާދިސާއަށް ފަހު އެއާޕޯޓުތަކުގައި ޕްރެޝާ ޕެޑް ބޭނުންކުރުން ވަގުތީ ގޮތުން ހުއްޓާލާފައިވާ ކަމަށް ރީޖަނަލް އެއާޕޯޓްސް ކޮމްޕެނީން ވިދާޅުވެއްޖެއެވެ.

ބައެއް އޮންލައިން ނޫސްތަކަށް މައުލޫމާތު ދެއްވަމުން ރީޖަނަލް އެއާޕޯޓްސް ކޮމްޕެނީގެ އޮފިޝަލަކު ވިދާޅުވީ ކުޅުދުއްފުށީގައި ހިނގި ހާދިސާ ތަހްގީގު ކުރުމަށް ސިވިލް އޭވިއޭޝަން އޮތޯރިޓީއާއެކު ރީޖަނަލް އެއާޕޯޓްސް އިން މިހާރު މަސައްކަތް ފަށާފައިވާ ކަމަށާއި، އެ ކަހަލަ ޕްރެޝާ ފެޑް ސިސްޓަމްތައް ރާއްޖޭގެ ހުރިހާ އެއާޕޯޓެއްގައި ވެސް ބޭނުންކުރާ ކަމަށެވެ.

ކުޅުދުއްފުށި އެއާޕޯޓުގައި ހިނގި ހާދިސާގައި ސީރިއަސް އަނިޔާތަކެއް ލިބުނު މީހަކަށް ފަރުވާ ދިނުމަށް މާލެ ގެނެސް އިތުރު ފަރުވާއަށް އިންޑިއާއަށް ގެންދިއުމަށް އާއިލާއިން ދަނީ ތައްޔާރުވަމުންނެވެ.

މި ހާދިސާ ހިނގާފައިވަނީ ކުޅުދުއްފުށީ އެއާޕޯޓްގެ ޓްރެއިނިންގައި ބޭނުންކުރާ ސިލިންޑަރެއް ރީފިލް ކުރުމުގެ ތެރޭގައެވެ. ފުލުހުންނަށް މި ހާދިސާގެ ރިޕޯޓު ކޮށްފައިވަނީ މިދިޔަ ބުރާސްފަތި ދުވަހު ކަމަށް ފުލުހުން ވިދާޅުވިއެެވެ.

މިމަހުގެ 19 ވަނަ ދުވަހު ހިނގި ހިތާމަވެރި މިހާދިސާގައި އެންމެ ބޮޑަށް އަނިޔާވީ އެ އެއާޕޯޓްގެ ފަޔަރ ފައިޓަރުންގެ ވެރިއެއްގެ ގޮތުގައި ހުންނެވި މުހައްމަދު އަހުމަދު (37އ) އެވެ. އޭނާގެ ކަނާއަތުގެ އުޅަނބޮށިން ފެށިގެން ތިރި ވަރަށް ބޮޑަށް ޒަހަމުވެފައިވާއިރު އެކި ވަރުގެ އަނިޔާތައްވި އެވެ.

އޭނާ އިތުރު ފަރުވާއަށް އިންޑިޔާގެ، ކޮއިންބަތޫރަށް ގެންދިޔުމަށް އެއާ އެންބިއުލާސްއެއް ނުވަތަ ފްލައިޓެއް ޗާޓަރު ކުރުމުގެ މަސައްކަތްކުރަމުންދާ ކަމަށާއި މިކަމުގައި ހުރިހާ ހަރަދެއް ކުރަނީ އޭނާ މަސައްކަތްކުރަމުންދާ ކުންފުނިންނެވެ.

މި ހާދިސާގައި އަނިޔާވި އަނެއް ތިން ފަޔަރ ފައިޓަރުން ކޭއާރުއެޗުގައި ފަރުވާދިނުމަށްފަހު އެދުވަހު ވަނީ ގެއަށް ފޮނުވާލާފަ އެވެ. އެއީ 29 އަހަރުގެ ފިރިހެނަކާއި 28 އަހަރުގެ ފިރިހެނަކާއި އަދި 25 އަހަރުގެ އަންހެނެކެވެ.