ފެލިދޫ ކައުންސިލަށް ފައިސާ ނުދައްކާ މީހުންގެ އާއިލާތަކަށް ހިދުމަތް ނުދޭން ނިންމައިފި

ވ. ފެލިދޫ ކައުންސިލަށް ދައްކަންޖެހޭ ފައިސާ ނުދައްކާ މީހުންނާއި އެމީހުންގެ އާއިލާތަކަށް ކައުންސިލުން އެއްވެސް ހިދުމަތެއް ނުދިމުމަށް ނިންމައިފި އެވެ.

ފެލިދޫ ކައުންސިލުން މިމަހުގެ އެއްވަނަ ދުވަހު ކޮށްފައިވާ އިއުލާނެއްގައި ބުނެފައިވަނީ ފެލިދޫ ރައްޔިތުންގެ އާމްދަނީއަށް ލިބެންޖެހޭ ފައިސާ ނުދައްކާ މީހުންގެ އަތުން ފައިސާ ހޯދުމަށް ކައުންސިލުން ގިނަ މަސައްކަތްތަކެއް ކުރި ނަމަވެސް އެކަމުގައި އެކަށީގެންވާ ކުރިއެރުމެއް ލިބިފައި ނުވާ ކަމަށެވެ.

އެހެންވެ ފައިސާ ނުދައްކާ މީހުންނާއި، އެމީހުންގެ އަނބިން، ފިރިން އަދި ދަރިންނަށް މިމަހުގެ އެއްވަނަ ދުވަހުން ފެށިގެން އެއްވެސް ހިދުމަތެއް ނުދިނުމަށް ކައުންސިލުން ފާސްކޮށްފައިވާ ކަމަށެވެ.

އިއުލާންގައި ބުނެފައިވަނީ ކައުންސިލަށް ފައިސާ ދައްކަންޖެހޭ މީހުން ފައިސާ ދެއްކުމަށް އިތުރު ފަސް ދުވަހުގެ މުއްދަތެއް ދިނުމަށާއި، މުއްދަތުގެ ފަހުން ފައިސާ ނުދައްކާ މީހުންގެ ލިސްޓް ކޮންމެ މަހަކު އާއްމުކޮށް އިއުލާންކުރަމުން ގެންދިއުމަށްވެސް ނިންމާފައިވާ ކަމަށެވެ.

ފެލިދޫ ކައުންސިލުން ހޯދަން ބޭނުންވަނީ ކިހާ އަދަދެއްގެ ފައިސާއެއް ކަމެއް ނޭނގެ އެވެ. ދައުލަތުގެ އިދާރާއަކަށް ފައިސާ ނުދައްކައިގެން ކަމަށް ބުނެ އާންމު ހިދުމަތްތައް އެފަދަ މީހުންނަށް ނުދޭން ނިންމުމަކީ ދައުލަތުގެ އިދާރާތަކުން އާންމުކޮށް ކުރާ ކަމެއް ނޫނެވެ.

ފެލިދޫ ކައުންސިލުން ބުނި ގޮތުގައި ކައުންސިލަށް ނުލިބިވާ ފައިސާގެ ތެރޭގައި ހިމެނެނީ ކައުންސިލުން ފޯރުކޮށްދޭ ބައެއް އަސާސީ ޚިދުމަތްތަކުގެ އަގުގެ ގޮތުގައި ނުލިބި ގިނަ ދުވަސްވެފައިވާ ފައިސާއެެވެ.