ވެރިކަމުގެ 100 ދުވަސްތެރޭ ހިލޭ ބޯންމެރޯ ޓްރާންސްޕްލާންޓް ހެދޭނެ މަގު ފަހިކޮށްދެނީ

އިންތިހާބީ ރައީސް ޑރ. މުހައްމަދު މުއިއްޒު ވެރިކަމުގެ 100 ދުވަހުގެ ޕްލޭންގެ ތެރޭގައި ލޭ އަޅާ ކުދިންނަށް ހިލޭ ބޯންމެރޯ ޓްރާންސްޕްލާންޓް ހެދޭނެ މަގުފަހިކޮށްދޭނެ އިންތިޒާމު ހަމަޖައްސައިފިއެވެ.

ރޭ މާލޭގެ ދަރުބާރުގޭގައި ބޭއްވި ހާއްސަ ރަސްމިއްޔާތެއްގައި ''ހަފްތާ 14''ގެ ނަމުގައި އާންމު ކުރެއްވި މި ޕްލޭންގައި ސިއްހީ ދުޅަހެޔޮކަމާއި އޯގާތެރި މުޖުތައު އަކަށް ބޭނުންވާނެ ގިނަ ކަންތައްތަކެއް ހިމަނާފައި ހުރިއިރު އައިވީއެފް ޓްރީޓްމަންޓް ހިމެނޭހެން ދަރިމައިވުމާގުޅޭ ފަރުވާތައް އާސަންދަ މެދުވެރިކޮށް ލިބޭނެ އިންތިޒާމު ހަމަޖެއްސުން ހިމަނާފައި ވަނީ ވެރިކަމުގެ ފުރަތަމަ 4 ހަފްތާގެ ތެރޭގައި ކުރާނެ ކަމެއްގެ ގޮތުގައެވެ.

ފުރަތަމަ 100 ދުވަހުގެ ތެރޭގައި ލޭ އަޅާ ކުދިންނަށް ބޯންމެރޯ ޓްރާންސްޕްލާން ހެދޭނެ މަގުފަހިކޮށްދީ، ރާއްޖެއިން ލިބޭ ޑޮކްޓަރީ ބޭހަކީ ފެންވަރު ރަނގަޅު ބޭސްކަމުގައި ހެދުމަށް ސިޔާސަތެއް އެކުލަވާލުމަށް ނިންމަވާފައިވެއެވެ. މީގެ އިތުރުން އާސަންދައިގެ ދަށުން ކޮންމެ އަހަރަކު ދެފަހަރު މެޑިކަލް ޗެކަޕް ހެދޭނެ ގޮތަށް ނިންމާފައެވެ.

ސިއްހީ ދުޅަހެޔޮކަން ބިނާ ކުރުމަށް 100 ދުވަހުގެ ޕްލޭން:

އޭގެ އިތުރުން ނަފްސާނީ ބަލިމަޑުކަމާ ކުރިމަތިލާން ޖެހިފައިވާ ފަރާތްތަކަށް 24 ގަޑިއިރު ހިދުމަތް ލިބޭނެ ހާއްސަ ގައުމީ ހެލްޕް ލައިނެއް ގާއިމް ކުރުމުގެ މަސައްކަތް 100 ދުވަހުގެ ތެރޭގައި ކުރެއްވުމަށް މުއިއްޒު ވައުދުވެވަޑައިގެންފައިވެއެވެ.