އިންޑިއާއިން ފިޔާ އެކްސްޕޯޓް ކުރުން މަނާކޮށްފި

އަންނަ އަހަރު އޮންނަ އިންޑިއާގެ ލޮކް ސަބާ އިންތިހާބާ ދިމާކޮށް އިންފްލޭޝަން ހުއްޓުވުމުގެ ފިޔަވަޅެއްގެ ގޮތުން, އަންނަ އަހަރުގެ މާޗް މަހާ ހަމައަށް އެ ގައުމުން ފިޔާ އެކްސްޕޯޓު ކުރުން މަނާކޮށްފި އެވެ.

އިންޑިއާއަކީ ރާއްޖެއަށް އެންމެ ގިނަ އަދަދަކަށް ފިޔާ އެތެރެކުރާ ގައުމެވެ. އެހެންކަމުން އެ ގައުމުން ފިޔާ ބޭރުކުރުން ހުއްޓައިފިނަމަ ރާއްޖެއަށް ފިޔާ ލިބުމުގައި ދަތިތަކަކާ ކުރިމަތިލާން ޖެހިދާނެ އެވެ.

"ރޮއިޓާސް" ނޫހުން ރިޕޯޓުކޮށްފައިވާ ގޮތުގައި މިދިޔަ ބުރާސްފަތި ދުވަހުގެ ރޭ އިންޑިއާއިން ވަނީ އަންނަ އަހަރުގެ މާޗު މަހުގެ 31 ވަނަ ދުވަހާ ހަމައަށް ފިޔާ ބޭރުކުރުން މަނާކޮށް އަމުރެއް ނެރެފައެވެ.

އިންޑިއާއިން ފިޔާ އެކްސްޕޯޓު ކުރުން ހުއްޓުވުމުގެ ގޮތުން އެ ގައުމުން މީގެ ކުރިން ވަނީ 31 ޑިސެމްބަރު 2023 ގެ ނިޔަލަށް މެޓްރިކް ޓަނަކަށް 800 ޑޮލަރުގެ އެކްސްޕޯޓް އަގެއް ކަނޑައަޅާފައެވެ.

މިއަދުން ފެށިގެން އިންޑިއާއިން ފިޔާ އެކްސްޕޯޓް ކުރުން މަނާކޮށްފައިވާއިރު، މި އިއުލާނުގެ ކުރިން އުޅަނދުތަކަށް ފިޔާ ބަރުކުރުމުގެ މަސައްކަތް ފަށާފައިވާނަމަ، އަދި އިއުލާނުގެ ކުރިން ފިޔާގެ ބާވަތްތައް ކަސްޓަމްސްއާ ހަވާލުކުރެވި، އެ ތަކެތީގެ ސިސްޓަމްގައި ރަޖިސްޓްރީކޮށްފައިވާނަމަ ޖެނުއަރީ މަހުގެ ފަސް ވަނަ ދުވަހުގެ ނިޔަލަށް އެ ތަކެތި ބޭރު ކުރެވޭނެ ކަމަށް ބުނެފައި ވެއެވެ.

އަދި މީގެ ފަހުން ފިޔާ އެކްސްޕޯޓް ކުރުމުގެ ހުއްދަ ދޭނީ އެ ގައުމުތަކުގެ ސަރުކާރުގެ އެދުމުގެ މަތިން އިންޑިއާ ސަރުކާރުން އެހެން ގައުމުތަކަށް ދީފައިވާ ހުއްދައެއްގެ މައްޗަށް ބިނާކޮށް ކަަމަށް ބަޔާނުގައި ވެއެވެ.

މިދިޔަ ބުރާސްފަތި ދުވަހު އޯލް އިންޑިއާގައި އެވްރެޖްކޮށް ފިޔާ ކިލޯއެއްގެ އަގު ހުރީ 57.11 ރުޕީސްގައެވެ. މިއީ އޭގެ ކުރީ އަހަރާ އަޅާބަލާއިރު 97.95 ޕަސެންޓް އިތުރު އަދަދެއް ކަމަށް މީޑިއާ ރިޕޯޓްތައް ބުނެފައި ވެއެވެ.

މީގެ ކުރިން ސަރުކާރުން ވަނީ ގޮދަން ފުށާއި ބާސްމަތީ ނޫން ހުދު ހަނޑޫ އެކްސްޕޯޓް ކުރުން މަނާކޮށްފައެވެ.