ކުވައިތުގެ އަމީރު އަވަހާރަވުމާ ގުޅިގެން ދިވެހި ދިދަ ބައިދަނޑިއަށް ތިރިކުރަނީ

ކުވައިތުގެ އަމީރު ޝައިޚް ނަވާފް އަލް އަހްމަދު އަލް ޞަބާޙް އަވަހާރަވުމާ ގުޅިގެން، ތިން ދުވަސް ވަންދެން ދިވެހި ދިދަ ބައިދަނޑިއަށް ތިރިކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފިއެވެ.

Deeply saddened to hear about the passing away of Kuwait’s Amir Sheikh Nawaf Al-Ahmad Al-Jaber Al-Sabah. I extend my heartfelt condolences to his family and the people of Kuwait. Maldives will always remember Amir Sheihk Nawaf’s efforts in building and expanding the bilateral…

— Dr Mohamed Muizzu (@MMuizzu) December 16, 2023

ރައީސް ފޮނުއްވި ތައުޒިޔާގެ މެސެޖުގައި ކުވޭތުގެ އަމީރު އަވަހާރަވި ހަބަރު އެއްސެވީ ފުން ހިތާމައާއެކު ކަމުގައި ވިދާޅުވި އެވެ.

ކުވޭތުގެ އަމީރު އައްޝައިހް ނަވާފް އަކީ ދުރުވިސްނުން ގެންގުޅުއްވި، ސާބިތުކަމާއެކު އެ ގައުމާއި ރައްޔިތުންގެ ހައްގުގައި ހަރުދަނާ މަސައްކަތްތަކެއް ކޮށްދެއްވި އޯގާތެރި ހިދުމަތްތެރި ލީޑަރެއްގެ ގޮތުގައި ރައީސްގެ މެސެޖުގައި ސިފަކުރެއްވި އެވެ. އަދި އެ މަނިކުފާނުގެ ހިދުމަތުގެ ފޮނި މާޒީ ކުވޭތުގެ ކުރިއެރުމާއެކުއެކީގައި ހަނދުމަ އައުކުރެވިގެންދާނެ ކަމުގައިވެސް ވިދާޅުވި އެވެ.

ރައީސުލްޖުމްހޫރިއްޔާގެ މެސެޖުގައި ކުވޭތާއި ދިވެހިރާއްޖެއާއި ދެމެދު އޮތް ގާތް ގުޅުމަކީ ދެ ގައުމުގެ މެދުގައި އޮތް އިތުބާރާއި އިހްތިރާމާއި ސުލްހައާއި ތަމައްދުންގެ މައްޗަށް އެކުލެވިފައިވާ ވަރަށް އަޚްވަންތަ ގުޅުމެއް ކަމުގައި ވިދާޅުވި އެވެ.

މީގެއިތުރުން ދިވެހި ސަރުކާރާއި ރައްޔިތުންނާއި އެ މަނިކުފާނުވެސް، ކުވޭތުގެ ރައްޔިތުންނާއި އަމީރުގެ އާއިލާއަށް ލިބުނު ފުން ހިތާމައިގައި ބައިވެރިވެ ވަޑައިގަންނަވާކަން ފާހަގަކުރެއްވި އެވެ.

ކުވޭތުގެ އަމީރު އަވަހާރަވުމާ ގުޅިގެން މާދަމާ އިން ފެށިގެން ތިން ދުވަހަށް ދިވެހި ގައުމީ ދިދަ ބައިދަނޑިއަށް ތިރިކުރުމަށްވެސް ރައީސް ވަނީ ނިންމަވާފަ އެވެ.