ރޯދަމަހުގެ ފަހު ދިހައެއްގައި ސަަރުކާރު ބަންދުކުރަން ނިންމައިފި

ރޯދަ މަހުގެ ފަހު 10 ދުވަހަކީ ސަރުކާރު ބަންދު ދުވަސްތައް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފިއެވެ.

ވަޒީރުންގެ މަޖިލީހުން އިއްޔެ ނިންމި ކަންތައްތަކާ ގުޅޭ ގޮތުން މައުލޫމާތު ދެއްވަމުން ރައީސް އޮފީހުގެ ޗީފް ސްޕޯކްސްޕާސަން މުހައްމަދު ޝަހީބު ވިދާޅުވީ، އެގޮތަށް ނިންމަވާފައިވަނީ، އިސްލާމީ އުސޫލުތައް ގާއިމުކުރުމަށާއި ދީނީ ކަންތައްތަކަށް ރައްޔިތުންގެ ލޯބި ޖެއްސުމަށާއި ދީނީ ކަންކަމަށް އިސްކަން ދިނުމަށް ފުރުސަތު ދިނުމަށް ކަމަށެވެ.

ރަމަޟާންމަހުގެ ފަހު 10 ގެ ދުވަސްތަކަކީ، ސަރުކާރު ބަންދު ދުވަސްތަކެއްކަމުގައި ކަނޑައެޅުއްވުމަކީ ރައީސުލްޖުމްހޫރިއްޔާގެ ރިޔާސީ ވައުދުގެ ތެރޭގައި ހިމަނޭ މުހިންމު ކަމެކެވެ. މި ވައުދު ރައީސް ވެފައިވަނީ 30 އޮގަސްޓު 2023ގައި ބ. އޭދަފުށީގައި ބޭއްވުނު ޖަލްސާގައި ރިޔާސީ ކެމްޕެއިން ޖަލްސާާއެއްގަ އެވެ.

ރައީސް އޭދަފުށީގައި ދެއްކެވި ވާހަކަފުޅުގައި، ރޯދަމަހުގެ ފަހު 10 ދުވަސް ގްރޭޑް އަށަކުން ދަށުގެ ކުދިންނަށް ބަންދުވާނެ ކަމަށް ވެސް ވިދާޅުވިއެވެ.

ކޮންމެ ރޯދަ މަހަކު ވެސް ސަރުކާރު މުވައްޒަފުންނަށް މަސައްކަތް ކުރުމުގައި ލުއިތައްދެއެވެ. އެގޮތުން އާންމުކޮށް ސިވިލް ސާވަންޓުން މަސައްކަތް ކުރަން ޖެހެނީ ހަތަރު ގަޑިއިރަށެވެ.

ކަލަންޑަރުން ދައްކާ ގޮތުގައި އަންނަ އަހަރުގެ ރޯދަ މަސް ފެށޭނީ މާޗު މަހުގެ 11ގައެވެ.