އަންހެނުންނަށް ހާއްސަކޮށް 100 މިލިއަން ރުފިޔާގެ ލޯނު ދޫކުރަނީ

އަންހެނުންނަށް ހާއްސަކޮށްގެން ދޫކުރާ 100 މިލިއަން ރުފިޔާގެ ލޯންތައް ވަރަށް އަވަހަށް ދޫކުރަން ފަށާނެކަމަށް ޖެންޑަ، ފެމިލީ އެންޑް ސޯޝަލް ޑިވެލޮޕްމަންޓް މިނިސްޓަރު ޑރ. އައިޝަތު ޝިހާމް ރޭ ވިދާޅުވެއްޖެއެވެ.

ރޭ ބޭއްވި ހިޔަލަ ވީކެންޑް މާކެޓް ހުޅުވާ ދެއްވުމުގެ ރަސްމިއްޔާތުގައި ވާހަަކަދައްކަވަމުން ޑރ. އައިޝަތު ވިދާޅުވީ، އަންހެނުން ގޭގައި ތިބެގެން ހަދާ ތަކެތި ވިއްކުމާއި، މަގުފަހި ކުރުމަށްޓަކައި ހުޅުމާލެއިން ހާއްސަ ސަރަހައްދެއް، އެކަމަށް ކަނޑައަޅާ، އެތަނުގައި އަންހެން ވިޔަފާރި ވެރިންނަށް ކުޑަ ކުލިތަކެއްގައި ފަސޭހަ އިންތިޒާމްތަކެއް ހަަމަޖައްސާ ދެއްވުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެއް ކަމަށެވެ.

މި ވައުދު ފުއްދިގެން ދިއުމަކީ އަންހެން އުފެއްދުންތެރިންނަށާއި، ވިޔަފާރި ވެރިންނަށް ލިބުނު ވަަރަށް ބޮޑު ހިތްހަމަޖެހުމަކާއި، ހިތްވަރެއް ކަމަށް މިނިސްޓަރު ފާހަގަކުރެއްވިއެވެ.

ވީކެންޑް މާކެޓް ގެ މަގްސަދަކީ ދިވެހި އަންހެނުންނަކީ ފުދުންތެރި ބަޔަކަށް ހެދުމެވެ. މިއީ އަންހެން އުފެއްދުންތެރިންނަށް ވިޔަފާރިން މަންފާ ހޯދުމަށް ލިބޭ ފަހި ފުރުސަތެކެވެ. މިއީ ރައީސް ޑރ. މުއިއްޒުުގެ ހަފްތާ 14ގައި ހިމެނޭ ކަމެއްކަންވެސް ފާހަގަކޮށްލެވެއެވެ.

"މި ގޮތުން އަންހެނުންނަށް ޚާއްސަކުރެވިފައިވާ 100 މިލިއަން ރުފިޔާގެ ލޯނު ވަރަށް އަވަހަށް ދޫކުރަން ފަށާނެ. ހަަމައެއާއެކު ކުދި ވިޔަފާރިތަކަށް، ޚާއްސަކޮށް މާލީ އެހީތެރިކަން ފޯރުކޮށްދިނުމަށް ޚާއްސަ ލޯނެއް ވަރަށް އަވަހަށް ތައާރަފްކުރެވިގެންދާނެ،" މިނިސްޓަރު ވިދާޅުވިއެވެ.

މިނިސްޓަރު އައިޝަތު ވިދާޅުވީ، މިއީ އެންމެންނަށްވެސް ލިބިގެންދާނެ ފަހި ފުރުސަތަކަށް، ކުރިއެރުމަކަށް ވެގެން ދާނެ ކަމަށެވެ. އަދި މިއީ ފުދުންތެރިކަން އިތުރު ކުރެވޭނެ އާ މަގަކަަަށް ވެގެން ދާނެ ކަމަށްވެސް ވަޒީރު ވިދާޅުވިއެވެ.

"އެއްތަނަކުން، އެތައް އަންހެނުންނެއް އެތައް މަސައްކަތެއްގެ ތެރެއިން ބައްދަލުވެ، އެއް އަޒުމެއްގައި އެއް އަމާޒަކަށް މަސައްކަތް ކުރުމުގެ ފުރުސަތު ލިބިގެން ދިއުން، މިއީ ގިނަ އަންހެނުންތަކަކަށް ލިބޭ ބޮޑު ކުރިއެރުމަކަށް ވެގެން ދާނެ ކަން ޔަގީން". މިނިސްޓަރު ވިދާޅުވިއެވެ.

ކޮންމެ އަންހެނަކީ ވެސް ފުދުންތެރި އަންހެނަކަށްވުން މުހިންމު ކަމެއްކަން ފާހަގަކުރައްވައި މިނިސްޓަރު ވިދާޅުވީ ސަރުކާރުގެ އެންމެ މުހިންމު އެއް އަމާޒަކީ ވެސް އަންހެނުން ބާރުވެރިކުރުވުންކަމަށެވެ.

އެއީ އަންހެނުން ފުދުންތެރިކުރުވަންޖެހޭކަން ސަރުކާރުން ގަބޫލުކުރާ ސަބަބުކަމަށް ވެސް މިނިސްޓަރު ވިދާޅުވިއެވެ.

މިނިސްޓަރުވަނީ ރޭ ފަހިވި ފުރުސަތުތަކުގެ ބޭނުން ހިފުމަށް ހުރިހާ އަންހެނުންނަށް ވެސް ގޮވައިލައްވައިފައެވެ.