ނުކުޅެދުންތެރިކަން ހުންނަ މީހުންނާއި އުމުރުން ދުވަސްވީ މީހުންގެ ގައުމީ ދަފްތަރެއް އެކުލަވާލަނީ

ނުކުޅެދުންތެރިކަން ހުންނަ ފަރާތްތަކާއި، ދޮށީ އުމުރުގެ މީހުންގެ ގައުމީ ދަފުތަރެއް އެކުލަވައިލުމަށް ސާވޭއެއް ކުރުމަށާއި، ރާއްޖޭގައި ތަރައްގީގެ ސަރަހައްދުތަކާއި އާބަން ސެންޓަރުތައް ކަނޑައެޅުމަށް ބޭނުންވާ ސިޔާސަތުތައް އެކުލަވައިލުމަށް ވަޒީރުންގެ މަޖިލީހުގެ ލަފާއާއެކު ރައީސުލްޖުމްހޫރިއްޔާ ޑރ މުހައްމަދު މުއިއްޒު މިއަދު ނިންމަވައިފިއެވެ.

ރައީސް އޮފީހުގައި މިއަދު ބޭއްވުނު ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުﷲ ނާޒިމް އިބްރާހީމް ވިދާޅުވީ ކޮންމެ މުޖުތަމައުއެއްގައި ދޮށީ އުމުރުގެ ފަރާތްތަކާއި ހާއްސަ އެހީ އާއި އަޅާލުން ބޭނުންވާ ފަރާތްތަކަކީ މުޖުތަމައުގައި ބޭނުންތެރި ބައެއްކަން ފާހަގަކުރައްވަމުން ވިދާޅުވީ ގައުމެއް ކުރިއަރައިދާއިރު އެފަރާތްތަކަށް ސަމާލުކަން ދޭން ޖެހޭ ކަމަށެވެ.

ނާޒިމް ވިދާޅުވީ މިނިސްޓްރީ އޮފް ސިޓީސް އެން ލޯކަލް ގަވަރުމަންޓް އެންޑް ޕަބްލިކް ވޯކްސްގެ ބެލެނެވެރިކަމުގެ ދަށުން މުޅި ރާއްޖޭގައި މިހާރު ލިބިފައި ހުރި މައުލޫމާތު ތަރައްގީ ކުރުމަށް ނުވަތަ އިތުރަށް މައުލޫމާތު ހޯދައި ދެނެގަތުމަށްޓަކައި ސާވޭއެއް ކުރިޔަށް ގެންދަން ނިންމާފައިވާކަމަށެވެ.

ނާޒިމް ވިދާޅުވީ ނުކުޅެދުންތެރިކަން ހުންނަ ފަރާތްތަކާއި އުމުރުން ދޮށީ މީހުންގެ ދަފްތަރެއް އެކުލަވާލުމުގެ މަސައްކަތަކީ މިނިސްޓްރީ އޮފް ސިޓީސް އެން ލޯކަލް ގަވަރުމަންޓާއި މިނިސްޓްރީ އޮފް ސޯޝަލް އެންޑް ފެމެލީ ޑިވެލޮޕްމަންޓުން ގުޅިގެން ކުރިޔަށް ގެންދާ މަސައްކަތެއް ކަމަށެވެ. އެކަމަށް ބޭނުންވާ މައުލޫމާތު ހޯދުމަށް ސާވޭއެއް ކުރިޔަށް ގެންދާނެ ކަމަށްވެސް ނާޒިމް ވިދާޅުވިއެވެ.

"މި ސާވޭ ޕްލޭންކުރުމުގައި މިނިސްޓްރީ އޮފް ސިޓީސް އެން ލޯކަލް ގަވަރުމަންޓްގެ ފަރާތުން ދައުލަތުގެ ގުޅުން ހުރި ކަމާއި ބެހޭ އެހެން އިދާރާތައް ޝާމިލްކުރައްވައިގެން އެކުލަވާލެވޭ ޓެކްނިކަލް ޓީމަކުން މިމަސައްކަތް ކުރިޔަށް ގެންދަން ނިންމުނު." ނާޒިމް ވިދާޅުވިއެވެ.

ކުދި އާބާދީ ތަކާއި ބޮޑެތި އާބާދީތަކަށް ރިޔާއަތްކޮށްގެން ފަސޭހައިން އަވަހަށް މިކަން ކުރެވޭނޭ ނިޒާމެއް ކުރިޔަށް ގެންދަން ވަޒީރުންގެ މަޖިލީހުގައި މަޝްވަރާ ކުރެވުނު ކަމަށެވެ. މިގޮތުން އާބާދީގެ 1000 އަށްވުރެ މަދު ރަށްތަކުގައި ސާވޭ ކުރިޔަށް ގެންދާނީ ރަށުގެ ކައުންސިލްތަކުގެ އިރުޝާދާއެކު އެބޭފުޅުންގެ ފަރާތުން ކަމަށާއި ބޮޑެތި އާބާދީ އޮންނަ ރަށްތަކުގައި ވޮލަންޓިއަރުންގެ އެހީއެކު މި ސާވޭ ކުރިޔަށް ގެންދަން ނިންމާފައިވާ ކަމަށް ރައީސް އޮފީހުން ވަނީ ބުނެފަ އެވެ.

މި ސާވޭތަކުން އެއްކުރެވޭ މައުލޫމާތުގެ އަލީގައި ދައުލަތުގެ ނިޒާމުގެ ތެރެޔަށް މިހާރު ނުވަދެވި ހަވާސްވެފައިތިބި ދޮށީ އުމުރުގެ މީހުންނާއި ހާއްސައެހީއަށް ބޭނުންވާ ފަރާތްތައް ދެނެގަނެ އެންމެ ފުރަތަމަ މަރުހަލާގައި ދޭންޖެހޭ އެހީތެރިކަން ދެނެގަނެވި އެފަރާތްތަކަށް ބޭނުންވާ އެހީތެރިކަން މިނިސްޓްރީ އޮފް ސޯޝަލް އެންޑް ފެމެލީ ޑިވެލޮޕްމަންޓުން ފޯރުކޮށްދޭނެ ނިޒާމެއް ކަނޑައެޅިގެންދާނެ ކަމަށް ވަނީ ވިދާޅުވެފައެވެ.

މި މައުލޫމާތުތައް އެއްތަނަކުން ބަލައި ޓްރެކް ކުރެވޭނެ ސޮފްޓްވެއާއެއް އަޕްގްރޭޑް ކުރުމުގެ މަސައްކަތް މިނިސްޓްރީ އޮފް ސޯޝަލް އެންޑް ފެމެލީ ޑިވެލޮޕްމަންޓުން ކުރިޔަށް ގެންދާ ގޮތަށް ވަޒީރުންގެ މަޖިލީހުން ވަނީ ނިންމާފައެވެ. އަދި ހަމައެއާއެކު މިހާރުވެސް އެމައުލޫމާތު ބަލާލުމަށް އެކުލަވާލާފައިވާ "އިބަމަ" ނިޒާމު ހަރުދަނާ ކުރުމަށްވެސް ނިންމާފައިވާ ކަމަށް ނާޒިމް ވަނީ ވިދާޅުވެފައެވެ.

މިކަމާއި ގުޅޭ މަސައްކަތްތައް ކަމާއިބެހޭ އިދާރާތަކުން ކުރިޔަށް ގެންދާނެ ކަމަށް ރައީސް އޮފީިހުން ވަނީ ވިދާޅުވެފައެވެ.