ބާ ކައުންސިލްގެ ރައީސް ވިޝާމް އަވަހާރަވެއްޖެ

ބާ ކައުންސިލްގެ ރައީސް އަދި ކުރީގެ އެސިސްޓަންޓް އެޓާނީ ޖެނެރަލް އިސްމާއިލް ވިޝާމް މިރޭ އަވަހާރަ ވެއްޖެއެވެ.

އުމުރުން 39 އަހަރުގައި ވިޝާމް މިރޭ އަވަހާރަވީ ކުއްލި ގޮތަކަށް ކަމަށްވެ އެވެ.

ކުރިން އެސިސްޓެންޓް އެޓާނީ ޖެނަރަލްގެ މަގާމުވެސް ފުރުއްވާފައިވާ ވިޝާމް މަރުވެގެން ވެއްޓިފައި އޮތީ ދިރިއުޅުއްވާ ގޭތެރޭގައި ކަމަށް އެނގިފައިވެ އެވެ.

ވިޝާމް އަކީ ގާނޫނީ ފަންނުގެ ގާނޫނުގެ ދަށުން އެކުލަވާލާފައިވާ ބާ ކައުންސިލްގެ ދެވަނަ ދައުރުގެ ރައީސް އެވެ.

ބާ ކައުންސިލުގެ ރައީސްކަމަށް ކުޅަދާނަ ގާނޫނީ ވަކީލު، ވިޝާމް އައްޔަން ކުރީ 2022 ވަނަ އަހަރުގެ ޖޫން 12 ގަ އެވެ. އޭނާ ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި އެޓާނީ ޖެނެރަލްގެ ނައިބުކަން ވެސް ކުރެއްވި އެވެ.

ވިޝާމް އަކީ ކުޅިވަރުގައި ވެސް އެކި މަސައްކަތްތައް ކުރެއްވި ބޭފުޅެކެވެ. އެ ގޮތުން، މޯލްޑިވްސް އޮލިމްޕިކް ކޮމިޓީ އާއި ގުޅިގެން އެކި މަސައްކަތްތައް ކުރެއްވި އެވެ.

އޭގެ އިތުރުން، ވިޝާމް އަކީ ރާއްޖޭގެ އެންމެ މަޝްހޫރު ފުޓްބޯޅަ ކްލަބް ނިއު ރޭޑިއަންޓް ސްޕޯޓްސް ކްލަބާ އެކު ވެސް އެޑްމިނިސްޓްރޭޓިވް ކަންކަމާއި ގާނޫނީ މަސައްކަތްތަކެއް ކުރެއްވި ފަރާތެކެވެ. ނިއުގެ މެނޭޖަރެއްގެ ގޮތުގައި ވެސް ހިދުމަތްކުރި އެވެ.

ކުއްލި ގޮތަަކަށް ވިޝާމް ވަކިވެދިއުމުން، ގިނަ ފަރާތްތަކުން އަންނަނީ އޭނާގެ ހަނދާނުގައި ޝުއޫރު ފާޅުކުރަމުންނެވެ.