ހަފުތާ 14ގެ 78 އިންސައްތަ ފުއްދިއްޖެ: ރައީސް

ވެރިކަމުގެ ފުރަތަމަ 14 ހަފުތާ ތެރޭގައި ކުރަން ރޭވި އިތުރު 111 ވައުދުގެ 78 ޕަސަންޓް މިހާރު ފުދިފައިވާ ކަމަށާއި، ބާކީ އޮތް 111 ވައުދުވެސް 14 ހަފްތާ ނިމުމުގެ ކުރިން 100 ޕަސަންޓް ފުއްދާނެ ކަމުގައި ރައީސުލްޖުމްހުރިއްޔާ ޑރ މުހައްމަދު މުއިއްޒު ވިދާޅުވެއްޖެ އެވެ.

ރައްޔިތުންގެ މަޖިލީހުގައި މިއަދު ރިޔާސީ ބަޔާން އިއްވަވަމުން ރައީސް މުއިއްޒު ވިދާޅުވީ ވެރިކަމުގެ ފުރަތަމަ 100 ދުވަހުގެ ތެރޭގައި ފުއްދަން ކަނޑައަޅާފައިވާ ވައުދުތަކުގެ ތެރެއިން 50 ވައުދު ފުއްދަވާފައިވާ ކަމަށެވެ.

ރާއްޖެއަށް ދިމާވެފައިވާ ގިނަގުނަ މައްސަލަތަކާ، ރައްޔިތުންގެ އިހްސާސްތަކާ އުއްމީދުތަކާ ގުޅިފައިވާ ގިނަގުނަ ކަންކަން ހާސިލްކޮށްދިނުމަށް އެމަނިކުފާނު ވެފައިވާ ވައުދުތައް ފުއްދުމަށްޓަކައި ފުރަތަމަ 14 ހަފްތާގައި ވެރިކަމުގެ ފުރަތަމަ 100 ދުވަހު ފުއްދާނޭ ކަންކަން ފާހަގަކޮށް މަގުޗާޓެއް ވާނީ އެކުލަވާލާފައި ކަމަށެވެ.

"އެގޮތުން، ހަފުތާ 14 މަގުޗާޓުގައި ޖުމްލަ 161 ވައުދު ހިމެނިފައިވޭ. މިއަދާ ހަމައަށް 11 ހަފްތާ ނިމިފައިވާއިރު، ފުރަތަމަ ދުވަހު ފުއްދަން ކަނޑައެޅި ހަތް ވައުދާއި ހަތަރު ހަފްތާ ހަމަވުމުގެ ކުރިން ފުއްދަން ކަނޑައެޅި އިތުރު 17 ވައުދާއި 9 ހަފްތާ ހަމަވުމުގެ ކުރިން ފުއްދަން ކަނޑައެޅި އިތުރު 26 ވައުދާއިއެކު ޖުމްލަ 50 ވައުދު ވަނީ %100 ފުއްދިފައި." ރައީސް ވިދާޅުވި އެވެ.

އަދި 14 ހަފްތާ ނިމުމުގެ ކުރިން ފުއްދަން ކަނޑައެޅި އިތުރު 111 ވައުދުގެ %78 ފުއްދިފައިވާ ކަމަށާއި މި 111 ވައުދުވެސް 14 ހަފްތާ ނިމުމުގެ ކުރިން %100 ފުއްދޭނެ ކަމަށް ރައީސް ވިދާޅުވި އެވެ.

"މިފުރުސަތުގައި މި ވައުދުތައް ފުއްދުމަށް ކެނޑިނޭޅި ބުރަ މަސައްކަތް ކުރައްވަމުން ގެންދަވާ ކެބިނެޓުގެ އެއްމެހާ މެންބަރުންނަށާއި، ސަރުކާރުގެ އެކިއެކި ސިޔާސީ އަދި ސިވިލް ސާވިސް މަގާމުތަކުގައި ތިއްބެވި މުވައްޒަފުންނަށާއި ދައުލަތުގެ މުއައްސަސާތަކަށާއި، ދިވެހި ލޮބުވެތި އެންމެހާ ރައްޔިތުންނަށް ޝުކުރު ދަންނަވަން،" އެމަނިކުފާނު ވިދާޅުވި އެވެ.

ރައީސް އިތުރަށް ވިދާޅުވީ ސަރުކާރުން މިހާރު މަސައްކަތް ކުރަމުން ގެންދަނީ ބާކީ ހުރި ހުރިހާ ވައުދެއް ފުއްދާނޭ ގޮތުގެ ފަސް އަހަރު ދުވަހުގެ ސްޓްރެޓެޖިކް އެކްޝަން ޕްލޭނެއް އެކުލަވާލުމަށްޓަކައި ކަމާބެހޭ ފަންނީ މާހިރުންގެ ޓީމަކާ އެކު މަސައްކަތް ކުރަމުން ކަމަށެވެ. މިކަމަށް ޔޫއެންޑީޕީ އިން ދެއްވާ އެހީތެރި ކަމަށް ރައީސް ވަނީ ޝުކުރު އަދާކުރައްވާފަ އެވެ.