ރެޖިސްޓަރީ ނުކޮށް ކާޑު ލިބޭނެ ގޮތް ސަރުކާރުން ހަދަނީ

ކާޑުގެ ބާވަތްތަކުގެ ތެރެއިން ރަމަޟާން މަހާ ދިމާކޮށް ކޮންމެ ގެއަކަށް ސަރުކާރުން ހަދިޔާކުރާ ހަނޑުލާއި ފުށަށް ރަޖިސްޓްރީނުވެ ލިބޭނެ ގޮތެއް ހަމަޖައްސަވާނެ ކަމަށް، ލޯކަލް ގަވަމަންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.

އެކްސްގައި އާދަމް ޝަރީފު ކުރެއްވި ޕޯސްޓެއްގައި ވިދާޅުވީ ރެޖިސްޓަރީ ނުވެ މާލޭގެ ގޭބިސީތަކަށް ވެސް ކާޑު ލިބޭނެ ގޮތެއް ހަމަޖައްސަވާނެ ކަމަށެވެ.

ސަރުކާރުން ހިލޭ ބަހަން ނިންމާފައިވާ ކާޑާ ގުޅިގެން އާންމުންގެ ކަންބޮޑުވުން ފާޅުކުރަން ފެށީ ހިލޭ ކާޑު ބޭނުންވާ މީހުން ރެޖިސްޓަރީ ވާން އަންނަ ހޯމަ ދުވަހު ހުޅުވާލަން މާލޭ ސިޓީ ކައުންސިލުން ތައްޔާރުވަމުން ދާކަމަށް އެ ކައުންސިލުން ބުނުމާ ގުޅިގެންނެވެ.

ކާޑު ބޭނުންވާ މީހުން ރެޖިސްޓަރީ ވާންޖެހޭ ގޮތަށް ހަމަޖައްސަން އުޅުނު ނަމަވެސް ޗައިނާއަށް ކުރެއްވި ދަތުރުފުޅު ނިންމަވައިލެއްވުމަށްފަހު ރާއްޖެ ވަޑައިގެން ރައީސް ޑރ. މުހައްމަދު މުއިއްޒު ދެއްކެވި ވާހަކަފުޅުގައި ވައުދުވެވަޑައިގެންނެވީ އަންނަ ރޯދަމަހު ރާއްޖޭގެ ހުރިހާ ގޭބިސީއަކަށް 10 ކިލޯގެ މަގުން ހަނޑުލާއި ފުށް ދެއްވާނެ ކަމަށެވެ.

Handulaai fuh beynunvaa faraaiythakun registry vaan jehidhaanethee kanboduvun faalhukuramundhaathee dhannavan!
Registry nuve, e thakethi Greater Male' ge geybiseethakah ves libeyne gotheh hamajassaanan. https://t.co/Xa4RsO0lq1

— Adam Shareef Umar (@Adamshareefz) February 9, 2024

އޭގެ ކުރިން އެ މަނިކުފާނު ވިދާޅުވީ، ހަނޑޫ، ހަކުރު، ފުށް ފަދަ ޒަރޫރީ ތަކެތި ގެނައުމުގައި އެއް ގައުމަކަށް ބަރޯސާވުމުގެ ބަދަލުގައި އެހެން ގައުމުތަކުން ވެސް އެ ތަކެތި ގެންނަން މަސައްކަތްކުރަމުން އަންނަ ކަމަށެވެ.

އެގޮތުން، ތުރުކީއާ އެކު މިހާރު އެއްބަސްވެ، ފުރަތަމަ ޝިޕްމަންޓަށް އޯޑަރު ދީފައިވާނެ ކަމަށް އެ މަނިކުފާނު ވިދާޅުވިއެވެ.

"އަދި ދަންނަވަންތޯ ލިބޭގޮތަށް ހަމައެކަނި ހަމަޖެއްސީއެއް ނޫން. މި ރޯދަ މަހު ފުރަތަމަ ފަހަރަށް ކޮންމެ ގޭބީސީއަކަށް ހިލޭ ދިވެހި ސަރުކާރުގެ ފަރާތުން 10 ކިލޯގެ ހަނޑޫ ބަސްތާއަކައި 10 ކިލޯގެ ފުށް ބަސްތާއެއް ހަދިޔާކުރާނަން،" އެ މަނިކުފާނު ވިދާޅުވިއެވެ.

ރައީސް ވިދާޅުވީ، އަމާޒަކީ އަންނަ އަހަރު އެ އަދަދު އެއަށް ވުރެ އިތުރުކުރުން ކަމަށެވެ.