ޕީޓީއޭއިން ހދ އޭއީސީގެ ކޮމްޕިއުޓާ ލެބަށް 20 ކޮމްޕިއުޓާ ސިސްޓަމް ހަދިޔާކޮށްފި

ހދ އަތޮޅު ތައުލީމީ މަރުކަޒުގެ ޕީޓީއޭގެ ފަރާތުން އެސްކޫލުގެ ކޮމްޕިއުޓާ ލެބަށް 20 ކޮމްޕިއުޓާ ސިސްޓަމް ހަދިޔާކޮށްފި އެވެ.

އެސްކޫލުގެ 45 ވަނަ އަހަރީ ދުވަހުގެ މުނާސަބާއާ ގުޅުވައިގެން ބޭއްވި ހާއްސަ އެސެމްބްލީގައި ޕީޓީއޭއިން ހޯދި 20 ކޮމްޕިއުޓާ ސިސްޓަމް ސްކޫލާ ވަނީ ހަވާލުކޮށްދީފަ އެވެ.

ހދ އޭއީސީގެ ކޮމްޕިއުޓާ ލެބަކީ ދުވަސްވީ ލެބެކެވެ. އެހެންވުމުން އެތަނުގައި ބޭނުންކުރާ ގިނަ ކޮމްޕިއުޓަރުތައް ހަލާކުވެފައި ހުންނަތާ އަހަރަކަށްވުރެ ގިނަ ދުވަސްވަނީ ވެފަ އެވެ.

އެ ސްކޫލްގެ ޕްރިންސިޕަލް މުހައްމަދު މަތީން ވިދާޅުވީ، ދަރިވަރުންގެ ކުރިއެރުމަށް ޕީޓީއޭއިން ކުރާ ބުރަ މަސައްކަތް ފާހަގަކޮށް ޝުކުރު ދަންނަވާފަ އެވެ. އަދި އެ ސްކޫލްގެ ޕީޓީއޭއަކީ ނަމޫނާ ޕީޓީއޭގެ ގޮތުގައި މަތީން ފާހަގަކުރެއްވި އެވެ.

އެ ސްކޫލްގެ ކޮމްޕިއުޓާ ލެބަށް އެމްޕީއެލުންވެސް 9 ކޮމްޕިއުޓާ ސިސްޓަމް ވަނީ ހަދިޔާކުރަން ނިންމާފަ އެވެ.