އެއްވެސް ގައުމެއްގެ ސިފައިން ދާއީމީކޮށް ގާއިމްވެ ތިބެން ދިވެހި ސަރުކާރުން ދެކޮޅު: ޣައްސާން

ދޭދޭ ގައުމުތަކާއެކު ރާއްޖެއިން ދިފާއީ ގުޅުން ގާއިމްކުރިނަމަވެސް އެއްވެސް ގައުމެއްގެ ސިފައިން ދާއީމީކޮށް ގާއިމްވެ ތިބެން ދިވެހި ސަރުކާރުން ދެކޮޅުކަމަށް ޑިފެންސް މިނިސްޓަރު މުހައްމަދު ޣައްސާން މައުމޫނު ވިދާޅުވެއްޖެއެވެ.

އައިއައިއެސްއެސް ޝަންގްރިއްލާ ޑައިލޮގަކީ އޭޝިއާގެ ޕްރިމިއާ ޑިފެންސް ސަމިޓެކެވެ. އެއީ މި ސަރަހައްދުގެ އެންމެ ބޮޑު ސަލާމަތީ ގޮންޖެހުންތަކާ މެދު ވަޒީރުން ބަހުސްކޮށް، ޤައުމުތަކުގެ މުހިންމު މަޝްވަރާތަކުގައި ބައިވެރިވެވަޑައިގަންނަވާ ބައްދަލުވުމެކެވެ.

31 މެއި–2 ޖޫންއަށް ސިންގަޕޫރުގައި ކުރިއަށްދާ ސިންގަޕޫރުގެ އިންޓަނޭޝަނަލް އިންސްޓިއުޓް ފޯ ސްޓްރެޓެޖިކް ސްޓަޑީސްގެ ފަރާތުން ބޭއްވި "ޝަންގްރިލާ ޑައިލޮގް 2024″ގައި ވާހަކަފުޅު ދައްކަވަމުން، ޣައްސާން މައުމޫންގެ ވާހަކަފުޅުގައި، ރާއްޖޭގެ ސުލްހައާއި، ހަމަޖެހުމާއި، ސަލާމަތާއި، ރައްކާތެރިކަން ގާއިމްކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަސާސީ އަސާސްތަކުގައި އެންމެ އިސްކަންދެއްވަނީ، ދިވެހިރާއްޖޭގެ އަމިއްލަ ދިފާއީ ބާރުތަކުގެ ކެޕޭސިޓީ އިތުރުކުރުމަށާއި ދުނިޔެ ޤަބޫލުކުރާ މިންގަނޑުތައް ރާއްޖޭގެ ސަރަހައްދުގައި ކަށަވަރުކުރުންކަމަށެވެ. އެގޮތުން މިހާރުގެ ގުޅުންތައް ދެމެހެއްޓައި، އިތުރު ގުޅުތައް ޤާއިމްކުރެއްވުމަށްވެސް ރައީސް އިސްކަންދެއްވާކަމަށް ވަޒީރު ވިދާޅުވިއެވެ.

“For the Maldives, defence cooperation does not, and must not, involve a permanent foreign military presence on our soil. It is our hope, that our friends and partners will respect this democratic decision of the people”: Min. @mgmaumoon speaks at #SLD24 Special Session @IISS… pic.twitter.com/X4ezN1j9im

— Ministry of Defence (@MoDmv) May 31, 2024

ދިވެހި އަސްކަރިއްޔާގެ ފެންވަރު ރަނގަޅު ކުރައްވާ، ކަނޑުގެ ޓެރަރިޒަމް އަމަލުތަކާއި، ނަހަމަގޮތުގައި ގާނޫނީ ވަސީލަތްތައް ބޭނުންކުރުމާއި، މޫސުމީ ބަދަލުތަކުގެ ސަބަބުން ކުރިމަތިވެދާނެ ނުރައްކާތެރިކަމަކުން ސަލާމަތްވެ، ރައްކާތެރިވުމުގެ ގާބިލުކަން އިތުރުކުރެއްވުމަށްވެސް ރައީސް އިސްކަންދެއްވާ ކަމަށާއި، ދިވެހިރާއްޖެ އޮންނަ ސަރަހައްދުގެ ގޮތުން، ބައިނަލްއަގުވާމީ ޒިންމާތަކެއް އުފުލަންޖެހޭކަމަށާއި، އިންޑިއާ ކަނޑުގައި ވިޔަފާރީގެ ދަތުރުތައްކުރާ ފަރާތްތަކުގެ ރައްކާތެރިކުރުމުގެ ޒިންމާ ރާއްޖެއިން އުފުލަން ޖެހިފައިވާކަމަށް ވަޒީރު ވިދާޅުވިއެވެ.

ރާއްޖެފަދަ ކުދި ގައުމުތަކުން، މިނިވަންކަމުގެ އެންމެ ބޮޑު ޔަގީންކަމެއްގެ ގޮތުގައި ބަލާފައިވަނީ ބައިނަލްއަގުވާމީ ގާނޫނުތައް ކަމަށާއި، ނަމަވެސް ބައެއްގައުމުތަކުން އެ އަގު ކުރުންތައް ދޫކޮށްލުމަކީ ކުދި ގައުމުތަކުގެ ރައްކާތެރިކަމާއި ސަލާމަތަށް އޮތް ކަމަށް ޣައްސާން ވިދާޅުވިއެވެ.

އެހެންކަމުން އެ ގޮންޖެހުންތަކުން އަރައިގަތުމަށް ކުދި ގައުމުތަކުން ހަރުދަނާ ގުޅުންތައްކެއް އުފައްދަންޖެހޭކަމަށް ޣައްސާން ވިދާޅުވިއެވެ. އެއީ ކުދި ގައުމުތަކާއި، ކުދި ގައުމުތަކުގެ ބޭރުންވެސް އުފައްދަން ޖެހޭ ގުޅުންތަކެއްކަމަށް ވަޒީރު ވިދާޅުވިއެވެ.

ރައީސް ޑރ. މުޙައްމަދު މުޢިއްޒުގެ ސިޔާސަތުގައި ދިފާއީ ގާބިލުކަން އިތުރުކޮށް ރާއްޖޭގެ ވަށައިގެންވާ ކަނޑުގެ ސަރަހައްދުގެ ރައްކާތެރިކަން ކަށަވަރުކުރުމުގައި އިސްކަންދެއްވާކަމަށާއި، ދިފާއީ ގުޅުންތައް ވަރުގަދަކުރިނަމަވެސް އެއްވެސް މާނައެއްގައި ދިވެހި ބިމުގައި ބޭރުގެ ސިފައިން ގާއިމްވެ ތިބުމަށް ދިވެހި ސަރުކާރުން ބޭނުން ނުވާކަމަށް ވަޒީރު ވިދާޅުވިއެވެ. އަދި އެކަމަށް އިހުތިރާމުކުުރުމަށް ވަޒީރު އެދިވަޑައިގެންނެވިއެވެ.