މޭޔަރުންނާއި ކައުންސިލަރުންނަށް ޑިޕްލޮމެޓިކް ޕާސްޕޯޓު ދޭން މަޝްވަރާކުރަނީ

މޭޔަރުންނާއި ކައުންސިލަރުންނަށް ޑިޕްލޮމެޓިކް ނުވަތަ އޮފިޝަލް ޕާސްޕޯޓް ދިނުމަށް އިމިގްރޭޝަނާއެކު މަޝްވަރާކުރާ ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.

މިނިސްޓަރު އެކްސްގައި ކުރައްވާފައިވާ ޕޯސްޓެއްގައި ވަނީ މިގޮތަށް މަޝްވަރާކޮށްފައިވަނީ ކައުއުންސިލަރުންނަށް އޮފިޝަލް ނުވަތަ ޑިޕޮލޮމެޓިކް ޕާސްޕޯޓު ލިބޭނެގޮތެއް އޮތްތޯ ބެލުމަށް ތިނަދޫ ސިޓީކައުންސިލުން އެލްޖީއޭއަށް ހުށަހެޅުމާއި ގުޅިގެކަމަށެވެ.

މިއަދު ބޭއްވި LGA ގެ ބޯޑު ބައްދަލުވުމުގައި ސިޓީ ކައުންސިލްގެ މޭޔަރުންނާއި އަތޮޅު އަދި ރަށު ކައުންސިލްގެ ރައީސާއި މެންބަރުންނަށް ޑިޕްލޮމެޓިކް ޕާސްޕޯޓް ނުވަތަ އޮފިޝަލް ޕާސްޕޯޓް ދިނުމާމެދު ގޮތެއް ހޯދުމަށް އިމިގްރޭޝަނާ އެކުގައި މަސައްކަތް ކުރުމަށް މަޝްވަރާ ކުރެވުނު.

— Adam Shareef Umar (@Adamshareefz) July 15, 2024

ޝަރީފް ވިދާޅުވީ މޭޔަރުންނާއި އަތޮޅު އަދި ރަށު ކައުންސިލްތަކުގެ ރައީސުންނާއި މެމްބަރުންނަށް ޑިޕްލޮމެޓިކް ނުވަތަ އޮފިޝަލް ޕާސްޕޯޓު ލިބޭނެ ގޮތްތައް ހެދުމަށް އިމިގްރޭޝަނާ ގުޅިގެން މަސައްކަތް ކުރުމަށް މަޝްވަރާކުރެއްވިކަމަށެވެ. މިގޮތަށް މަޝްވަރާކުރީ އިއްޔެ ބޭއްވި ލޯކަލް ގަވަމަންޓު އޮތޯރިޓީ، އެލްޖީއޭގެ ބޯޑު ބައްދަލުވުމުގައެވެ.

ކައުންސިލަރުންނަށް އޮފިޝަލް ނުވަތަ ޑިޕްލޮމެޓިކް ޕާސްޕޯޓު ހޯދައި ދިނުމުގެ ބޭނުމަކީ ކައުންސިލްތައް ބާރުވެރި ކުރުވުމާއި އަދި އެ ކައުންސިލަރުންނަކީވެސް ރައްޔިތުން އިންތިހާބުކުރާ ބަޔަކަށްވާތީ އެ ބޭފުޅުންނަށް ހައްގު ދަރަޖަ ދިނުމުގެ ގޮތުންކަމަށް އެލްޖީއޭއިން ވިދާޅުވެއެވެ.

ޑިޕްލޮމެޓިކް ޕާސްޕޯޓް މިހާރު ލިބެނީ ދައުލަތުގެ ތިން ބާރުގެ ވެރިންނާއި ސުޕްރީމް ކޯޓާއި ހައި ކޯޓުގެ ފަނޑިޔާރުންނާއި ދަށު ކޯޓުތަކުގެ އިސް ފަނޑިޔާރުންނާއި ވަޒީރުންނާއި ސްޓޭޓް މިނިސްޓަރުންނަށެވެ. އަދި އެ ފެންވަރުގެ މަގާމުތަކާއި މިނިވަން މުއައްސަސާތަކުގެ މެމްބަރުން އަދި ރައްޔިތުންގެ މަޖިލީހުގެ މެމްބަރުންނަށާއި ސަލާމަތީ ބާރުތަކުގެ އެންމެ އިސްވެރިންނާއި އެ ބޭފުޅުންގެ އަނބިން ހިމެނެއެވެ.