މަޖިލީސް މެންބަރުންނާއެކު ފުރާ އެންމެންނަށް ވީއައިޕީ ނުދޭން ފާސްކޮށްފި

މަޖިލީހުގެ މެންބަރުންނާ އެކު ފުރާ ހުރިހާ އެންމެންނަށް ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ ވީއައިޕީ ލައުންޖުން ހިދުމަތްދޭ ގޮތަށް ފާސްކުރުމަށް ފަހު، ރޭ އެ މައްސަލަ ކޮމިޓީން ބޭރުކޮށްލައިފިއެވެ.

މީގެ ކުރީން އަމަލު ކުރަމުން އައިސްފައިވާ ގޮތުން، މަޖިލިސް މެންބަރާއި، އޭނާގެ އަނބިކަނބަލުން ނުވަތަ ފިރިކަލުންނާއި ދަރީންގެ އިތުރުން މައިންބަފައިންނަށް ވެސް ވީއައިއޭގެ ވީއައިޕީ ލައުންޖުން ހިދުމަތްދެއެެވެ. އެ ހިދުމަތަށްވާ ބިލު މަޖިލީހުން ދައްކަންޖެހޭއިރު، މިއީ ވަރަށް ކުރީއްސުރެން އަމަލު ކުރަމުން އައިސްފައިވާ އުސޫލެކެވެ.

ނަމަވެސް ނިމިދިޔަ 19ވަނަ ރައްޔިތުންގެ މަޖިލީހުގެ އާންމު ކޮމިޓީން ފާސްކޮށްފައި އޮތީ، މަޖިލިސް މެންބަރުންނާ އެކު ފުރާ ހުރިހާ އެންމެންނަށް ވީއައިއޭގެ ވީއައިޕީ ލައުންޖުން ހިދުމަތް ދިނުމަށެވެ.

މިއަދު ބޭއްވި އާންމު ކޮމިޓީގައި އެ އުސޫލު ފާސްކުރީ 19ވަނަ މަޖިލީހުން އެ ގޮތަށް ފާސްކޮށްފައިވާތީއެވެ.

ގައުމުގެ އިގްތިސާދީ ހާލަތު މިހާރު އޮތް ގޮތުން، ރޭ އާންމު ކޮމިޓީގެ ބައްދަލުވުމެއް ބޭއްވީ އެ ނިންމުން މުރާޖައާ ކުރުމަށެވެ.

ރޭގެ ކޮމިޓީ ބައްދަލުވުމުގައި ފޭދޫ ދެކުނު ދާއިރާގެ މެންބަރު އިބްރާހީމް ވަނީ، މަޖިލިސް ރައީސްގެ ލަފާފުޅުގެ މަތިން، 19ވަނަ ރައްޔިތުންގެ މަޖިލީހުން ހުށަހަޅާފައިވާ ހުށަހެޅުން ބާތިލުކޮށް، 18ވަނަ މަޖިލީހުގައި އެ ކަން ކުރަމުން އައި ގޮތަށް ބަދަލު ކުރުމަށް ހުށަހަޅުއްވާފައެވެ. އަދި އިސްލާހު އޮތް ގޮތަށް ނުބާއްވައި، އެ މައްސަލަ ބޭރުކޮށްލުމަށް އޭނާ ހުށަހެޅުއްވިއެވެ. އެ ހުށަހެޅުމަށް ތާއީދު ކުރެއްވީ ތިމަރަފުށީ ދާއިރާގެ މެންބަރު އަހުމަދު ރިޔާޒެވެ.

މަޖިލިސް މެންބަރުންނާ އެކު ފުރާ އެންމެނަށް ވީއައިއޭގެ ވީއައިޕީ ލައުންޖުން ހިދުމަތް ދޭގޮތަށް 19ވަނަ މަޖިލީހުން ފާސްކުރީ މެންބަރުންނަށް ލިބިދޭ އިމްތިޔާޒުގެ ދަށުންނެވެ.

އިއްޔެ ނިންމި ނިންމުން ބާތިލުކޮށް، އެ މައްސަލަ ކޮމިޓީން ބޭރުކޮށްލައި، ކޮމިޓީން ރޭ ފާސްކުރީ 2020ވަނަ އަހަރު އަމަލު ކުރަމުން އައި ގޮތަށް މެންބަރުންނާއި މެންބަރުންގެ އާއިލާއަށް އެކަނި ވީއައިޕީ ލައުންޖުން ހިދުމަތް ލިބޭ ގޮތަށެވެ.

ވެލާނާ އިންޓަނޭޝަނަލް އެއާޕޯޓުގެ ވީއައިޕީ ލޯންޖުން މެންބަރުންގެ އާޢިލާ އަދި ރައްޓެހިންނަށް 2021 ވަނަ އަހަރު ރިކޯޑް އަދަދަކަށް ޚަރަދުކޮށްފައިވާކަން ވަނީ ހިސާބުތަކުން ދައްކާފައެވެ.