ކުލަބު ތިލަދުންމަތި އިން ޒިގްޒެގް މޮޅުވިޔަނުދީ ހިފަހައްޓާލައިފި

ކުޅުދުއްފުށީ ޗެމްޕިއަންޝިޕްގެ އެންމެފަހުގެ ޗެމްޕިއަން ޒިގްޒެގް ފޯ ޔޫތް ލިންކޭޖާއި ނޮޅިވަރަމް، ކުލަބު ތިލަދުންމަތި ބައްދަލުކުރި މެޗް އެއްވަރު ވެއްޖެއެވެ. ދެ ޓީމުގެވެސް ގިނަ އަދަދެއްގެ ސަޕޯޓަރުން ކުރިމަތީގައި ކުޅުނު މިމެޗް އެއްވަރުވީ 2 - 2 އަކުންނެވެ.

ދެޓީމުގެ ފަރާތުން ވެސް ފޯރިގަދަ ކުޅުމެއް ފެނިގެން ދިޔަ މިމެޗުގައި ފުރަތަމަ ލަނޑު ޖަހާ ލީޑް ނެގީ ކުލަބް ތިލަދުންމަތިންނެވެ. ތިލަދުންމަތިން ވަނީ މެޗު ފެށިގެން 4 މިނެޓު ތެރޭ ލީޑު ނަގާ ޒިގްޒެގް ޕްރެޝަރަށް ވައްޓާލާފަ އެވެ. މިލަނޑު ކާމިޔާބުކޮށްދިނީ އެޓީމުގެ ޒުވާން ފޯވާޑް ސާލިމް މުހައްމަދު (ލިމޭ) އެވެ.

މިލަނޑާއެކު ޒިގްޒެގް ޓީމުން ވަނީ މެޗުގެ ކޮންޓްރޯލް ނަގާ ކުޅުން ވަރުގަދަކޮށްފަ އެވެ. އެގޮތުން މެޗުގެ 19 ވަނަ މިނެޓުގައި އެޓީމުގެ ބިދޭސީ ފޯވާޑް ޕްރިންސް ބޯޑު ޒިގްޒެގަށް ނަތީޖާ ހަމަހަމަ ކޮށްދީ ޓީމަށް ހަމަޖެހުމެއް ގެނެސްދީފަ އެވެ.

މުޅި މެޗުގައި ވެސް މޮޅުކުޅުމެއް ދެއްކި ޕްރިންސް ބޯޑު ވަނީ މެޗުގެ ނަތީޖާ ފުރަތަަމަ ހާފު ނިމުމުގެ ކުރިން އަނބުރާލާފަ އެވެ. އެގޮތުން ފުރަތަަމަ ހާފުގެ އިތުރު ވަގުތުގައި ލަނޑެއް ކާމިޔާބުކޮށް ޒިގްޒެގުން ފަހަތުން އަރާ ލީޑު ނެގި އެވެ.

ނަމަވެސް ލީޑުގައި އޮވެ ދެވަނަ ހާފަށް ނުކުތް ޒިގްޒެގަށް ނަތީޖާ ހިފަހައްޓާލެވުނީ ހިނދުކޮޅަކަށެވެ. ދެވަނަ ހާފު ފެށިތާ ތިން ވަރަކަށް މިނެޓު ތެރޭ ތިލަދުންމަތިން ވަނީ ނަތީޖާ އެއްވަރުކޮށްފަ އެވެ. މިލަނޑަކީ އެޓީމުގެ ތަޖުރިބާކާރު ކުޅުންތެރިޔާ މާއްދު އަދުނާން ކާމިޔާބު ކުރި ލަނޑެކެވެ.

ދެވަނަ ހާފު ވެސް ފޯރިގަދަ ކުޅުމެއް ފެނިގެންދިޔައިރު ގޯލްޖަހާނެ ރަނގަޅު ފުރުސަތުތައް ދެޓީމަށް ވެސް ލިބުނެވެ. ނަމަވެސް ލަނޑެއް ކާމިޔާބުކުރެވޭ ގޮތެއްނުވި އެވެ. ދެވަނަ ހާފުގެ 56 ވަނަ މިނެޓުގައި ޒިގްޒެގަށް ލީޑު ފުޅާކުރަން ރަނުގެ ފުރުސަތެއް ލިބުނެވެ. ނަމަވެސް ޕްރިންސް ބޯޑު ފޮނުވާލި ޕެނަލްޓީ ކާމިޔާބު ނުކުރެވުނެވެ.

މިމެޗުގެ މޮޅުކުޅުންތެރިއަކަށް ހޮވިފައިވަނީ ޒިގްޒެގްގެ ބިދޭސީ ފޯވާޑް ޕްރިންސް ބޯޑު އެވެ. މެޗުގައި ބޯޑުގެ ފަރާތުން މޮޅުކުޅުމެއް ފެނުނު އިރު ތިލަދުންމަތީގެ ލިމޭއާއި މާއްދުގެ ކުޅުން ވެސް ފާހަގަކޮށްލެވެ އެވެ. މިމެޗު އެއްވަރުކޮށް ތިލަދުންމަތިން މިވަނީ އެންމެ ފަހުގެ ޗެމްޕިއަނުން ހިފަހައްޓާލާ ރަނގަޅު ކުޅުމަކުން މުބާރާތް ފަށާފަ އެވެ.

މިމުބާރާތުގައި މާދަމާ ކުޅުމަށް ހަމަޖެހިފައިވާ މެޗުގައި ބައްދަލުކުރާނީ މާއްޓޭ ސްޕޯޓްސް އާއި ހަނިމާދޫ ޒުވާނުންގެ ޖަމިއްޔާ އެވެ. މިމެޗު ވެސް ފަށާނީ މާދަމާގެ ހަވީރު 4 ޖަހާއިރު އެވެ.