ޒުވާނުންނަށް ހުރިހާ ކަމެއްގަ ބަސް ބުނެވޭނެ: ރައީސް

ރާއްޖޭގެ އެންމެ ބޮޑު އިންސައްތައެއް ހިއްސާކުރާ ބަޔަކީ ޒުވާނުން ކަމަށާއި ޒުވާނުންގެ ބޯޑެއް އޮތުމަކީ ގައުމުގެ ކުރިއެރުމަށް ލިބޭ ބޮޑު ފަސޭހައެއް ކަމަށް ރައީސުލްޖުމްހުރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

"ދިވެހި ޒުވާނުންގެ ލަފާދޭ ކޮމިޓީ" އިފްތިތާހުކޮށް ދެއްވުމަށް ރައީސް އޮފީހުގައި އިއްޔެ ބޭއްވި ރަސްމިއްޔާތަށް ފަހު، އެ ކޮމިޓީގެ މެމްބަރުންނާ ބައްދަލު ކުރައްވައި ރައީސް ވިދާޅުވީ ޒުވާނުންގެ ފަރާތުން ދައުލަތް ހިންގުމުގައި، އަދި އެހެނިހެން ކަންކަން ބައްޓަން ކުރުމުގައި ބަސް އިއްވަން އަދި އެމަނިކުފާނަށް ލަފާ ދެއްވާނެ ކޮމިޓީއެއް އުފެދިގެން އައުމަކީ ރައީސް ވަރަށް އުފާފުޅު ކުރައްވާ ކަމަށެވެ.

ރައީސް ވިދާޅުވީ މި ބޯޑްގައި ތިއްބެވި މެމްބަރުންނަށް ހުރިހާ ކަމެއްގައިވެސް އަޑު އުފުލާ ވާހަކަ ދެއްކޭނެ ކަމަށާއި ވަކި ލިމިޓެއް ނޯންނާނެ ކަމަށެވެ. އަދި އެމަނިކުފާނުގެ ގާނޫނީ ޒިންމާ އަދާ ކުރުމުގައިވެސް ލަފާ އެރުވޭނެ ކަމަށާއި ބޯޑުގެ މެމްބަރުންގެ އިސްނަނަގަވައިގެން ލަފާ ދިނުމުގެ ފުރުސަތު ވެސް އޮންނާނެ ކަމަށް ވިދާޅުވިއެވެ.

"ޒުވާނުންނަށް އެއްވެސް ކަހަލަ ލިމިޓެއް ވަކި ކަމެއްގައި ބަސް ނުބުނެވޭނެކަހަލަ ކަމެއް ނޯންނަގޮތަށް ދައުލަތުގެ ހުރިހާ ކަމެއްގައި ދިވެހިރާއްޖޭގެ އިމުގެ ތެރޭގައި ހިނގާ ކޮންމެ ކަމެއްގައިވެސް އަޅުގަނޑުގެ ޤާނޫނީ ޒިންމާ އަދާކުރުމުގައި ތިބޭފުޅުންނަށް ލަފާދެއްވޭނެ. އަޅުގަނޑު އެދިގެން ކަމެއް ކުރުމަށްވުރެ ބޮޑަށް ތިބޭފުޅުން އަޅުގަނޑު ގާތުގައި ކަންކަން ކުރަން ތިބޭފުޅުންނަށް ފެންނަ އެންމެ ރަނގަޅު ގޮތެއް ވިދާޅުވުމުގެ ފުރުސަތު މިއޮތީ." ރައީސް ވިދާޅުވިއެވެ.

ގައުމަށްޓަކައި އިހުލާސްތެރި މަސައްކަތްތަކެއް ކޮށްދެއްވުމަށް ރައީސް ވަނީ ޒުވާނުންގެ ބޯޑަށް އިލްތިމާސް ކުރައްވައިފައެވެ. ހަމައެއާއެކު ގާނޫނޫތައް އިސްލާހު ކުރެވިގެން އަންނަ އިރު ޒުވާނުންގެ ބަހެއް އޮންނަން ވާނެ ކަމަށް ރައީސް ވަނީ ވިދާޅުވެފައެވެ.

މީގެއިތުރުން މިނިސްޓްރީތަކުން ވެސް ކުރާ ބޮޑެތި މަސައްކަތްތަކަަށް ވެސް ޒުވާނުން ލަފާ އަރުވާ ބޯޑެއް އޮތުމުން ވަރަށް ބޮޑެތި ފަސޭހަތަކެއް ލިބިގެންދާނެ ކަމަށް ރައީސް ވިދާޅުވިއެވެ. އަދި ހާއްސަކޮށް ޒުވާނުންގެ މިނިސްޓްރީން ކުރައްވާ ކަންތައްތަކަށް ބޮޑެތި ފަސޭހަތަކެއް ލިބިގެންދާނެ ކަމަށް ވިދާޅުވިއެވެ.

ދިވެހި ޒުވާނުންގެ ގައުމީ ލަފާދޭ ކޮމިޓީގެ މަގްސަދަކީ، ސަރުކާރުގެ މެނިފެސްޓޯ އާއި މުހިންމު ސިޔާސަތުތައް ތަންފީޒުކުރުމުގައި، ޒުވާނުންގެ ހިޔާލާއި މަޝްވަރާ ހޯދައި، މިފަދަ ކަންކަމުގައި ކުރިއަށްދާންވީ ގޮތްތަކާއި ގުޅޭގޮތުން ރައީސަށް ލަފާ އެރުވުމާއި ތަފާތު އެކި ދާއިރާތަކުގައި ޒުވާނުންގެ ކުރިއެރުމަށް ހުރި ހުރަސްތަކާއި ގޮންޖެހުންތައް ދެނެގަނެ، އެކަންކަމާ މެދު ފުޅާ ދާއިރާއެއްގައި މަޝްވަރާކޮށް، ގައުމީ ފެންވަރުގައި އާއި ސަރަހައްދީ ފެންވަރުގައި، ހައްލު ހޯދުމަށް، މަސައްކަތް ކުރެވޭނެ ގޮތްތަކާ ގުޅޭގޮތުން ރައީސަށް ލަފާ އެރުވުމެވެ.

ޒުވާނުންނާ ގުޅޭ ކަންކަމުގައި ޒުވާނުން ގޮތް ނިންމާ، ޒުވާނުންނަށް މިއަދާއި މާދަމާވެސް ގައުމުގެ އިސް ސަފުގައި މަސައްކަތް ކުރުމުގެ ފުރުސަތު ސަރުކާރުން ފަހިކޮށްދީ، ޒުވާނުންގެ ކަންބޮޑުވުންތަކަށް ހައްލު ހޯދައި ހަރުދަނާ ޒުވާނުންގެ ޖީލެއް ބިނާކުރުމަކީ މި ސަރުކާރުގެ މެނިފެސްޓޯގައި ހިމެނި، ހާއްސަ އަހަންމިއްޔަތުކަމެއް ދީގެން މި ސަރުކާރުން ކުރަމުން އަންނަ މަސައްކަތެކެވެ.

"ޕްރެޒިޑެންޝަލް ޔޫތު އެޑްވައިޒަރސް" ބޯޑު އެކުލަވާލީ މިދިޔަ ޖެނުއަރީ 18 ގައެވެ. މި ބޯޑުގައި ތިއްބަވާނީ 15 މެންބަރުންނެވެ. އަދި ގިނަ ޒުވާނުންނަށް މި ބޯޑުގައި ބައިވެރިވުމަށް މަގުފަހިކޮށްދެއްވުމުގެ ގޮތުން، ރިޔާސީ ދައުރެއްގައި ދެ ފަހަރު ބޯޑު އެކުލަވާލުމަށް ވަނީ ނިންމައިފައެވެ.