އިންޑިއާއަކީ ރާއްޖޭގެ ތަރައްގީގެ މުހިންމު ބައިވެރިއެއް: ރައީސް

އިންޑިއާއަކީ އަބަދުވެސް ރާއްޖޭގެ ތަރައްގީގެ މުހިންމު ބައިވެރިއެއްކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އިންޑިއާގެ 78 ވަނަ މިނިވަން ދުވަހުގެ މުނާސަބަތުގައި އެ ގައުމުގެ ބޮޑު ވަޒީރު ނަރެންދުރަ މޯދީ އާއި ރައީސް ދުރްޕަތީ މުރްމޫއަށް ފޮނުއްވި ތަހުނިޔާގައި ރައީސް ވިދާޅުވީ ދެ ގައުމުގެ ދެމެދުގައި އޮތް ޒަމާންވީ ރަހުމަތްތެރިކަމުގެ ގުޅުމުން ރާއްޖެ އާއި ސަރަހައްދަށް ވެސް ތަރައްގީ އާއި ކުރިއެރުން ލިބިފައިވާ ކަމަށެވެ. އަދި ކުރިއަށް އޮތް މުސްތަގުބަލުގައި ވެސް ރާއްޖެ އާއި އިންޑިއާގެ ގުޅުން އިތުރަށް ބަދަހިވެ، ދެ ގައުމުން އެދޭ އަމާޒަށް ވާސިލުވެވޭނެ ކަމަށް ގަބޫލު ކުރައްވާ ކަމަށް ރައީސް ވިދާޅުވި އެވެ.

On the occasion of India’s Independence Day, I extend heartfelt congratulations to President @rashtrapatibhvn, Prime Minister @narendramodi, and the people of 🇮🇳. Our enduring friendship, rooted in history, has evolved to foster prosperity and development in the Maldives and the… pic.twitter.com/HCtYMG0VLa

— Dr Mohamed Muizzu (@MMuizzu) August 15, 2024

އަދި ދެގައުމުގެ ދެމެދުގައި އޮންނަ ޒަމާންވީ ގުޅުން ބިނާވެފައި ވަނީ އެއްބަޔަކު އަނެއްބަޔަކަށް ކުރާ އިތުބާރާއި އިހުތިރާމުގެ މައްޗަށްކަން ފާހަގަކުރައްވައި މިގުޅުން އިތުރަށް ބަދަހިވެ އަދި އުފެދިގެންދިޔަ މިގާތް ރަހުމަތްތެރި ގުޅުމަކީ ރާއްޖޭގެ ތަރައްގީއާ ފާގަތިކަމަށް އިތުރު ފަހިކަން ގެނެސްދިން ކަމެއްކަން ވެސް އެމަނިކުފާނުގެ މެސެޖުގައި ފާހަގަކުރައްވާފައި ވެއެވެ.

ރައީސުލްޖުމްހޫރިއްޔާގެ މެސެޖުގައި ދެގައުމުގެ ދެމެދުގައި ޒަމާނުއްސުރެ އޮންނަ ގުޅުން އިތުރަށް ބަދަހިކުރެއްވުމަށް މަސައްކަތްކުރައްވާނެކަމުގައި ވިދާޅުވެފައި ވެއެވެ.

އެ މަނިކުފާނު ވިދާޅުވީ ދެ ގައުމުގެ ދެމެދުގައި އޮތް ޒަމާންވީ އެކުވެރިކަމުގެ ގުޅުން، ދެ ގައުމަށާއި މި ސަރަހައްދަށް ތަރައްގީ ގެނުވައިދޭ ގުޅުމަކަށް ބަދަލުވެފައިވާ ކަމަށެވެ.

އަދި މުސްތަގުބަލުގައި ގުޅުން އިތުރަށް ބަދަހިވެ، ދެ ގައުމުން އެދޭ އަމާޒުތަކުގެ މައްޗަށް މަސައްކަތްކޮށް ތަރައްގީ ގެނެވޭނެކަމުގެ އުންމީދުކުރާކަމަށް ވިދާޅުވިއެވެ.

އިންޑިއާއެކު އޮތް ގުޅުން މި ސަރުކާރުން ވެރިކަމާ ހަވާލުވީއިރު ހީނަރުވެފައި އޮތްނަމަވެސް މިހާރު އެ ގުޅުން އަންނަނީ ރަނގަޅުވަމުންނެވެ.