ހދ އަތޮޅު ކައުންސިލްގެ ނައިބު ރައީސްގެ މަގާމުން ސައްތާރު ވަކިކޮށްފި

ހދ އަތޮޅު ކައުންސިލްގެ ނައިބު ރައީސްގެ މަގާމުގައި ހުންނެވި އަބުދުއްސައްތާރުގެ އިތުބާރު ނެތްކަމަށް ފާސްކޮށް އޭނާ މަގާމުން ވަކިކުރައްވައިފި އެވެ.

ސައްތާރު ނައިބު ރައީސްކަމުގެ މަގާމުން ވަކިކުރެއްވީ މިއަދު އޮތް އަތޮޅު ކައުންސިލްގެ ބައްދަލުވުމުގައި އޭނާއާ ދެކޮޅަށް ނެގި އިތުބާރު ނެތްކަމުގެ ވޯޓަކުންނެވެ.

މި މައްސަލަ ހުށަހެޅުއްވީ ހިރިމަރަދޫ ކައުންސިލްގެ ރައީސް މުހައްމަދު ވަހީދެވެ. އޭނާ ހުށަހެޅުއްވި މައްސަލައިގައި ވަނީ އަތޮޅު ކައުންސިލް ވަގުތީގޮތުން ހިންގެވުމާ ހަވާލުވެހުންނެވި އަދި އެކައުންސިލްގެ ނައިބު ރައީސް އަބުދުއްސައްތާރު މަގާމުގެ މަސްއޫލިއްޔަތު އަދާކުރުމަށް ބޮޑުތަނުން އިހުމާލުވެ އަތޮޅު ކައުންސިލަށާއި އަތޮޅުގެ ރައްޔިތުންގެ ހައްގުތަކަށް އިހުމާލުވަމުންދާ ކަމަށެވެ.

ޖަވާބުދާރީވުމަށް 30 ދުވަހުގެ މުއްދަތެއް ދިނުމަށްފަހު ސައްތާރުގެ އިތުބާރު ނެތްކަމަށް ފާސްވީ ޖަލްސާގައި ބައިވެރިވި 12 މެންބަރުގެ ތެރެއިން 9 މެންބަރުގެ ތާއިދާއެކު އެވެ. ވަކިކޮޅަކަށް ވޯޓް ނުދެއްވާ ތިން މެންބަރަކު ތިއްބެވި އެވެ. އެއީ ފިނޭ، ނޭކުރެންދޫ އަދި މަކުނުދޫ ރައީސުންނެވެ.

މިއަދު ކުރިއަށްދިޔަ މި ބައްދަލުވުމުގެ ރިޔާސަތު ބެލެހެއްޓެވީ ކުރިނބީ ކައުންސިލްގެ ރައީސް އަބުދުﷲ އަސްލަމެވެ.

ހދ އަތޮޅު ކައުންސިލްގެ ނައިބު ރައީސްގެ މަގާމަށް އަބްދުއްސައްތާރު އިންތިހާބުކުރެއްވީ 2023 ވަނަ އަހަރުގެ ފެބްރުއަރީމަހުގެ ކުރީކޮޅު އެވެ. ސައްތާރަކީ އެ ކައުންސިލްގެ މި ދައުރުގެ ދެވަނަ ނައިބު ރައީސެވެ. އޭގެ ކުރިން ހުންނެވީ ކުމުންދޫ ކައުންސިލްގެ ރައީސް އަމީން މުހައްމަދެވެ. އަމީން ނައިބު ރައީސްގެ މަގާމު އިސްތިއުފާދެއްވީ އަތޮޅު ކައުންސިލްގެ މަސައްކަތަށް އެކަށީގެންވާ ވަގުތު ނުދެވޭތީ އެވެ.