ތީފަރިދޫގައި ހިންގަނީ ޖަރީމާ، ރައްޔިތުން އަރާ އެރަށް ހިފަން ޖެހޭ: ވަހީދު

ހދ ތީފަރިދޫ ކުއްޔަށް ނަގައިގެން އުޅޭ ފަރާތުން އެރަށުގައި ވައްކަންކޮށް ޖަރީމާ ހިންގާ ކަމަށާއި އެކަން ހުއްޓުވަން ރައްޔިތުން އެރަށަށް އަރައި އެރަށް 'ހިސޯރުކޮށްގެން' ތިބި މީހުން ބޭރުކުރަން ހދ އަތޮޅު ކައުންސިލް މެންބަރު، އަދި ހިރިމަރަދޫ ކައުންސިލްގެ ރައީސް މުހައްމަދު ވަހީދު ގޮވާލައްވައިފި އެވެ.

މިދިޔަ ބުރާސްފަތިދުވަހު ހދ އަތޮޅު ކައުންސިލްގައި ބޭއްވި އާންމު ބައްދަލުވުމުގައި ވާހަކަދައްކަވަމުން މުހައްމަދު ވަހީދު ވިދާޅުވީ، ދަނޑުވެރިކަމަށް ދޫކޮށްފައިވާ ތީފަރިދޫ އެގޮތަށް ވަކި ބަޔަކު ބޭނުންކުރާތާ އެތައް ޒަމާނެއްވެއްޖެ ރަށެއް ކަމަށާއި އެކަމަކު އެތަނުން ހދ އަތޮޅުގެ ރައްޔިތުންނަކަށް އެއްވެސް ފައިދާއެއް ނުވާ ކަމަށެވެ.

"ތީފަރިދޫ ބޭނުންކުރާތާ އެތަން ޒަމާނެއްވެއްޖޭ، މިއަކުން ހދ އަތޮޅުގެ ރައްޔިތުންނަކަށް އެއްވެސް މަންފާއެއްނުވެއޭ. [އެރަށުގަ] ކުރަނީ ވައްކަމޭ. ހަގީގަތުގައި ތެދުބަހުން ދަންނަވަންޏާ އަޅުގަނޑުމެން އަތޮޅުގެ އެއްވެސް ރައްޔިތަކަށް ފައިދާއެއްނުވޭ. އެހެންވީމަ އަޅުގަނޑުމެންގެ އަތޮޅަށް މިއޮތީ ހިޔާނާތްތެރިވެފަ." ވަހީދު ވިދާޅުވި އެވެ.

އޭނާ ވިދާޅުވީ، ތީފަރިދޫގެ ކަންބޮޑުވުން ރާއްޖޭގެ ހަތަރު ރައީސުންނާ ހަމަ ގެންދެވިއްޖެ ކަމާއި އެހެންނަމަވެސް ކޮންމެ ބަޔަކުވެސް ވެރިކަމުގައި ތިބޭއިރުވެސް ތިބެނީ އެ ބޭފުޅުންގެ 'މުށުތެރޭ ' ގައި ކަމަށް މުހައްމަދު ވަހީދު ތުހުމަތުކުރެއްވި އެވެ. ވަހީދު ވިދާޅުވީ، މިއަދާ ހަމައަށް އައިރުވެސް ތީފަރިދޫގެ އެގްރިމެންޓްވެސް އަތޮޅު ކައުންސިލްއާ ހަމައަށް ލިބިފައިނުވާ ކަމަށެވެ.

މިއީ މިއަދަކު ފެށިގެން އުޅޭ މައްސަލައެއް ނޫން ކަމަށާއި މިއީ އެތައް ޒަމާނެއްވެފައިވާ މައްސަލައެއްކަން ފާހަގަކުރައްވަމުން ވަހީދު ވިދާޅުވީ، މީގެ ކުރިން އޭނާ އެރަށަށް ގޮސް އަރައި އެރަށުގައި ކުރަނީ ކޮން ކަމެއްތޯ ބަލައި ހަދާފައިވާނެ ކަމަށެވެ. އެރަށުގައި ހިންގަނީ ޖަރީމާ ކަމަށާއި ރުއްގަހާއި ވެލި ބޭރުކޮށް ވައްކަންކުރަމުންދާ ކަމަށެވެ.

އެ މައްސަލަތައް އެތައް ފަހަރަކު އީޕީއޭ އަށާއި އެންވަރަޔަމެންޓް މިނިސްޓްރީއަށް ހުށަހެޅިނަމަވެސް މިހާތަނަށް އައިރުވެސް އެއިން އެއްވެސް މައްސަލައެއް ބަލާފައިނުވާކަމަށް އޭނާ ފާހަގަކުރެއްވި އެވެ.

" އޭރު[ތީފަރިދޫ ނަގައިގެން އުޅޭ] މީހުން ވައްކަންކުރީ ރުއްބޭރުކޮށް ވެލިބޭރުކޮށް މިކަހަލަ ޖަރީމާތައް ހިންގާތީވެ، މިއަދާ ހަމައަށް އައިރުވެސް ދައުލަތުން ޑިޒިޝަނެއްނުނަގާ." ހިރިމަރަދޫ ރައީސް ވިދާޅުވި އެވެ.

އެރަށުގެ ކުލީގެ ދެބައިކުޅަ އެއްބައި އަތޮޅު ކައުންސިލަށް ޖަމާކޮށްދިނުމަށް މިސަރުކާރުން ނިންމާފައިވާކަމަށާއި އެއީ އުފާވެރި ހަބަރެއްކަމުގައިވިޔަސް އެރަށް އެގޮތަށް ވަކި ބަޔަކު ޖަރީމާ ހިންގަން ދޫކޮށްލާފައި އޮތުމުން އަތޮޅަށް ލިބޭ ގެއްލުން ބޮޑުކަމަށެވެ. އެރަށުގައި ހިންގާ ޖަރީމާތައް ހުއްޓުވަން އަތޮޅުގެ ރައްޔިތުން ނުކުންނަށް ޖެހޭ ކަމުގައި އޭނާ ވިދާޅުވި އެވެ.

"ރައްޔިތުން ހަމަ ނިކުންނަންވީ އެރަށް[ތީފަރިދޫ] ހުއްޓުވުމަށްޓަކާ އެރަށަށް އަރައިގެންވެސް އެރަށް ހުއްޓުވަންވީ. އަޅުގަނޑު ހަމަ ގޮވާލަން ރައްޔިތުންނޭ އެރަށަށް ހިސޯރުކޮށްގެން ތިބި މީހުން ބޭރުކުރާށޭ. އެމީހުންނަކަށް ނުކުރެވޭނޭ އެކަމެއް. އެހެންވީމަ އެރަށް އެބަޖެހޭ އަޅުގަނޑުމެން މިހާރުން މިހާރަށްވެސް އަތުލަން. އަޅުގަނޑުމެންގެ ބާރުގެ ދަށަށް ގެންނަން. އަޅުގަނޑުމެންގެ އަތޮޅަކީ ނިކަމެތިކަމާ ބަލިކަށިކަން ދީފައޮތް އަތޮޅެއް. ކޮންމެ ސަރުކާރަކުންވެސް އެބަ އިހުމާލުވޭ. އެހެންވީމާ މި އިހުމާލުތަކަކީ އަޅުގަނޑުމެންގެ މޫނުމަތީގަ މިއަޅާ އަނދުނެއްގެ ގޮތުގައި ކޮންމެ ކަމެއްކުރުމަކީ އަޅުގަނޑުމެންނަށް ގަބޫލުކުރެވޭނެކަމެއްނޫން. އަޅުގަނޑު ބޭނުން މިހާރުން މިހާރަށް އެރަށް އެމީހުން އަތުން އަތުލާ އަޅުގަނޑުމެން އަތޮޅު ކައުންސިލާ ހަވާލުކޮށްގެން ހދ އަތޮޅުގެ ރައްޔިތުންނަށް އެރަށުން މަންފާވާނެ ގޮތަކަށް މަސައްކަތްކުރުން. އެރަށަކީ ދަނޑުވެރިކަމަށް މޮޅު ފައްކާ ރަށެއް." ވަހީދު ވިދާޅުވި އެވެ.

ވަހީދު ވިދާޅުވީ، ތީފަރިދޫއަކީ ރުއްގަސް އިންތިހާއަށް ގިނަ އެތައް މަންފާއެއް ނެގޭނެ ރަށެއް ކަމަށާއި އެހެންނަމަވެސް ރަށް ކޮށާ ރުއްތައް ބޭރުކޮށް ވަގު ވިޔަފާރިކުރަމުންދާ ކަމަށެވެ. އެކަން ހަރުކަށި އިބާރާތުން ކުށްވެރިކުރާ ކަމަށާއި ލިލީ ސްޓޯރު މީހުންގެ އަތުގައި ތީފަރިދޫ ބާއްވަން ބޭނުންނުވާ ކަމަށެވެ.

"އަޅުގަނޑުމެން މިއަދާ ހަމައަށް ފާއިތުވެދިޔަ އެއްވެސް ސަރުކާރަކުން މިވާހަކަތައް ދައްކާއިރުވެސް އަޑެއްނާހާ. ހަމަ މިގޮތަށް މިވާހަކަތައް މިދައްކަނީ ތަކުރާރުކޮށް މިރަށްރަށް ނުދޭށޭ އެމީހުން އަތަށް. އަޅުގަނޑުމެން ހދ.އަތޮޅު ރައްޔިތުންނާ ހަވާލުކުރާށޭ. އަޅުގަނޑުމެން ބޭނުމެއްނުވެއޭ މިގޮތަށް ވައްކަން ކުރަން ދާއިމީކޮށް އެރަށް ބާއްވާކަން ތީފަރިދޫ ވަކި ބައެއްގެ އަޅުވެރިކަމުގަ. މަޢުމޫނު ވެރިކަމުން ފެށިގެން މިއަދާހަމައަށް އެރަށް އެއޮތީ ލިލީ ސްޓޯރު މީހުންގެ އަތުގަ. ލިލީ ސްޓޯރު މީހުންގެ ފަރާތުން ހދ އަށްކުރި މަންފާއެއްބުނެބަލަ، ހދ.އަތޮޅުގެ ރަށަކަށް ކޮށްދިން ކަމެއް އެބައޮތްހޭ؟ ނޯންނާނެ." ވަހީދު ވިދާޅުވި އެވެ.