އިންޑިއާ މީހަކު މަނީ ލޯންޑަރިންގެ ތުހުމަތުގައި ހައްޔަރުކޮށްފި

ވަރަށް ގިނައިން ރާއްޖެ އަންނަ އިންޑިއާއަށް ނިސްބަތްވާ އުމުރުން 27 އަހަރުގެ ފިރިހެނަކު މަނީ ލޯންޑަރިންގގެ ތުހުމަތުގައި ހައްޔަރުކޮށްފިއެވެ.

މަނީ ލޯންޑާކުރާކަމަށް ތުހުމަތުކޮށް އިއްޔެވަނީ އޭނާގެ ބަންދަށް ކްރިމިނަލް ކޯޓުން ވަނީ ފަސް ދުވަސް ޖަހައިފަ އެވެ. ކޯޓު އަމުރުގައިވާގޮތުން މަނީ ލޯންޑާކުރުމުގެ ތުހުމަތު ބައްދުކޮށްފައިވަނީ އިންޑިއާގެ އަބްދުލް ރަގޫބު ނިސްތާރު ހަލީމް ރަހްމާނަށެވެ.

އޭނާގެ ބަންދު އަމުރުގައި ބުނެފައި ވަނީ މި މައްސަލައިގައި އޭނާގެ އަތުން ހިފެހެއްޓި ފައިސާ އަކީ ސައްހަ ގޮތުގައި ހިފަހަައްޓާފައިވާ ފައިސާ ކަމަށެވެ. އަދި އޭނާގެ މައްޗަށް ފުލުހުން ތުހުމަތު ކުރާ މަނީ ލޯންޑަރ ކުރުމުގެ ތުހުމަތާއި ގުޅޭ އެއްވެސް ހެއްކެއް ފުލުހުން ހުށަހަޅާފައި ނުވާ ކަމަށް އޭނާގެ ވަކީލުން ބުނެފައި ވެއެވެ. އަދި ހަރުކަށި ޝަރުތުތަކާއެކު ބަންދުން ދޫކޮށްލަންވެސް އެދިފައި ވެއެވެ.

ފުލުހުން ފަރާތުން ބުނެފައި ވަނީ އޭނާގެ އަތުން ގިނަ އަދަދެއްގެ ޑޮލަރު ފެނިފައިވާ ކަމަށާއި އަދި އެއީ އެހެން މީހުން އޭނާއާ ހަވާލު ކުރާ ޑޮލަރުކަން ދޭހަވާ ލިޔުންތައް އޭނާގެ އަތުން ފެނުނު ކަމަށެވެ. އަދި އޭނާއަކީ ވަރަށް ގިނައިން ރާއްޖެ އެތެރެވެ ޖެހިގެން އަންނަ ދުވަހު ފުރައިގެންދާ މީހެއް ކަމަށާއި އޭނާގެ ނަންވެސް ޕާސްޕޯޓުން ބަދަލުކޮށްފައިވާ ކަމަށް ބުނެފައި ވެއެވެ.

އޭނާގެ މައްޗަށް ތުހުމަތު ކޮށްފައިވާ ކުށަކީ ޖިނާއީ ބޮޑު ކުށަކަށްވާއިރު، އޭނާއަށް މި ފައިސާ ލިބުނު ގޮތްތައް ފުލުހުންނަށް އަދި ސާފް ނުކުރެވޭތީއާއި ޝައްކު ކުރެވޭ ޓްރެވެލް ހިސްޓްރީއެއް އޮތުމުން އޭނާ ބަންދުގައި ބަހައްޓަން ނިންމާފައިވާ ކަމަށްވެސް ބަންދު އަމުރުގައި ވެއެވެ.