ހޯމް މިނިސްޓްރީގެ ސްޓޭޓް މިނިސްޓަރު ޔޫސޭ މަގާމުން ވަކިކޮށްފި

ހޯމްލޭންޑް ސެކިއުރިޓީ މިނިސްޓްރީގެ ސްޓޭޓް މިނިސްޓަރު ޔޫސުފް އަބްދުލްގަފޫރު (ޔޫސޭ) މަގާމުން ވަކިކޮށްފި އެވެ.

އޭނާ މަގާމުން ވަކިކޮށްފައިވަނީ މިދިޔަ ބުރާސްފަތި ދުވަހު ކަމަށް މައުލޫމާތު ލިބިފައިވެ އެވެ. މަގާމުން ވަކިކުރި ވަކި ސަބަބެއް އަދި އެނގިފައެއް ނުވެ އެވެ.

ޔޫސުފްއަކީ މީގެކުރިން ރައްޔިތުންގެ މަޖިލީހުގެ ގަމު ދާއިރާގެ މެންބަރުކަންވެސް ކުރެއްވި ފަރާތެކެވެ. ކުރީގެ ރައީސް އަބްދުﷲ ޔާމީންގެ ވެރިކަމުގައިވެސް ހޯމް މިނިސްޓްރީގެ ސްޓޭޓް މިނިސްޓަރުކަން ކުރެއްވި ޔޫސުފްއަކީ މަޖިލީހުގެ ރައީސް އަބްދުއްރަހީމް އަބްދުﷲ އަދި ކުރީގެ ރައީސް ޔާމީނާވެސް އަރިސް ބޭފުޅެކެވެ.

ޔޫސޭ މަގާމުން ވަކިކުރުމުން ހޯމްލޭންޑު ސެކިއުރިޓީ މިނިސްޓްރީގައި މިހާރު ތިއްބަވަނީ ތިން ސްޓޭޓް މިނިސްޓަރުންނެވެ. އެއީ މުހައްމަދު ކިނާނަތާއި ލުބުނާ ޒާހިރުގެ އިތުރުން އަހުމަދު ސިއްދީގެވެ.