ސައިކަލެއްގެ މަޑިދަށުން 400،000 އަށްވުރެ ގިނަ ރުފިޔާ ވަގަށް ނަގައިފި

ސައިކަލެއްގެ މަޑިދަށުން 400،000 އަށް ވުރެ ގިނަ ރުފިޔާ ވަގަށް ނެގި ކަމަށް ބުނާ މައްސަލައެއްގައި މީހަކު ހައްޔަރުކޮށްފި އެވެ.

މި މައްސަލައާ ގުޅިގެން ހައްްޔަރުކޮށްފައި ވަނީ އުމުރުން 45 އަހަރުގެ ބަންގްލާދޭޝް މީހެއް ކަމަށްވާ ޖަހަންގިރް އާލަމެވެ. މި މައްސަލައާ ގުޅިގެން އޭނާ ހައްޔަރުކޮށް، އިއްޔެ ކްރިމިނަލް ކޯޓުން އޭނާގެ ބަންދަށް 15 ދުވަސް ވަނީ ޖަހައިފައެވެ.

އޭނާއާ ގުޅޭ ބަންދު އަމުރުގައި ބުނެފައި ވަނީ ތުހުމަތު ކުރެވޭ ކޮންމެވެސް މިންވަރަށް ހެކި ގަރީނާ ހުށަހެޅިފައިވާ ކަަމަށް ބެެލެވޭ ކަަމަށެވެ. އޭގެ ތެރޭގައި ސައިކަލު ވެރިފަރާތުގެ ބަޔާނާއި، ސީސީޓީވީ ފޫޓޭޖްގެ އިތުރުން، އެއާ ގުޅޭ ސްނެޕްޝޮޓްތައް ހިމެނެެެއެވެ.

ބަންދު އަމުރުގައިވާގޮތުން އޭނާގެ މައްޗަށް، މީހެއްގެ ސައިކަލުގެ މަޑިދަށުގައި ބަހައްޓާފައި ހުރި 442،750ރ ވަގަށް ނެގި ކަމުގެ ތުހުމަތު ކުރެވެއެވެ. ނަމަވެސް އޭނާ ވަނީ މި ތުހުމަތުތަކަށް އިންކާރު ކޮށްފައެވެ.