ސިޔާސީ ޕާޓީތަކުން ވަކިވާން ބޭނުންވާ މީހުންނަށް ފަސޭހަކޮށްދީފި

ސިޔާސީ ޕާޓީން ވަކިވުމަށް އެދި އިލެކްޝަންސް ކޮމިޝަނަށް ހުށަހެޅޭނެ ގޮތްތައް ފަސޭހަކޮށްދީފި އެވެ.

އެ ކޮމިޝަނުން ސިޔާސީ ޕާޓީތަކުގެ ގަވައިދަށް ގެނައި ނުވަ ވަނަ އިސްލާހުގައި ބުނީ ޕާޓީން މެމްބަރަކު ވަކިވުމަށް އެދޭތާ 14 ދުވަހުގެ ތެރޭގައި އެ މީހަކު ޕާޓީން ވަކިކޮށްދޭން ޖެހޭނެ ކަމަށެވެ. އެ މުއްދަތުގެ ތެރޭގައި އެކަން ނުކޮށްދީފިނަމަ އީސީން ކަނޑައަޅާ ނިޒާމުގެ ތެރެއިން ޝަކުވާ ހުށަހެޅުމުން އޭނާގެ ނަން، ޕާޓީގެ ދަފްތަރުން އުނިކޮށްދޭން ޖެހޭނެ ކަމަށް ބުންޏެވެ.

އެ ގަވައިދު ކުރިން އޮންނަގޮތުން، ޕާޓީން ވަކިކޮށްދިނުމަށް އީސީއަށް ހުށަހަޅަންޖެހޭނީ ވަކި ހާއްސަ ފޯމަކުންނެވެ.

ސިޔާސީ ޕާޓީތަކުގެ ގަވައިދަށް ދެން ގެނައި އިސްލާހަކީ، ކުރިން ހުރި ޕާޓީއަށް ނޭނގި އެހެން ޕާޓީއަކަށް ބަދަލުކޮށްފައިވާތީ، ކުރީގައި ހުރި ޕާޓީއަށް ބަދަލުވުމަށް އީސީން ކަނޑައަޅާ ނިޒާމުގެ ތެރެއިން ހުށަހެޅުމުން ނޭނގި ރަޖިސްޓްރީކޮށްފައި އޮތް ޕާޓީން ވަގުތުން ވަކިކޮށް، ކުރިން ހުރި ޕާޓީއަށް އީސީން އަލުން ވައްދައިދިނުމާ ގުޅޭ ބަދަލެވެ.

ނަމަވެސް، އެ ގަވައިދު ކުރިން އޮތީ މީހަކަށް ނޭނގި އޭނާ ޕާޓީއަކަށް ވައްދާފައިވާކަމުގެ ޝަކުވާ ވެސް ވަކި ފޯމަކުން ހުށަހަޅައި އަދި އެއީ ތެދު ޝަކުވާއެއްކަން ފެނިއްޖެނަމަ، އެ ޕާޓީއަކުން އޭނާ ވަކިކޮށްދޭންވާނެ ކަމަށެވެ.