ދެ ސައިކަލް ޖެހި ހިނގި ނުރައްކާތެރި އެކްސިޑެންޓްގައި ސީރިއަސް އަނިޔާތައް ލިބުނު ފިރިހެން މީހާ ފަރުވާއަށް މާލެ ފޮނުވާލައިފި އެވެ.
މިދިޔަ އަންގާރަ ދުވަހު ކުޅުދުއްފުށީގައި ހިނގި މި އެކްސިޑެންޓްގައި 49 އަހަރުގެ މީހާގެ އިތުރުން 21 އަހަރުގެ އަންހެނަކާއި 11 އަހަރުގެ ފިރިހެން ކުއްޖަކަށްވެސް އަނިޔާވި އެވެ. އެކަމަކު 21 އަހަރުގެ އަންހެން މީހައަށާއި 11 އަހަރުގެ ފިރިހެން ކުއްޖައަށް ސީރިއަސް އަނިޔާއެއް ނުލިބެ އެވެ.
އެ މީހުންނަށް ފަރުވާ ދިނުމަށްފަހު ހަމަ އެ ދުވަހު ވަނީ ދޫކޮށްލާފަ އެވެ.
އެކްސިޑެންޓްގައި އަނިޔާވި ފިރިހެން މީހާގެ ބޯފަޅައިގެންގޮސް ގިނަ އަދަދެއްގެ ލޭ ފޭބިކަމަށް މަންޒަރު ދުށް މީހުން މައުލޫމާތުދެ އެވެ.
ކޭއާރުއެޗްގެ މީޑިއާ އޮފިޝަލް މުހައްމަދު މޫސާ ވިދާޅުވީ، ސީރިއަސް އަނިޔާވި މީހާ ރޭގެ ވަގުތެއްގައި މާލެ ފޮނުވާލާފައިވާ ކަމަށާ އެ މީހާ މާލެ ފޮނުވާލީ ކުރިން ފާހަގަނުވާ ކަންތައްތަކެއް ފާހަގަވާން ފެށުމުން އިތުރު ފަރުވާއަށް ކަމަށެވެ.
