އިގުތިސޯދު ވަރުގަދަ ކުރެވޭނީ ޕްރައިވެޓް ސެކްޓާ ވަރުގަދަ ކުރެވިގެން: މިނިސްޓަރު ފައިސަލް

ގައުމެއްގެ އިގުތިސޯދު ވަރުދަގަ ކުރެވޭނީ އެ ގައުމެއްގެ ޕްރައިވެޓް ސެކްޓާ ވަރުގަދަ ކުރެވިގެން ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.

މިނިސްޓަރު މިހެން ވިދާޅުވީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ން ބޭއްވި މޯލްޑިވް ޓޫރިޒަމް ސިމްޕޯޒިއަމް 2024 ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

"ދުނިޔޭގެ އެއްވެސް ގައުމެއްގެ އިގުތިސޯދެއް އަޅުގަނޑު ގަބޫލު ކުރާ ގޮތުގައި ވަރުދަގަ ކުރެވޭނީ އެ ތަނެއްގެ ޕްރައިވެޓް ސެކްޓާ ވަރުގަދަ ކުރެވިގެން" މިނިސްޓަރު ވިދާޅުވިއެވެ.

އަތޮޅު ތެރޭގެ ރަށްތަކުގައި ތިބި ގިނަ ޒުވާނުން ސަރުކާރުގެ އެކި އިދާރާތަކާއި ކުންފުނިތަކުގައި މަސައްކަތްކުރަމުންދާއިރު، އެ ފަރާތްތަކުން ޕްރައިވެޓް ސެކްޓާގައި މަސައްކަތް ކުރާނަމަ، ސަރުކާރަށް އޮންނަ ބުރަ ކުޑަވެގެންދާނެކަން މިނިސްޓަރު ފާހަގަ ކުރެއްވިއެވެ.

ރާއްޖޭގެ އިގުތިސޯދު ފަތުރުވެރިކަމަށް ބަރޯސާވެފައި އޮންނައިރު، ބައެއް ރަށްތަކަކީ ލޯކަލް ޓޫރިޒަމްގެ ވިޔަފާރި ފުޅާ ދާއިރާއެއްގައި ހިންގައި، އޭގެ ބޮޑު މަންފާއެއް ހޯދަމުންދާ ރަށްތަކެވެ. އެ ގޮތުން ބައެއް ރިޒޯޓުތަކަށްވުރެ ރަނގަޅަށް ހަދާފައިވާ ގެސްޓްހައުސްތައް ރާއްޖޭގައި އެބަހުރި ކަމަށް އޭނާ ވިދާޅުވިއެވެ.

ފައިސަލް ވިދާޅުވީ ޓޫރިޒަމް މިނިސްޓްރީގެ އެންމެ ބޮޑު އެއް އަމާޒަކީ، ރާއްޖޭގައި އެ ވިޔަފާރި ނެތް ހިސާބުތަކަށް ވެސް އެކަން ތައާރަފުކޮށް، އެ ސަރަހައްދެއްގައި ދިރިއުޅޭ ބަޔަކަށް އެ ކަމުގެ މަންފާ ލިބުމެވެ.