ހދ އަތޮޅަށް 4،000 އެނދު އިތުރުކުރުމުގެ މަސައްކަތް ދަނީ ކުރަމުން: ފައިސަލް

ހަނިމާދޫ އިންޓަނޭޝަނަލް އެއާޕޯޓުގެ މަސައްކަތް ނިމޭއިރު، އެއަތޮޅުގައި ފަތުރުވެރިކަމުގެ އެނދުތައް އިތުރުކުރުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެއެވެ.

މިނިސްޓަރު މިހެން ވިދާޅުވީ އިއްޔެ ރައްޔިތުންގެ މަޖިލީހުގައި ވައިކަރަދޫ ދާއިރާގެ މެންބަރު ހުސައިން ޒިޔާދު ކުރެއްވި ސުވާލަކަށް ޖަވާބުދެއްވަމުންނެވެ.

ހދ. އަތޮޅުގައި ފަތުރުވެރިކަން ތަރައްޤީކުރުމަކީ ރައީސުލްޖުމްހުރިއްޔާ ޑރ. މުހައްމަދު މުއިއްޒު ވައުދުފުޅެއްކަން ފާހަގަކުރައްވާ މިނިސްޓަރު ފައިސަލް ވިދާޅުވީ މި ސަރުކާރުން ފަތުރުވެރިކަމަށް ހުޅުވާލި ފުރަތަމަ ރަށްތަކުގެތެރޭގައި ހދ. ވައިކަރަމުރައިދޫގެ 15 ހެކްޓަރު ހިމަނާފައިވާ ކަމަށާއި މިހާރު މިރަށުގައި ފަތުރުވެރިކަން ތަރައްގީކުރުމަށް ބަޔަކާއި ހަވާލުކޮށްފައިވާ ކަމަށެވެ.

"މިހާރު ހދ. އަތޮޅުގައި ރަޖިސްޓްރީކޮށްފައިވަނީ 460 އެނދު، އެ އަތޮޅުގެ އިތުރު 3 ތަނެއް ފަތުރުވެރިކަމަށް ދޫކޮށް، ޖުމްލަ 1886 އެނދު ތަރައްޤީކުރުމުގެ މަސައްކަތް ކުރިއަށް އެބަދޭ،" ފައިސަލް ވިދާޅުވިއެވެ.

އޭނާ ވިދާޅުވީ ހަނިމާދޫ އިންޓަނޭޝަނަލް އެއާޕޯޓުގެ މަސައްކަތް އަންނަ އަހަރުގެ މާޗުމަހުގެތެރޭ ނިމޭނެ ކަމަށް ލަފާކުރެވޭ ކަމަށާއި، އަދި އަމާޒަކީ އެހާތަނަށް ފަތުރުވެރިކަމަށް އިތުރު 4000 އެނދު ނެރުންކަމަށެވެ.

މުޅި ރާއްޖެއަށް ފަތުރުވެރިކަން ފުޅާކުރުމަށް ކުރަމުންދާ މަސައްކަތްތަކުގެދަށުން އިންވެސްޓަރުން ހޯދުމަށް އެކި ޤައުމުތަކުގައި އިންވެސްޓަރ ފޯރަމުތަކެއް ބޭއްވުމަށް ނިންމާފައިވާ ކަމަށްވެސް ފައިސަލް ވިދާޅުވިއެވެ.

"މިހާރުވަނީ ސިންގަޕޫރު، ތައިލެންޑު އަދި ދުބާއީގައި އިންވެސްޓަރ ފޯރަމުތައް ބޭއްވުމަށް ނިންމާފައި، މިއަންނަ އަހަރުގެ ފުރަތަމަ ކުއާޓަރާއި ދެވަނަ ކުއާޓަރގައި ބޭއްވުމަށް ތާވަލުކުރެވި، ރާއްޖޭގެ ފަތުރުވެރިކަން ނެތް ހިސާބުތަކަށް ފަތުރުވެރިކަން ގެނައުމަށް މަސައްކަތްކުރާނަން،" ފައިސަލް ވިދާޅުވިއެވެ.

ފައިސަލް ވިދާޅުވީ އިންވެސްޓަރުންނަށް ރާއްޖޭގެ ފަތުރުވެރިކަމުގެ ދާއިރާގައި ހުރި ފުރުސަތުތައް ކިޔާދިނުން މުހިންމުކަމަށެވެ. އަދި މިގޮތަށް ވަކި ވަކި މަޝްރޫޢުތައް އިންވެސްޓަރުންނާއި ހަމައަށް ގެންދިޔުމަކީ ފަތުރުވެރިކަން ރާއްޖޭގައި ނެތް ހިސާބުތަކުގައި ފަތުރުވެރިކަން ތަރައްޤީވެގެން ދިޔުމަށް ވަރަށް ބޮޑު އެހީއަކަށްވެގެންދާނެ ކަމަށްވެސް ފައިސަލް ވިދާޅުވިއެވެ.