ހިލޭ ބޯންމެރޯ ހަދަން ފޮނުވި 14 ކުދިންގެ ތެރެއިން ތިން ކުއްޖަކު ފަރުވާ ފުރިހަމަކޮށްފި

ތެލެސީމިއާ ކުދިންގެ ތެރެއިން މިއަހަރު ބޯންމެރޯއަށް ފޮނުވި 3 ކުދިންގެ ބޯންމެރޯ ފަރުވާ މުޅިން ފުރިހަމަކޮށްފައިވާކަމަށް މޯލްޑިވިއަން ބްލަޑް ސާވިސަސްއިން (އެމްބީއެސް)އިން ބުނެފިއެވެ. ބޯންމެރޯ ހަދަނީ ކޮންމެ އަހަރަކު ވަކި އަދަދަކަށް ރާއްޖެއިން ބޭރަށް ކުދިން ފޮނުވައިގެންނެވެ.

ދައުލަތުގެ މީޑިއާގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން މޯލްޑިވިއަން ބްލަޑް ސާވިސަސްގެ އެސޯސިއޭޓް ސްޕެޝަލިސްޓް އިން ޕީޑިއަޓްރިކް ޑރ.އަހުމަދު އުމަރު ވިދާޅުވީ ޒަކާތު ފަންޑުގެ އެހީގައި ބޯންމެރޯހެދުމަށް މިއަހަރަށް ކަނޑައެޅި ހުރިހާ ކުދިން ފަރުވާއަށް ގޮސްފައިވާކަމަށެވެ.

މިއަހަރުގެ އެކި ދުވަސްވަރު ޖުމްލަ 14 ކުދިން ވަނީ ފޮނުވާފައެވެ. ޑރ.އުމަރު ވިދާޅުވީ ފަރުވާ މުޅިން ފުރިހަމަކޮށް ތެލަސީމިއާއިން ފަސޭހަވެ ދެ ކުއްޖަކު މިހާރު ރާއްޖެ އައިސްފައިވާކަމަށެވެ. އަދި އިތުރު ކުއްޖަކުވެސް ފަރުވާ ފުރިހަމަކޮށް، ކުރިއަށް އޮތް ދެ ހަފާތްތާގެ ތެރޭގައި ރާއްޖެ އަންނާނެކަމަށެވެ.

ބޯންމެރޯ ހެދުމަށް މިއަހަރު ފޮނުވި 1 ކުއްޖަކު ވަނީ ނިޔާވެފައެވެ. ދެން ހިމެނޭ 10 ކުދިން ބޯންމެރޯ އޮޕަރޭޝަނަށްފަހު އިތުރު ފަރުވާ ފުރިހަމަކުރަމުންދާކަމަށް ޑރ.ޢުމަރު ވަނީ ވިދާޅުވެފައެވެ. ބޯންމެރޯއަށްފަހު ތިން މަހާ ހަ މަހުގެ މުއްދަތެއް އެ ކުދިން ފަރުވާގައި ރާއްޖެއިން ބޭރުގައި ހޭދަކުރެއެވެ.

"ހިތާމައާއެކު ފާހަގަކުރަން، ބޯންމެރޯއަށް ފޮނުވި 1 ކުއްޖަކު މިދިޔަ ހަފްތާގައި ނިޔާވީ. ދެން ތިބި ހުރިހާ ކުދިންވެސް ފަރުވާ މުޅިން ފުރިހަމަކޮށް ކުރިއަށް އޮތް ނޮވެމްބަރު-ޑިސެމްބަރު މަސްތެރޭ ރާއްޖެ އަންނާނެ." ޑރ. އުމަރު ވިދާޅުވިއެވެ.

ޒަކާތު ފަންޑުގެ އެހީގައި ކޮންމެ އަހަރަކު 10 ކުދިން، ބޯންމެރޯ ހެދުމަށް ފޮނުވުމަށް ސަރުކާރުން ވަނީ ނިންމާފައެވެ.

ޑރ. އުމަރު ވިދާޅުވީ މިހާރު ކުރަމުންދާ މަސައްކަތަކީ 2025ވަނަ އަހަރު ސަރުކާރުގެ އެހީގައި ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާނެ ކުދިން ކަނޑައެޅުމުގެ މަސައްކަތް ކަމަށެވެ.

ބޯންމެރޯ ހެދުމަށް ތެލެސީމިއާ ޕޭޝަންޓުން ކަނޑައަޅާއިރު ބަލާނެ މިންގަނޑުތަކެއް ހުންނާނެކަން ފާހަގަކުރައްވާ ޑރ. އުމަރު ވިދާޅުވީ އޭގެ ތެރެއިން ގިނަ ޓެސްޓުތަކެއް ހަދާނެ ކަމަށެވެ. އަދި ބޯންމެރޯއަށް ފޮނުވާ ކުދިން ކަނޑައަޅާއިރު، ބޯންމެރޯ ކާމިޔާބުވާނެ ކަމަށް ބޮޑަށް ބެލެވޭ ކުދިންނަށް ސަމާލުކަން ދޭނެކަމަށް އޭނާ ވިދާޅުވިއެވެ.

މި ސަރަހައްދުގައި ނިސްބަތުން އެންމެ ގިނަ ތެލެސީމިއާ ބަލި މީހުން ތިބީ ދިވެހިރާއްޖޭގައެވެ.

އެގޮތުން ތެލަސީމިއާ ޕޭޝަންޓުންގެ ދަފުތަރުގައި 959 ފަރާތެއް މިވަގުތު ތިބިއިރު އޭގެ ތެރެއިން މިވަގުތު ދުނިޔޭގައި ތިބީ 666 މީހުންނެވެ. އެއީ ރާއްޖޭގެ މުޅި އާބާދީގެ 16.6 ޕަސަންޓު މީހުންނެވެ.

ޑރ. އުމަރު ވިދާޅުވި ގޮތުގައި އަހަރެއްގެ ތެރޭ 25 ކުދިން ތެލަސީމިއާ ކުދިންގެ ގޮތުގައި ދަފުތަރުވަމުން އައި ނަމަވެސް މިހާރު އެ އަދަދު 20އިން ދަށަށް ގެނެވިފައިވާ ކަމަށެވެ. އެގޮތުން މިއަހަރުގެ މިހާތަނަށް 14 ކުދިން ދަފުތަރުވެފައިވާ ކަމަށް އޭނާ ވިދާޅުވިއެވެ.

ރާއްޖޭގައި ތެލެސީމިއާ ކޮންޓްރޯލް ކުރުމަށް ދިހަ އަހަރު ދުވަހުގެ މާސްޓާ ޕެލޭނެއް މިހާރު ވަނީ އެކުލަވާލައިފައެވެ. މި ޕްލޭން އެކުލަވާލައިފައި ވަނީ މިއަހަރުން ފެށިގެން 2034ވަނަ އަހަރުގެ ނިޔަލަށެވެ.