އަޅުގަނޑުމެން ކޮންމެ މީހަކީވެސް އުނގެނެން މަސައްކަތްކުރާ މީހަކަށްވާން ޖެހޭ: ޕްރިންސިޕަލް އަދުނާން

އަޅުގަނޑުމެން ކޮންމެ މީހަކީވެސް އުނގެނެން މަސައްކަތްކުރާ މީހަކަށްވާން ޖެހޭކަމުގައި އަފީފުއްދީން ސްކޫލް ޕްރިންސިޕަލް އަދުނާން އަލީ ވިދާޅުވެއްޖެ އެވެ.

ގައުމީ ޔުނިވާސިޓީ ކުޅުދުއްފުށީ ކެމްޕަހުގެ ނަރުހުން އިގްރާރުވުމާއި އެވޯޑް ދިނުމަށް ހޯމަދުވަހު ރޭ ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުން ޕްރިންސިޕަލް އަދުނާން އަލީ ވިދާޅުވީ، ކާމިޔާބީއަކީ މަސައްކަތްތެރިޔާގެ ހައްގެއްކަމަށާ ކާމިޔާބު ހޯދަން ކުރާ މަސައްކަތްތައް އެ ހިތްވަރާ އަޒުމުގައި ކޮށްފިނަމަ ކޮންމެ ކުއްޖަކަށްވެސް ކާމިޔާބުވާނެ ކަމަށެވެ.

އެކި ކުދިންނަށް ކާމިޔާބުވާނީ އެކި މިންވަރަށްކަން ފާހަގަކުރައްވަމުން އަދުނާން ވިދާޅުވީ، ކާމިޔާބު ހާސިލްކުރާ ވާހަކަ ދައްކާއިރުގައި ކާމިޔާބު ހޯދުމަށްޓަކާ އެކި ފަރާތްތަކުން ކޮށްފަހުރި މަސައްކަތްތައް ފާހަގަކުރުމަކީވެސް ވަރަށް މުހިންމު ކަމެއްކަމަށެވެ.

"ގިނަ ފަހަރު ވާގޮތަކީ ދެ ފަހަރު ނުވަތަ ތިން ފަހަރު ކުރާ މަސައްކަތަކުން ފެއިލްވީމަ އުންމީދު ކަނޑާލެވެނީ، މާޔޫސްވަނީ. އެހެންވީމަ ކުރިއަށްދާން ބުރުއަރާގޮތްވަނީ. ނަމަވެސް އިތުރަށް މަސައްކަތްކޮށްގެން ކާމިޔާބުވާނެކަން ސިކުނޑިއަށް ވިސްނައިދެވިއްޖެޔާ ހަމަޔަގީނުންވެސް ކާމިޔާބުވާނެ."

ނަރުހުންނާއި މުދައްރިސުން ކުރާ މަސައްކަތް ފާހަގަކުރައްވައި އަދުނާން ވިދާޅުވީ، ދުނިޔެ ބަދަލުވަމުންދާ ގޮތަށް ބަލައި ޓެކްނޮލޮޖީގެ ބޭނުން ހިފައިގެން ފަހި ވިސްނުން ވިސްނާ އިތުރު ކުރިއެރުންތައް ހޯދަން މަސައްކަތްކުރާ ބަޔަކަށްވާން ޖެހޭ ކަމުގައި އެވެ.

" މިއަދު ހޮސްޕިޓަލުތަކުގައި ނަރުހުން ކުރާ މަސައްކަތެއް ނޫން މީގެ ފަސް އަހަރު ނުވަތަ ދިހަ އަހަރު ފަހުން ކުރަން ޖެހޭނީއެއް. އެހެންކަމުން އެ މަސައްކަތްތަކަށް ހޭނި މަސައްކަތަށް ފަރިތަ ބަޔަކަށް ނަރުހުން ވާންޖެހޭނެ. އެހެންކަމުން އަބަދުވެސް އުނގެނެން މަސައްކަތް ކުރުމަށް ނަސޭހަތްތެރިވަން." އަދުނާން ވިދާޅުވި އެވެ.

ކުރިއަށް އޮތް ޖީލުތައް ރަނގަޅު ގޮތުގައި ނެރެވޭނީ ހުނަރުވެރި މުދައްރިސުންތަކެއް ނެރެވިގެން: އަދުނާން

ހަމަ އެހެންމެ މުދައްރިސުންގެ ވާހަކަ ދައްކާއިރުގައި މުދައްރިސުންނަކީވެސް ހަމަ މި ފަދަ މުހިންމު މަސައްކަތްތަކެއް އަދާކުރަމުންދާ ބައެއް ކަމާއި ނަރުހުން ތަމްރީނުކުރުމުގައި އާއި މިފަދަ ހުރިހާ ބަޔަކު ތަމްރީނުކުރުމުގައި އެންމެ މުހިންމު ދައުރެއް އަދާކުރާ ބަޔަކީ މުދައްރިސުންކަމުގައި ޕްރިންސިޕަލް އަދުނާން ފާހަގަކުރެއްވި އެވެ.

އަދުނާން ވިދާޅުވީ، ކުރިއަށްއޮތް ޖީލުތައް ރަނގަޅު ގޮތުގައި މުޖުތަމައުއަށް ނެރެވޭނީ، ރަނގަޅު ހުނަރުވެރި މުދައްރިސުންތަކެއް މުޖުތަމައުއަށް ނެރެވިގެން ކަމަށާ އެހެންކަމުން މުދައްރިސުންގެ ދާއިރާއަށް ސްކޫލްތަކަށް ނުކުންނަން އަޒުމު ކަނޑައަޅަން ޖެހޭ ބަޔަކު ތިބެން ޖެހޭ ކަމަށެވެ. މުދައްރިސުންގެ މަސައްކަތަކީ ވަރަށް މާތް ބަޔަކަށްވެގެން ދާއިރުގައި އެ މަސައްކަތަކީ ވަރަށް މުހިންމު މަސައްކަތެއްކަމުގައި އަދުނާން ފާހަގަކުރެއްވި އެވެ.

"ނަރުހުންނެކޭ އެއް ބީދައިން ހަމަ މުދައްރިސުންނަކީވެސް ބަދަލުވަމުން އަންނަ ދުނިޔޭގައި ފައި ހަމަކުރުމަށްޓަކައި އުނގެނުމުގައި ކުރިއަށްދާބަޔަކަށް ވާންޖެހޭ. އަބަދުވެސް ކިޔެވުމުގެ ފަހުގެ ވަސީލަތްތަކަށް އަހުލުވެރިބަޔަކަށް ވާން ޖެހޭ. އެކަން ކުރުމަށްޓަކައި، މުދަރިއްސުން އަބަދުވެސް ތާޒާވެ އާކަންކަން ދަސްކުރަން އެބަޖެހޭ. ޕްރިންސިޕަލް އަދުނާން ވިދާޅުވި އެވެ.