އަތޮޅު ކައުންސިލްގެ ނިންމުންތައް ތަންފީޒުނުކުރާކަމަށް ބުނެ އެސްޖީ އިބުރާހިމް އުމަރު މަގާމުން ވަކިކުރަނީ

ހދ އަތޮޅު ކައުންސިލުން ނިންމާ ބައެއް ނިންމުންތައް ތަންފީޒުކުރުމުގައި އެ ކައުންސިލްގެ ސެކްރެޓަރީ ޖެނެރަލް (އެސްޖީ) އިބުރާހިމް އުމަރު އުޒުރުވެވަޑައިގަންނަވާކަމަށް ބުނެ އޭނާ މަގާމުން ވަކިކުރަން ހުށަހަޅާނެކަމަށް އެ ކައުންސިލުން ބުނެފި އެވެ.

ހދ އަތޮޅު ކައުންސިލުން އިންތިޒާމުކުރާ އަތޮޅުގެ އެންމެ ފަހުރުވެރި މުބާރާތްކަމުގައިވާ 'ތިލަދެކުނު ޤުރުއާން' މުބާރާތުގެ ނިންމުމުގެ ރަސްމިއްޔާތު ރޭ ބޭއްވިއިރު އެ މުބާރާތުގެ މައުލޫމާތާއި ފޮޓޯތައް މީޑިއާތަކަށް ލިބޭނެ ފަސޭހަ އިންތިޒާމެއް ހަމަޖައްސައިދެއްވުމަށް މީޑިއާތަކުން އެދުނެވެ. އެކަމަކު އެ މުބާރާތާ ބެހޭ މައުލޫމާތު ނުލިބުމާއި މީޑީއާތައް ބައިވެރިކޮށްފައިނުވުމުން މުބާރާތް އެންމެ ރަނގަޅަށް ކަވަރކުރެވޭގޮތް މީޑިއާތަކަށް ވަނީ ނުވެ އެވެ.

އަތޮޅުގެ މީޑިއާތަކުން އެދުނު އިންތިޒާމުތައް ހަމަޖައްސައިދިނުމަށް، އެސްޖީ އިބުރާހިމް އުމަރުގެ އަރިހުން އެ ކައުންސިލްގެ މީޑިއާ އޮފިސަލް އަދި ކުރިނބީ ރައީސް އަބުދުﷲ އަސްލަމް އެދިލެއްވުމުންވެސް އެކަމުގެ ޙަބަރެއް ނުވި އެވެ.

އެކަމަކު މިއަދު ހެނދުނު 7:10 ގައި މީޑިއާ ގުރޫޕަށް އެސްޖީ އިބުރާހިމް އުމަރު ފޮނުވި މެސެޖެއްގައި ވިދާޅުވީ، ފޯކަލް ޕޮއިންޓުންނާއި އޮފިސަލުންނާއެކު އެކަމަށް(މީޑިއާ) ގުރޫޕެއް ހަދައި މިހާރުވެސް ބޭނުންވާ މައުލޫމާތު ދެމުންދާ ކަމަށެވެ. ނަމަވެސް އެސްޖީ އެ ވިދާޅުވާ މީޑިއާ ގުރޫޕްގެ މައުލޫމާތެއް ކައުންސިލަރުންށާއި އަތޮޅުގެ މީޑިއާތަކަށް ނޭނގެ އެވެ.

"އެސްޖީ އިބުރާހިމް އުމަރު ފެއިލްވުމެއް ނޫން ތޯ އެހެންވީމަ. މީޑިއާތަކަށް މައުލޫމާތު ހިއްސާކުރަން މިވަގުތު އަތޮޅު ކައުންސިލް ހިންގުމާ ހަވާލުވެ ހުންނެވި ނައިބު ރައީސް މުހައްމަދު ވަހީދު ވިދާޅުވެގެން މި ގުރޫޕް ހެދިފަ މިވަނީ." މީޑިއާ ގުރޫޕްގައި އެސްޖީ ޓެގްކުރައްވާ އެ ކައުންސިލްގެ މީޑިއާ އޮފިސަލު އަސްލަމް ވިދާޅުވި އެވެ.

"ނިންމާ ނިންމުންތައް ތަންފީޒުނުކުރެވި ތިގޮތަށް އަމަލުކުރެއްވީމާ ބޮޑުތަނުން އެސްޖީގެ ޒިންމާ އާއި މަސްއޫލިއްޔަތު އަދާނުކުރެއްވޭ ނޫންތޯ." އަސްލަމް އިތުރަށް ލިޔުއްވި އެވެ.

އަސްލަމް ވިދާޅުވީ، އަތޮޅު ކައުންސިލްގެ އެސްޖީ އިބުރާހިމް އުމަރަކީ އަތޮޅު ކައުންސިލުން ނިންމާ ބައެއް ނިންމުންތައް ތަންފީޒުކުރުމަށް އުޒުރުވެރިވާ ފަރާތެއް ކަމަށާއި އެކަން މީޑިއާތަކުގެ ސަމާލުކަމަށް ގެންނަކަމަށް އަސްލަމް ވިދާޅުވި އެވެ.

އަދި އެކަން ވަރަށް އަވަހަށް އެލްޖީއޭގެ ސަމާލުކަމަށް ގެނެސް މަގާމުގެ މަސްއޫލިއްޔަތު އަދާ ނުކުރެވޭތީ އެސްޖީގެ މައްޗަށް އިތުބާރު ނެތްކަމަށް ކަނޑައެޅުމަށް ކައުންސިލަށް އެޖެންޑާކުރާނެކަމަށްވެސް އަސްލަމް ވިދާޅުވި އެވެ.

މީގެ ކުރިންވެސް އަތޮޅު ކައުންސިލްގެ ބައެއް ބައްދަލުވުންތަކުގައިވެސް އެސްޖީ އިބުރާހިމް އުމަރު، އެކައުންސިލުން ނިންމާ ބައެއް ނިންމުންތައް ތަންފީޒުނުކުރާ މައްސަލާގައި މެންބަރުންގެ ފާޑުކިޔުން ވަނީ އަމާޒުވެފަ އެވެ.

މިދައުރުގައި ހދ އަތޮޅު ކައުންސިލް ފާހަގަކުރެވެނީ މީޑިއާތަކާ ދުރު އަދި މައްސަލަތައް ގިނަ ކައުންސިލެއްގެ ގޮތުގައި އެވެ. އެ ކައުންސިލްގެ ރައީސް ޖަލްސާތަކަށް ބައިވެރިނުވާތީ އޭނާ މަގާމު ވަކިކޮށްފައިވާއިރު ދެ ނައިބު ރައީސްވެސް މަގާމުން ވަކިކޮށްފައިވެ އެވެ.