ތިލަދެކުނު ޤުރުއާން މުބާރާތުގައި އާންމުންގެ ބައެއް އިތުރުކޮށް އާންމުނަން ވާދަކުރެވޭނެ ގޮތް ހަދަނީ

ކުރިއަށް އޮތްތަނުގައި ހދ އަތޮޅު ޤުރުއާން މުބާރާތް ބާއްވާއިރު އާންމުންނަށް ބައިވެރިވެވޭގޮތަށް، އާންމުގެ ބަޔެއް އިތުރުކޮށް ކައުންސިލްތަކަށް ބައިވެރިވުމުގެ ފުރުސަތު ދޭނެކަމުގައި ހދ އަތޮޅު ކައުންސިލްގެ ނައިބު ރައީސް މުހައްމަދު ވަހީދު ވިދާޅުވެއްޖެ އެވެ.

މީޑިއާތަކަށް ފޮނުވި މެސެޖެއްގައި މުހައްމަދު ވަހީދު ވިދާޅުވީ، އާންމުގެ ބައިން ކިޔެވުމުގެ ފުރުސަތު ދޭނީ ކައުންސިލްތައް މެދުވެރިކޮށް ކަމަށެވެ.

އޭނާ ވިދާޅުވީ، އޭގެ އިތުރުން އަތޮޅު ކައުންސިލް މެންބަރުގެ ރުހުން ލިބިއްޖެނަމަ މުބާރާތުން އެއްވަނައަށްދާ ދަރިވަރަށާއި އެ ދަރިވަރެއްގެ ބެލެނިވެރިޔާއަށް އަތޮޅު ކައުންސިލުން އުމުރާ ދަތުރެއް ހަމަޖައްސައިދޭނެ ކަމަށެވެ.

"މިގޮތަށް ހަމަޖައްސާއިރު ފައިސާ ދިނުމުގެ ބަދަލުގައި އުމްރާ ދަތުރުގެ އެންމެހާ ކަންކަން ހަމަޖައްސާ، އެފަރާތްތަކަށް އަތޮޅު ކައުންސިލުން އުމްރާއަށް ފޮނުވަދިނުން ހަމަޖައްސައިދޭގޮތަށް ކުރިއަށް ގެންދާނަން މެންބަރުންގެ އެއްބާރުލުމާއެކު." އަތޮޅު ކައުންސިލް ހިންގުމާ ހަވާލުވެހުންނެވި ވަހީދު ވިދާޅުވި އެވެ.

މިއަހަރުގެ ޤުރުއާން މުބާރާތުން އެއްވަނައަށް ދިޔަ ދަރިވަރަށް ފަރީ ހައްޖު އެންޑް އުމްރާ ގުރޫޕުން އުމްރާ ދަތުރެއްދީފައިވާތީ އެފަރާތްތަށް އޭނާ ޝުކުރުއަދާކުރެއްވި އެވެ.

މީގެ އިތުރުން މުބާރާތުގެ ގަވާއިދަށް ބަދަލު ގެނެސް އިންތިޒާމްކުރުން ހަރުދަނާކުރުމަށް ވަރަށް ބޮޑަށް މަސައްކަތް ކުރާނެ ކަމަށާއި އަދި އަތޮޅުގެ ރައްޔިތުން ޝާމިލްވާގޮތަށް ބާއްވާ މިފަދަ މުބާރާތްތަކުގައި ވީހާވެސް ގިނަ ރައްޔިތުންގެ ހިޔާލާއި މަޝްވަރާ ވަރަށް ބޮޑަށް ހޯދާނެކަމަށް ވަހީދު ވިދާޅުވި އެވެ.

އަތޮޅު ޤުރުއާން މުބާރާތް މިއަހަރު ބޭއްވި ހަނިމާދޫގައި އެވެ. މި މުބާރާތުގައި 200 އެއްހާ ދަރިވަރުން ކިޔެވި އެވެ.