މުދައްރިސުން ތަމުރީނުކުރުމުގެ ގައުމީ ޕްރޮގްރާމް ފަށައިފި

މުދައްރިސުން ތަމްރީނުކުރުމުގެ ގައުމީ ޕްރޮގްރާމް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އިފްތިތާހު ކޮށްދެއްވައިފިއެވެ. ރައީސުލްޖުމްހޫރިއްޔާ މި ޕްރޮގްރާމް އިފްތިތާހު ކޮށްދެއްވީ މިކަމަށްޓަކައި މިއަދު ހެނދުނު ދިވެހިރާއްޖޭގެ ގައުމީ ޔުނިވާސިޓީގެ އޮޑިޓޯރިއަމްގައި ބޭއްވި ރަސްމިއްޔާތެއްގައެވެ.

މިއަދު އިފްތިތާހްކުރި މުދައްރިސުން ތަމްރީނުކުރުމުގެ ގައުމީ ޕްރޮގްރާމަކީ ދިވެހިރާއްޖޭގެ ތައުލީމީ ދާއިރާއަށް ދިމާވެފައިވާ މުދައްރިސުން ލިބުމުގެ ދަތިކަމަށް ހައްލެއް ހޯދުމަށާއި ތައުލީމީ ދާއިރާގައި ދޭސީ މުދައްރިސުން އިތުރުކުރުމަށް އަމާޒުކޮށް ރައީސުލްޖުމްހޫރިއްޔާގެ ސީދާ ބެއްލެވުމުގެ ދަށުން މަތީ ސާނަވީ ތައުލީމު ނިންމުމަށްފަހު ނިކުންނަ ދަރިވަރުންނަށް އަމާޒުކޮށް ފެށި ތަމްރީނު ޕްރޮގްރާމެކެވެ.

މިއަދުގެ ރަސްމިއްޔާތުގައި ރައީސް ވަނީ މި ޕްރޮގްރާމްގެ ދަށުން މުދައްރިސުން ތަމްރީނުކުރުމުގެ ކޯހުގައި ދަރިވަރުން ބައިވެރިވާ 21 ސްކޫލަކާ ލިޔުން ހަވާލުކޮށްދެއްވާފައެވެ. އެގޮތުން މި ތަމްރީނު ޕްރޮގްރާމްގައި މި 21 ސްކޫލުން ޖުމްލަ 135 ދަރިވަރުން ބައިވެރިވާނެ ކަމަށް ރައީސް އޮފީހުން ބުނެއެވެ.

ރައީސް މުއިއްޒުގެ ސަރުކާރުން ތައުލީމީ ދާއިރާއަށް ދެއްވާ ހާއްސަ އިސްކަމުގެ ތެރެއިން މިއަދު ފެށިގެން ދިޔަ މުދައްރިސުން ތަމްރީނުކުރުމުގެ ޕްރޮގްރާމުގެ ސަބަބުން މަތީ ސާނަވީ ތައުލީމު ނިންމައި ވަޒީފާގެ މާހައުލަށް ނިކުންނަ އެތައް ދަރިވަރުންނެއް ދޭސީ މުދައްރިސުންގެ ގޮތުގައި ތައުލީމީ ދާއިރާގައި ހިދުމަތް ކުރުމުގެ މަގުފަހިވެ، ތައުލީމީ ދާއިރާއަށް ދޭސީ މުދައްރިސުން ލިބުމުގެ ދަތިކަން ހައްލުކުރުމަށް އެހީއަކަށް ވެގެންދާނެއެވެ.