ތައުލީމީ ދާއިރާއިން މަތީ ދަރަޖަ ހޯދި 40 މީހަކަށާއި، ދައުލަތަށް ދިގު މުއްދަތަކަށް ހިދުމަތްކުރެއްވި 53 މީހުންނަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ އެވޯޑު ދެއްވައިފިއެވެ.
ޖުމްހޫރީ ދުވަހުގެ މުނާސަބަތުގައި މިރޭ ބޭއްވި ޖަލްސާގައި އޭބޭފުޅުންނަށް ރައީސް މުއިއްޒު ވަނީ މެޑެއްޔަކާއި ހަނދާނީ ލިޔުމެއް ދެއްވާފައެވެ.
އިނާމު ލިބުނު ބޭފުޅުންގެ ތެރޭގައި ގައުމީ ސަނަދުތަކުގެ އޮނިގަނޑުގެ ލެވެލް-10 ގެ ސަނަދެއް ހާސިލުކުރުމުގައި ފާހަގަކޮށްލެވޭ ކާމިޔާބެއް ހޯދައިފައިވާ ދެ ބޭފުޅަކާއި ގައުމީ ސަނަދުތަކުގެ އޮނިގަނޑުގެ ލެވެލް 7 ނުވަތަ ލެވެލް-8 ނުވަތަ ލެވެލް-9 ގެ ސަނަދެއް ހާސިލުކުރުމުގައި އެންމެ މަތީ ވަނަ ހޯދައިފައިވާ 38 ބޭފުޅަކު ހިމެނެއެވެ.
މިގޮތުން، ގައުމީ ސަނަދުތަކުގެ އޮނިގަނޑު ލެވެލް 10ގެ ސަނަދު ހާސިލްކޮށް، ރައީސްގެ އެވޯޑު ކާމިޔާބު ކުރެއްވީ މއ. ޑޯންލައިޓް، . ޑރ، ޢާއިޝަތު ޝިނާއާއި ހުޅުމާލެ ފްލެޓް ނަންބަރު 03-ޖީ-89، ޑރ. ހަދީޖާ ރަޝީދެވެ.
ތައުލީމީ ދާއިރާއިން އެވޯޑަށް 113 ބޭފުޅުން ހުށަހެޅި ނަމަވެސް، މިއަހަރު އެވޯޑު ދީފައި ވަނީ 40 ބޭފުޅުންނަށެވެ.
މީގެއިތުރުން، މި ޖަލްސާގައި ވަނީ 40 އަހަރަށްވުރެ ދިގު މުއްދަތެއްގައި ދައުލަތަށް ހިދުމަތްކުރެއްވި 11 ބޭފުޅުންނާއި 35 އަހަރަށްވުރެ ދިގު މުއްދަތަކަށް ހިދުމަތްކުރެއްވި 42 ބޭފުޅުންނަށް ޝަރަފުގެ ބެޖަކާއި ޝަރަފުގެ އައްޑަނައިގެ އިތުރުން ހަނދާނީ ލިޔުމެއް ދީފައެވެ.
ދިވެހި ދައުލަތަށް ހިދުމަތް ކުރުމުގެ އިނާމު ދެއްވާނެ ބޭފުޅުން ކަނޑައެޅުމުގެ މަސައްކަތް ކުރީ ޤައުމީ އިނާމާބެހޭ ކޮމިޓީންނެވެ.
