ބޮޑު ތިން ނިންމުމަކަށް ރައްޔިތުންގެ ވޯޓަކަށް އަހަނީ

ބޮޑު ތިން ނިންމުމެއް ނިންމެވުމަށް ރައްޔިތުންގެ ފެންނަ ނުފެން ވޯޓަކަށް ދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ޖުމްހޫރީ ދުވަސް ފާހަގަ ކުރުމުގެ ގޮތުން ރޭ ބޭއްވި ޖަލްސާގައި ރައީސް ޑރ. މުއިއްޒު ވިދާޅުވި އެއް ކަމަކީ ރައީސުލްޖުމްހޫރިއްޔާ މަގާމުގެ ހުވާކުރައްވާ ދުވަސް ނޮވެމްބަރު 17 ގެ ބަދަލުގައި ނޮވެމްބަރު 11 އަށް ބަދަލު ކުރުމެވެ.

ރައީސުލްޖުމްހޫރިއްޔާ ހުވާކުރައްވާ ދުވަސް ނޮވެމްބަރު 11 އަށް ބަދަލުކުރުން

އެކަމަކު، އެކަން ކުރައްވާނީ ރައްޔިތުން ރުހޭ ނަމަ ކަމުގައި އެމަނިކުފާނު ވިދާޅުވިއެވެ. އަދި ރައްޔިތުން ރުހޭ ނަމަ، ގާނޫނަށް ނޫނީ ގާނޫނުއަސާސީއަށް ގެންނަން ބޭނުންވާ ބަދަލެއް ގެނައުމަށް ހުށަހަޅުއްވާނެ ކަމަށް ވެސް އެމަނިކުފާނު ވިދާޅުވިއެވެ.

"ރައްޔިތުން ބޭނުމިއްޔާ އެގޮތަށް ނިންމައި ދޭނީ،" ރައީސް ވިދާޅުވިއެވެ.

ރައީސް ވިދާޅުވި ގޮތުގައި ސިޔާސީ އޮއިވަރުގައި ޖެހުމުގެ ސަބަބުން، ކޮންމެ ފަސް އަހަރަކުން ރައީސުލްޖުމްހޫރިއްޔާ މަގާމުގެ ހުވާކުރައްވާ ތާރީހު ނޮވެމްބަރު 11 ގެ ބަދަލުގައި ހަފުތާއެއްހާ ދުވަސް ފަހަތަށް ކައްސާލާފައިވާ ކަމަށެވެ.

ރިޔާސީ އަދި މަޖިލިސް އިންތިޚާބު އެއްކޮށް ބޭއްވުން

ރައީސް ޑރ. މުއިއްޒު ދެވަނަ އަށް ބޭނުންފުޅުވާ ކަމަކީ ރިޔާސީ އިންތިހާބާއި ރައްޔިތުންގެ މަޖިލިހުގެ އިންތިހާބު އެއްކޮށް ބޭއްވުމަށެވެ. ރައީސް ވިދާޅުވީ، މިހާ އާބާދީ މަދު ގައުމެއްގައި އެންމެ އެދެވޭ ގޮތަކީ އެ ދެ އިންތިހާބު އެކުގައި ބޭއްވުން ކަމަށެވެ.

"ދެ އިންތިހާބާ ދޭތެރޭގައި މި އޮންނަނީ ދެ ތިން މަސް ނޫންތޯ؟ އެތައް ހަރަދެއް އެބަ ހިނގާ. އިލެކްޝަންސް ކޮމިޝަނުން އެކަނި ވެސް އެތައް ސަތޭކަ މިލިއަނެއް އެބަ ހަރަދުކޮށްލަން ޖެހޭ. އޭގެ ބަދަލުގައި ރިޔާސީ އިންތިހާބާ އެކުގައި މަޖިލިސް އިންތިހާބު ބޭއްވުމަކީ އަޅުގަނޑު ދެކޭ ގޮތް. އެކަމަކު އަޅުގަނޑަކަށް ނުނިންމޭނެ،" ރައީސް ވިދާޅުވިއެވެ.

ރައީސް ޑރ. މުއިއްޒު ވިދާޅުވީ މިކަމުގައި އެމަނިކުފާނަށް ގޮތް ނުނިންމެވޭތީ ރައްޔިތުންގެ ގާތަށް ގޮސް އެހުމުގެ ވިސްނުން އެބަ ހުންނެވި ކަމަށެވެ.

"ރައްޔިތުން ބޭނުންފުޅު ވަންޏާ ދެން އަންނަ ރިޔާސީ އިންތިހާބަކާ އެކީގައި، ރައްޔިތުން އެ ގޮތަށް ފެންނަ ނުފެންނަ ވޯޓަކާ އެކީގައި ނިންމަވައިފިއްޔާ އޮންނާނެ ރައްޔިތުންގެ މަޖިލިސް އިންތިހާބު. އެހެންވީމާ އެ ކަމަށް ވެސް އަޅުގަނޑު ވޯޓަކަށް ރައްޔިތުން ގާތު އަހާނަން މަޖިލިސް މެދުވެރިކޮށް،" ރައީސް ވިދާޅުވިއެވެ.

ރިޔާސީ އިންތިޚާބުގެ ދެވަނަ ބުރަކަށް ނުދިޔުން

ރައީސް ޑރ. މުއިއްޒު ވިދާޅުވި ގޮތުގައި އެމަނިކުފާނުގެ ވިސްނުންފުޅަކީ ރިޔާސީ އިންތިހާބު ދެވަނަ ބުރަށް ނުގޮސް ފުރަތަމަ ބުރާ ހިސާބުން އިންތިހާބު ކާމިޔާބު ކުރައްވާ ބޭފުޅަކު ކަނޑައެޅުމެވެ. އެހެންވެ، ޕްރިފަރެންޝަލް ނިޒާމަކަށް އަމަލުކުރަން މިހާރު ވެސް އެޓާނީ ޖެނެރަލް އޮފީހުން ދިރާސާތައް ކުރަމުން އަންނަ ކަމަށް ވިދާޅުވިއެވެ.

މި ނިޒާމަކީ މިހާރު ވެސް ބައެއް ގައުމުތަކުން އަމަލުކުރަމުން އަންނަ ނިޒާމެއް ކަމުގައި އެމަނިކުފާނު ވިދާޅުވިއެވެ.

"ދެވަނަ ބުރަކަށް ނުގޮސް، ފުރަތަމަ ބުރުގައި ޕްރިފަރެންޝަލް ވޯޓިން އިން ދެވަނަ ބުރަކަށް ދާ ހާލެއްގައި ވެރިއަކަށް ހޮވާނެ މީހާ ވެސް އެނގޭ ގޮތަށް ވޯޓުލެވޭ ގޮތަށް. މާނައަކީ އެއްބުރުން ނިމޭނެއޭ. އެއްބުރުން އެއްވަނަ، ދެވަނަ ސާފުވާ ގޮތަށް، އަޅުގަނޑު ހިތުން ބައެއް ގައުމުތަކުގައި، އަވަށްޓެރި ބައެއް ގައުމުތަކުގައި ވެސް އޮވޭ އެހެން. އެކަމަކު، ދިރާސާ ކޮށްފައި އަޅުގަނޑު ގަސްދުކުރަން އެއީ އަޅުގަނޑުމެންގެ ގައުމަށް އެންމެ ރަނގަޅު ގޮތް ކަމަށް ވަންޏާ ރައްޔިތުންގެ މަޖިލިސް މެދުވެރިކޮށް، އެކަން އެދޭ ކަމަށް ވަންޏާ ދެން އަންނަ ރިޔާސީ އިންތިހާބުން ފެށިގެން ދެ ބުރު ނޯންނަ ގޮތަށް، އެއްބުރުން މީހަކު ހޮވައި ނިންމޭ ގޮތަށް ކަންކަން ބަދަލުކުރަން،"

ރައީސް ވިދާޅުވީ އެގޮތަށް އެކަން ކުރެވޭ ނަމަ، ހަރަދު ވެސް ކުޑަވާނެ ކަމަށެވެ. އެހެންވެ އެކަމުގައި ވެސް ވޯޓަކަށް އަހަން ގަސްދު ކުރައްވާ ކަމަށް ވިދާޅުވިއެވެ.

"މިފަދަ މުހިންމު ބައެއް ކަންކަން ރައްޔިތުންގެ ކިބައިން އަހައި ރައްޔިތުން ބޭނުންވާ ކަމަށްވާ ނަމަ، އެގޮތުގެ މަތިން ގެންދިއުމަކީ އަޅުގަނޑު ހިތުން ކުރަން ޖެހޭ ކަމެއް،" ރައީސް ޑރ. މުއިއްޒު ވިދާޅުވިއެވެ.