ބަލިމީހަކަށް ދިން އެހީގެ ތަފުސީލް ހާމަކުރި މައްސަލާގައި އެންސްޕާއިން މާފަށް އެދިއްޖެ

ކެންސަރަށް ފަރުވާ ހޯދަމުންދާ ބަލިމީހަކަށް ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)އިން އެހީ ނުލިބޭ ކަމަށް ބުނެ ސޯޝަލް މީޑިއާގައި ކަންބޮޑޫވުން ފާޅުކުރުމަށް ދައުރުކުރި ތުހުމަތުތަކަށް ރައްދުދިންއިރު އެ އޭޖެންސީން އާންމުކުރި ބައެއް މައުލޫމާތަށް، އެންސްޕާއިން މައާފަށް އެދިއްޖެއެވެ.

ކެންސަރަށް ފަރުވާ ހޯދަމުން އަންނަ މީހަކަށް ކުރީ ސަރުކާރުގައި އެންސްޕާއިން ދިން ފައިސާގެ އަދަދަށް ވުރެ މަދުން މިހާރު ފައިސާދޭ ކަމަށް ބުނެ ސޯޝަލް މީޑިއާގައި ކަންބޮޑުވުންފާޅުކޮށް ކޮށްފައިވާ ޕޯސްޓަކާ ގުޅިގެން އެ އޭޖެންސީން ވަނީ އެ މީހާއަށް ފޯރުކޮށްދީފައިވާ އެހީގެ ތަފުސީލުތަކެއް ހާމަކޮށްފައެވެ.

ރޭ އެ އޭޖެންސީން ނެރުނު ބަޔާނެއްގައި ބުނީ، އެ ބަޔާނުގައި އެ ބަލި މީހާއަކީ ކާކުކަން ބުނެފައި ނުވި ނަމަވެސް އެ މީހާއަށް އެންސްޕާއިން ދީފައިވާ އެހީގެ މައުލޫމާތު ހިމަނައިފައިވުމަކީ އެންމެ ރަނގަޅު ގޮތް ނޫން ކަމަށާއި އެފަދަ މައުލޫމާތެއް ހިމެނިފައިވާތީ އެކަމަށް އެ އެޖެންސީން މައާފަށް އެދޭކަމަށެވެ.

ބަލިމީހާގެ އާއިލާ މެންބަރު ސޯޝަލް މީޑިއާގައި ދައްކާފައިވަނީ ދޮގު ވާހަކަތަކެއް ކަމަށް ބުނެ ނޫސްބަޔާން ނެރުމުން އެންސްޕާ އަށް އާންމުންގެ ގިނަ ފާޑުކިޔުންތަކެއް އަމާޒުވި އެވެ. އެ ފާޑުކިޔުންތަކާ އެކު އެންސްޕާ އިން މިހާރު ވަނީ އެ ނޫސް ބަޔާން ސޯޝަލް މީޑިއާއިން ޑިލީޓް ކޮށްފަ އެވެ.

ސޯޝަލް މީޑިއާ ޕޯސްޓާ ގުޅޭ ގޮތުން މީގެ ކުރިން އެންސްޕާއިން ބުނެފައި ވަނީ އެއީ ހަގީގަތަކާ ހިލާފު ވާހަކަތަކެއް ކަމަށާއި، އެ ޕޯސްޓާ ގުޅިގެން އެ އޭޖެންސީގެ މުވައްޒަފުން ބަދުނާމުވާ ގޮތަށް ވާހަކަ ދައްކަމުންދާ ކަމަށެވެ.

އެހެންކަމުން، އެ ޕޯސްޓު ކުރި މީހާއާ ބައްދަލުކޮށް ހަމަޖައްސައިދިން އެހީތައް އޭނާގެ ހާޒިރުގައި އެންސްޕާގެ ސިސްޓަމްތަކުން ބެލުމުން، އެ އެހީތައް އެކައުންޓަށް ޖަމާވެފައިވާކަމަށް އެ ފަރާތުން އެއްބަސްވި ކަމަށް އެ ބަޔާނުގައި ވެއެވެ. އަދި އެކްސްގައި ދައުރުކުރި މައުލޫމާތަކީ ސައްހަ މައުލޫމާތު ނޫން ކަމަށް އޭނާ އިއުތިރާފުވެފައި ވާކަމަށް ވެސް އެ ބަޔާނުގައި ވެއެވެ.

އެންސްޕާއިން ބުނި ގޮތުގައި، އެ ޕޭޝަންޓު އާސަންދަ އަދި ވެލްފެއާގެ އެހީއަށް އެދި ހުށަހެޅިކަމަށް ލިޔެކިޔުމުންނާއި ސިސްޓަމުން ފެންނަން އޮތީ ޖުމްލަ ނުވަ ފަހަރެއްގެ މަތިންނެވެ. މި ހުރިހާ ހާލަތެއްގައި އެހީ ހަމަޖައްސައިދީފައި ވާކަން ވެސް ލިޔެކިޔުމުންނާއި ސިސްޓަމުން ފެންނަން އެބަ އޮތް ކަމަށް ބުނެ، އެންސްޕާއިން ވަނީ އެހީގެ ތަފުސީލުތައް އާންމުކޮށްފައެވެ.