ކުރީގެ ސަރުކާރުތަކުން ދޫކޮށްލާފައިވާ ބޮޑެތި މައްސަލަތަކަށް ހައްލެއް ހޯއްދައިދޭނަން: ރައީސް

ރާއްޖޭގެ ހުރިހާ ސަރަހައްދެއްގައި ބޮޑުވެފައިވާ މައްސަލަތަކަށް ހައްލު ހޯދުމުގެ މަސައްކަތް މިހާރު ވާނީ ފައްޓަވާފައި ކަމަށާ، މިސަރުކާރުގެ ރޭވުންތެރިކަން ހުރީ ތަރައްގީގެ ކަންކަން ކުރަމުން، ކުރީގެ ސަރުކާރުތަކުން ފަސޭހައަކަށް ދޫކޮށްލާފައިވާ ބޮޑެތި މައްސަލަތަކަށް ރަނގަޅު ހައްލެއް ހޯއްދަވައިދެއްވުން ކަމުގައި ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.

އެ މަނިކުފާނު މިފަދައިން ވިދާޅުވީ، އއ. އަތޮޅުގެ ބައެއް ރަށްތަކަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން، އެ އަތޮޅު ރަސްދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި، ވާހަކަދައްކަވަމުންނެވެ.

މި ބައްދަލުވުމުގައި ވާހަކަ ދައްކަވަމުން ރައީސުލްޖުމްހޫރިއްޔާ ވަނީ، އެ ކަމެއް ހައްލުވުމަށް ރައްޔިތުން އިންތިހާއަށް އެދިއެދި ތިބި، އެހެން ނަމަވެސް ކުރީގެ ސަރުކާރުތަކުން ދޫކޮށްލާފައިވާ އެންމެ ބޮޑު އެއް މައްސަލައަކީ ޑްރަގް ނުވަތަ މަސްތުވާތަކެތީގެ މައްސަލަކަން ފާހަގަކުރައްވާފައެވެ. އެގޮތުން ޑްރަގްގެ ވަބާގައި ޤައުމު ޖެހި، އެ ކަމުގެ ތެރޭގައި 30، 40 އަހަރު ފާއިތުވެ ގޮސްފައި ވާ ކަމަށާއި، ހައްލު ވުމުގެ ބަދަލުގައި، މި މައްސަލަ ހައްތަހާ ދިޔައީ ބޮޑުވަމުން ކަމުގައި ރައީސް ވިދާޅުވިއެވެ.

މީގެސަބަބުން ކޮންމެ އާއިލާއެއް، ކޮންމެ ރަށެއް އަދި ކޮންމެ މުޖުތަމައެއްގައި މައްސަލަ އިތުރަށް ގޯސްވެފައި އޮތްކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ، ޑްރަގްގެ ވަބާގައި ޖެހިފައިވާ ފަރާތްތައް އެކަމުން ދުރުކޮށް، ޒުވާނުންނަކީ މަސްތުގެ ވަބާއިން ސަލާމަތްވެފައިވާ، ބިނާކުރަނިވި ބަޔަކަށް ހެދުމަކީ މިސަރުކާރުން އިސްކަންދޭ ކަމެއް ކަމުގައެވެ. މި ކަމަކީ، ކޮންމެ ރަށަކަށްވެސް މުހިންމު ކަމެއް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ދިވެހިރާއްޖެއަކީ ބޭރު ދުނިޔެއަށް ގައުމުގެ ރީތި ނަން އިޝްތިހާރުކޮށްގެން ހޯދާ އާމްދަނީއަށް އިންތިހާއަށް ބަރޯސާވެފައިވާ ގައުމަކަށް ވާއިރު، އެކަން ދެމެހެއްޓެން އޮތީ މި ގައުމަކީ ސުލްހައާއި ހަމަޖެހުން ގާއިމުވެފައިވާ، ރައްކާތެރި އަދި އަމާން ގައުމަކަށް ހެދިގެން ކަމުގައި ވިދާޅުވިއެވެ. މިކަން ހާސިލުވާން އޮތީ މަސްތުގެ ވަބާއިން ދުރަށްޖެހިގެން ކަމުގައިވެސް ރައީސް ވިދާޅުވިއެވެ.

ފާއިތުވީ އަހަރު ދުވަހުގެ ތެރޭގައި، މިރޮގުން ގިނަ މަސައްކަތްތަކެއް އަދުގެ ސަރުކާރުން ކުރައްވާފައިވާކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. އެގޮތުން ރާއްޖޭގައި ފެތުރިފައިވާ ޑްރަގްގެ ވިޔަފާރީގެ ތެރޭގައި، ގިނަ އަދަދަކަށް، ނުގަވާއިދުން އުޅޭ ބިދޭސީން ހިމެނޭކަމަށާއި، މިހާރު އޭގެ ތެރެއިން ގިނަ ބަޔަކު ޤައުމުން ޑީޕޯޓްކޮށްފައި ވާނެކަން ރައީސް ފާހަގަކުރެއްވިއެވެ. މިދިޔަ އަހަރު ދުވަހުގެ ތެރޭގައި މަސްތުވާތަކެއްޗާއެކު ހިފާ، ހައްޔަރުކޮށް، ތަހުގީގަށްފަހު ޑީޕޯޓް ކޮށްފައިވާ ބިދޭސީންގެ އަދަދު 153 އަށް އަރާ ކަމަށާއި، މިއީ އޭގެ ކުރީ އަހަރާ އަޅާ ބަލާއިރު، 2 ގުނަ އިތުރު އަދަދެއް ކަން ފާހަގަކުރެއްވިއެވެ.

އަދި މަސްތުވާތަކެތީގެ ވިޔަފާރިކޮށް، ބޭނުންކުރާ ތަންތަން ބަލައި ފާސްކުރުމުގެ އޮޕަރޭޝަންތައް އިންތިހާއަށް އިތުރު ކުރެވިފައި ވާނެ ކަމަށާއި، މިދިޔަ އަހަރު ދުވަހުގެ ތެރޭގައި އެފަދަ 13435 ތަނެއް ބަލައި ފާސްކޮށް، އެކަމުގައި ޝާމިލުވާ ފަރާތްތަކުގެ މައްސަލަ ބަލާފައިވާކަމުގައި ރައީސް ވިދާޅުވިއެވެ.

އަގުގެ ގޮތުން ބަލާނަމަ އަދުގެ ސަރުކާރުން އަތުލައިގަތް މަސްތުވާތަކެތީގެ މިންވަރު 1.3 ބިލިއަން ރުފިޔާއަށް އަރާކަމަށާއި، މިދިޔަ އަހަރުގެ ނޮވެމްބަރުގެ ނިޔަލަށް އަތުލައިގަތް މަސްތުވާތަކެތީގެ އަގަކީ 255 މިލިއަން ރުފިޔާ ކަމުގައި ރައީސް ވިދާޅުވިއެވެ. ކަން މިހެން އޮތް އިރު، ފުލުހުންގެ އިދާރާއާއި އެ ނޫންވެސް ތަންފީޒީ މުޢައްސަސާތަކުގައި، މި ކަންކަމުގައި ނަހަމަ ގޮތުގައި މަޝްހޫލުވެފައިވާ ފަރާތްތައް މިހާރު މީގެތެރޭގައި ނުހިމެނޭނެކަމުގެ ޔަޤީންކަންވެސް ރައީސް ވަނީ ދެއްވާފައެވެ.

ސަރުކާރުގެ ވިސްނުމަކީ މަސްތުވާތަކެތީގެ މައްސަލައަށް ހަގީގީ ހައްލެއް ހޯއްދަވައިދެއްވުންކަން ފާހަގަކުރައްވަމުން އެމަނިކުފާނު ވަނީ އެކަމަށް ފުރުސަތު ފަހިކޮށްދޭނެ ބިލެއްވެސް މިހާރު ރައްޔިތުންގެ މަޖިލީހަށް ހުށަހަޅުއްވާފައިވާކަން ފާހަގަކުރައްވާފައެވެ.