ކޮންމެ ފުލަހަކީވެސް ރައްޔިތުންގެ އިތުބާރު ލިބިފައިވާ މީހަކަށް ވާންޖެހޭ

ޑިއުޓީ ގަޑީގައި އާއި ޑިއުޓީން ބޭރުގައިވެސް ކޮންމެ ފުލުހަކީ، ދިވެހި ފުލުހުންގެ މަސައްކަތަށް އެހެން މީހުންގެ އިތުބާރު ހޯދުމަށް މަސައްކަތް ކުރަން ޖެހޭ ފަރާތެއް ކަމަށް އެޑިއުކޭޝަން މިނިސްޓަރު ޑރ. އިސްމާޢިލް ޝަފީޢު ވިދާޅުވެއްޖެއެވެ.

މިނިސްޓަރު މިފަދައިން ވިދާޅުވީ 37 ވަނަ ޕޮލިސް އިނީޝިއަލް ޓްރެއިނިން ކޯހުގެ ދަސްވެނިވެ ހިނގާލުމުގެ ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.

"ހާއްސަކޮށް ރައްޔިތުންނާއި ގުޅުން ހުރި ކަންކަމުގައި މަސައްކަތް ކުރާއިރުގައި އަދުލުވެރި ވުމާއި، އިހުސާންތެރިވުމާއި، އިންޓަގްރިޓީ ގެއްލޭނެ ފަަދަ އެއްވެސް ކަމެއް ނުކުރުމަކީ އަޒުމް ކަނޑައަޅަން ޖެހޭ ކަމެއް،". މިނިސްޓަރ ޑރ. ޝަފީއު ވިދާޅުވިއެވެ.

މިނިސްޓަރ ޝަފީއު ވަނީ ރާއްޖޭގެ 140 އަށްވުރެ ގިނަ ރަށުގައި ރައްޔިތުންނަށް ހިދުމަތް ކުރުމުގައި ފުލުހުން ތިބިކަން ފާހަގަކުރައްވާފައެވެ. އަދި މުޖުތަމައުގައި އެހީތެރިކަމެއް ބޭނުންވެއްޖެ ކޮންމެ ހިނދެއްގައި ދިވެހި ފުލުހުން އެންމެ ކުރީ ސަފުގައި ތިބޭކަން ފާހަގަކުރައްވާ ވަޒީރު ވަނީ ފުލުހުން ކުރާ ކަންކަމަށް ސާބަސްދީ އެގޮތުގައި ތިބުމަށް އެދިވަޑައިގެންފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ބޭނުންފުޅުވަނީ ދިވެހި ގައުމަކީ ކުރިއަރާފައިވާ، އަމާން އެކުވެރި ރައްޔިތުންތަކެއް އުޅޭ މުޖުތަމައުއަކަށް ހަދަންކަން ފާހަގަކުރައްވާ މިނިސްޓަރ ވަނީ އެކަމުގައި އެންމެ އިސްދައުރެއް އަދާކުރެވޭނެ އެއްބަޔަކީ ދިވެހި ފުލުހުންކަމަށް ވިދާޅުވެފައެވެ.

މިނިސްޓަރު ވިދާޅުވީ ދިވެހި ފުލުހުންގެ ހިދުމަތަކީ ވަކި މަރުކަޒެއްގެ ތެރޭގައި ހިފެހެއްޓިފައި އޮންނަ އެއްޗަކަށް ވެެގެން ނުވާނެކަމަށެވެ. އޭގެ ބަދަލުގައި ހިދުމަތުގައި ޝާމިލްވާ ކޮންމެ ފުލުހަކީ މަރުކަޒުން ބޭރުގައާއި އެތެރޭގައިވެސް ކުރާ މަސައްކަތަށް ރައްޔިތުންގެ އިތުބާރު ހޯދައިދިނުމަށް މަސައްކަތް ކުރަންޖެހޭ ބަޔަކަށް ވާންޖެހޭކަމަށެވެ.

ހާއްސަކޮށް ރައްޔިތުންނާ ގުޅުން ހުރި ކަންކަމުގައި މަސައްކަތް ކުރާއިރު އަދުލުވެރިވުމަށާއި ފުލުހުންގެ ހިދުމަތުގެ އިތުބާރު ގެއްލޭނެ އެއްވެސް ކަމެއް ނުކުރުމަކީ އަޒުމަކަށް ވާންޖެހޭކަމަށްވެސް ވަޒީރު ވިދާޅުވިއެވެ. އަދި އެންމެ މީހެއް ކުރާ ކަމަކުން ރައްޔިތުންގެ މެދުގައި ފުލުހުންނަށް އޮންނަ އިތުބާރު ގެއްލިގެން ހިނގައިދާނެކަމަށާއި އެފަދަ ކަމެއް ނުކުރުމަށް ދަސްވެނިންގެ ކިބައިން މިނިސްޓަރ ޝަފީއު އެދިވަޑައިގަތެވެ.