އަންނަ އަހަރުން ފެށިގެން ޑަބްލިއުޑީސީ މެންބަރުންނަށް ވެސް ރޯދަ އިނާޔަތް ލިބޭނެ: ރައީސް

އަންނަ ރަމަޟާން މަހުން ފެށިގެން އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ)ގެ މެންބަރުންނަށް ރަމަޟާން މަހުގެ އިނާޔަތް ދޭން ފައްޓަވާނެ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އދ. ދަނގެތީގެ ރައްޔިތުންނާ ރޭ ބައްދަލުކުރައްވާ ރައީސް ވިދާޅުވީ އަންހެނުންގެ ކޮމިޓީތަކަކީ ލާމަރުކަޒީ ގާނޫނުގައި އޮންނަ ނުކުތާއެއްގެ ނިވަލުގައިވާ ބޭއިންސާފެއް ތަހައްމަލުކުރަމުންދާ ކޮމެޓީތަކެއް ކަމަށެވެ. ރައްޔިތުންނާ ބައްދަލުކުރެއްވުމުގެ ތެރެއިން އެ ކޮމެޓީތަކުގެ ޝަކުވާތައް އަޑުއެއްސެވި ނަމަވެސް އެކަމަށް ހައްލެއް ގެނައުމަށް ބޮޑެތި މަސައްކަތްތަކެއް ކުރަންޖެހިފައި ހުރި ކަަމަށް ވިދާޅުވި އެވެ.

ރައީސް ވަނީ އަންހެނުންގެ ކޮމެޓީތަކުގެ މެންބަރުންނަކީ، މުސާރަ ލިބޭ، ރަމަޟާން މަހުގެ އިނާޔަތް ލިބޭ އަދި މާލީ އިދާރާތަކުގެ އެކި ސްކީމްތަކަށް ޝަރުތު ހަމަވާ ބައެއް ކަމުގައި ހެދުމަށްޓަކައި، ލާމަރުކަޒީ ގާނޫނަށާއި، ވަޒީފާއާ ބެހޭ ގާނޫނަށް ގެންނަން ޖެހޭ އިސްލާހުތައް ރައްޔިތުންގެ މަޖިލީހުގެ ދެން އޮންނަ ދައުރުގެ މަސައްކަތް ފެށުމާއެކު ހުށަހަޅުއްވާނޭ ކަމަށްވެސް އިއުލާންކުރެއްވި އެވެ.

ރައީސްގެ ވާހަކަފުޅުގައި ވަނީ މިއަދު ތަސްދީގު ކުރެއްވި ބޭރު ފައިސާއާ ބެހޭ ބިލާ ގުޅެގޮތުންވެސް ވާހަަކަދައްކަވާފަ އެވެ. އެގޮތުން މި ބިލަށް އަމަލީ ސިފައެއް އައިސް، މި ބިލްގައިވާ ގޮތަށް ޑޮލަރު މާރުކުރެވެން ފެށުމުން، ކްރެޑިޓް ކާޑު ލިމިޓް ޑަބަލްކުރެވުން ފަދަ ފައިދާތައް އާންމު ރައްޔިތުންނަށް ލިބޭނެ ކަމުގެ ޔަގީންކަން ދެއްވި އެވެ.

ލޯކަލް ޓޫރިޒަމުން ލިބޭ އާމްދަނީގެ ވަކި އިންސައްތައެއް ކައުންސިލްތަކަށް ޖަމާކުރަންޖެހޭ ގޮތަށް ގާނޫނަށް އިސްލާހު ގެނައުމަށް ކުރަމުންދާ ފަންނީ މަސައްކަތްތައް ނިމުނުހާ އަވަހަށް މަޖިލީހަށް ހުށަހަޅައި، ފަތުރުވެރިކަމުން ލިބޭ ޓެކްސް ސީދާ ކައުންސިލްތަކަށް ލިބޭނޭ މަގު ފަހިވެ، ކައުންސިލްތަކަށް މާލީ ބާރުވެރިކަން އިތުރަށް ލިބޭނޭ މަގު ފަހިކޮށްދެއްވާނެ ކަމުގެ ޔަގީންކަންވެސް ރައީސް ވަނީ ދެއްވާފަ އެވެ.