ފެހުރިހި ބަލަން ދާ އުޅަނދުތަކުގެ ބުރަފަތީގައި ގާޑް އެޅުވުމަށް ނިންމައިފި

ފެހުރިހި ހިމާޔަތްކުރުމަށާއި އޭގެ ގުދުރަތީ މާހައުލު ދެމެހެއްޓެނިވި ގޮތެއްގައި ރައްކާތެރިކުރުމަށް އާ ފިޔަވަޅުތަކެއް އަޅަން ނިންމައިފައިވާކަމަށް އެންވަޔަރަންމަންޓް މިނިސްޓަރު މިނިސްޓަރު ޠާރިގު އިބްރާހިމް ވިދާޅުވެއްޖެއެވެ.

މީގެ ތެރޭގައި ފެހުރިހި ބަލަން ދާ އުޅަނދުތަކުގެ ބުރަފަތީގައި ގާޑް އެޅުވުން ހިމެނެއެވެ.

ދައުލަތުގެ މީޑިއާ މެދުވެރިކުރައްވައި ވާހަކަ ދައްވަކަވަމުން މިނިސްޓަރު ވިދާޅުވި ގޮތުގައި ކުރިއަށް އޮތް 3 މަސްދުވަހުގެ ތެރޭގައި މި އާ ގަވާއިދަށް އަމަލުކުރަން ފަށާނެއެވެ. އަދި ފެހުރިހި ބަލަން ޓޫރިސްޓުން ގޮވައިގެން ދާ އުޅަނދުތައް ރަޖިސްޓަރީ ކުރަންޖެހޭނެ ކަމަށާއި، އެ އުޅަނދުތައް މޮނިޓަރ ކުރުމަށް ހާއްސަ ލޯންޗެއް ހަމަޖައްސާފައިވާ ކަމަށް ބުންޏެވެ.

ރާއްޖޭގައި ހިމާޔަތްކޮށްފައިވާ 93 ސަރަހައްދުގެ ތެރެއިން އެންމެ ބޮޑު ސަރަހައްދު ކަމަށްވާ ސައުތު އަރި މެރިން ޕާކް (ސަމްޕާ) އަށް ކޮންމެ ދުވަހަކުވެސް ގިނަ އަދަދެއްގެ ޓޫރިސްޓުން ޒިޔާރަތްކުރާ ކަމަށާއި، ބައެއް ފަހަރު 100 ޓޫރިސްޓުން އެއްފަހަރާ ފެހުރިހި ފަހަތުން ފަތާ ކަމަށް މިނިސްޓަރު ފާހަގަކުރެއްވިއެވެ.